Moba Byu Pé Gumlau Toq É Hkyô
3
Ahap é yhang zo Yoram gi, Yudaq hkóhkâm Yehoshahpat ùp é raxe shit zan zàn lé, Samariq wà mó má Isira-elaq hkóhkâm dùt mù, raxe í zân ùp ri. 2 Yhang gi, haû Yhûmsîng Garaî é myòq hí má agè ashop é hkyô kut é nghut kôlhang, yhâng nu eq yhâng wa kut laî lo é su gi, a kut nghut ri. Yhang gi, yhâng wa xuq tô é Balaq hparà chyoiyúng lùqzìng lé nùt lhêng pyâm ri. 3 Nghut kôlhang, yhang gi, Isira-elaq byu pé lé mara shuî kut shut é Nebat é yhang zo Yerobo-am é yubàk mara hkyô má nghêhkau ló nyì mù, haú pé mai a lhing taû lò nghut ri.4 Ahkuî, Moba hkóhkâm Mesha gi, sau rém mù, Isira-elaq hkóhkâm lé, sau zo rasen eq saulo rasen mâ é saumaú pé lé, chyûnghuq dông byî nyi ri. 5 Nghut kôlhang, Ahap shi byùq é htâng má, Moba hkóhkâm gi, Isira-elaq hkóhkâm lé gumlau toq bê nghut ri. 6 Haû mù, Hkóhkâm Yoram gi, haú u lé, Samariq wà mai htoq ló luî, Isira-elaq a-myû bànshoq bâng chyáng gyèzo tsing hkyui yu ri. 7 Yhang gi, Yudaq hkóhkâm Yehoshahpat chyáng le, “Moba hkóhkâm gi, ngo lé gumlau toq bê nghut ri. Moba a-myû lé majan toq râ matú, nàng, ngò eq rahá cháng râ lhú?” ga dang hun kat ri.
Yehoshahpat gi, “Ngò, nàng eq rahá bo cháng râ nghut lhê. Ngò gi, nàng su nghut mù, ngá é byu pé gi, náng é byu pé su, ngá é myang pé gi, náng é myang pé su nghut nyi lhê.” ga tû taî ri.
8 Hau htâng, yhang gi, “Hká hkyô mai ngá-nhúng ê htim râ lhú?” ga myi jáng, Yoram gi, “Edom mau mâ é yòso dông ê htim râ nghut lhê.” ga tû taî ri.
9 Haû mù, Isira-elaq hkóhkâm gi, Yudaq hkóhkâm eq Edom hkóhkâm le mù rahá htoq ló bekô nghut ri. Nyhit nyí sô lhing wún kô é htâng má, gyèzô pé gi, yhûmsing é matú le, yhángmòq eq rahá nghut é gaunyhaú pê é matú le, ûchyam a wó lo kó nghut ri.
10 Haú hkûn, Isira-elaq hkóhkâm gi, “Hkâsu htâ! Haû Yhûmsîng Garai gi, ngá-nhúng hkóhkâm sum yuq lé, Moba byu pê é lòq má àp pyám râ matú za rahá ji tsîng yu é nghut ri nhung lhî?” ga garû taî ri.
11 Nghut kôlhang, Yehoshahpat gi, “Haû Yhûmsîng Garai lé wó myî wú râ matú, Yhûmsîng Garaî é myìqhtoi rayùq yùq shí má a nyì kó lhú?” ga myî ri.
Haû jáng, Isira-elaq hkóhkam é zaugun hpó rayùq gi, “Shahpat é yhang zo Elisha shí má nyi ri. Yhang gi, Eliya lé bo htuq bo tê sû nghut ri.” ga tû taî ri.
12 Yehoshahpat gi, “Haû Yhûmsîng Garaî é mungdang, yhang eq rahá nghut ri.” ga taî ri. Haû mù, Isira-elaq hkóhkâm, Yehoshahpat eq Edom hkóhkâm pé gi, yhâng chyáng gyó e akô nghut ri.
13 Elisha gi, Isira-elaq hkóhkâm lé, “Ngò gi, nàng eq haî sêng lhê lhú? Náng wâ é myìqhtoî pé eq náng nû é myìqhtoî pê chyáng ê myi keq.” ga taî ri.
Isira-elaq hkóhkâm gi, “A nghut ô; haû Yhûmsîng Garai gi, ngá-mòq hkóhkâm sum yuq lé, Moba byu pê é lòq má àp pyám râ matú rahá ji tsîng yu é yánmai ru nghut ri.” ga tû taî ri.
14 Elisha gi, “Ngò dójaú nyi é, Wum-o a-tsam dìk shoq bò Sû, haû Yhûmsîng Garai rû dui nyi é eq rajung za, gè gè yhang, Yudaq hkóhkâm Yehoshahpat é myòqdong lé, ngò a hkúnggâ é ru nghut le gi, náng shut ngò myòqdong hû râ le a nghut, nang lé ngò gyo byi râ le a nghut. 15 Nghut kôlhang, ahkuî, tíng bàt sû rayùq lé ngá chyáng shuî lé lô keq.” ga taî ri.
Haû tíng bàt sû tíng bàt nyi é u, haû Yhûmsîng Garaî é lòq gi, Elisha é ahtoq má jé ri. 16 Haû mù, yhang gi, “Haû Yhûmsîng Garai shî su ga taî ri; Ngò gi, langhkaû shî má wuìnhông pé lhoqpyíng râ nghut lhê. 17 Hkâsu mù gâ le, haû Yhûmsîng Garai shî su ga taî ri; núngmòq gi, laì lé le, mau lé le, myàng kôrâ a nghut; nghut kôlhang, langhkaû shí má gi, wuì byíng zan to râ nghut mù, núngmòq le, núngmòq é no myang le, núngmòq é gótû gaunyhaú pé le, wuì myàng shuq kôrâ nghut lhê. 18 Shí hkyô gi, haû Yhûmsîng Garaî é myòq hí má lui é múzó nghut lhê; Yhang gi, Moba byu pé lé le, núngmòq é lòq má àp byi râ nghut lhê. 19 Núngmòq gi, gingtîng é wà mó hkangmó eq ahkyàk é wà hkangmó lé wó ung yù kôrâ nghut lhê. Núngmòq gi, ge é sikgâm hkangmó lé htuq pyám mù, wuìbúm pé bànshoq lé xaû pyám luî, yò gè hkangmó lé, lùqgòk èq lhoqhtên pyám kôrâ nghut lhê.” ga taî ri.
20 Htang nàpkyó nàpsûn, hkungga nhông byi râ ahkyíng má, Edom mau shut mai wuì yui htoq lô mù, haú mau gón má wuì byíng zan to bê nghut ri.
21 Ahkuî, Moba byu pé bànshoq gi, hkóhkam pé mai yhángmòq lé majan zan râ matú lé lô bê gâ é hkyô lé wó gyo kôjáng, gyèhking pé wó chung é tiq é kô é yùqgè wuì lé ji yù mù, maukyo má jowò yu tô bum akô nghut ri. 22 Yhángmòq, nàpsûn noq le toq lô kô é hkûn, buì gi, wuì htoq má tso tô ri. Moba byu pé gi, wuì haû sui su ne tô é lé tû-tap mai myang akô nghut ri. 23 Yhángmòq gi, “Hê gi, sui nghut rô! Hkóhkâm hé bang gi, majan zân lhum mù, rayùq eq rayùq sat shi lhum bekô râ za nghut lhê. Ahkuî, Moba byu pé ê, azíng zê ê lú yû sháng!” ga taî bum akô nghut ri.
24 Nghut kôlhang, Moba byu pé, Isira-elaq gyèwap má jé lé kôjáng, Isira-elaq byu pé gi, toq mù, yhángmòq hpang ló shoq majan lhom zan bekô. Hau htoq agó, Isira-elaq byu pé gi, yhángmòq é mau má wàng mù, Moba byu pé lé sat kyop pyám bekô nghut ri. 25 Yhángmòq gi, wà pé lé lhoqhtên pyám kômù, yò gè hkangmó má lùqgòk byíng tô bùm shoq, yùq hkangmó lùqgòk racham cham tsing dú kat akô nghut ri. Yhángmòq gi, wuìbúm pé bànshoq lé xaû pyám kômù, ge é sikgâm hkangmó lé htuq pyâm akô nghut ri. Kira Hareset wà má za lùqgòk yhâng é yhang jòq tô bum ri; nghut kôlhang, laidán chung é gyè pé gi, wà haú lé lhom hkyùq to mù, htim bekô nghut ri.
26 Moba hkóhkâm gi, majan a ûng lo dùt é hkyô lé myàng jáng, shâm chung é gyèzo nyhit shô yùq lé shuî yù mù, Edom hkóhkam é hkyam mai zân htoq ló râ matú shi-kùt wú kôlhang, yhángmòq sûm byùq ri. 27 Haû mù, yhang gi, yhâng é hkóhkâm hkô má zùng râ sû nghut é yhâng é zo-mún lé shuî yù mù, myi nyhé hkungga dông wàhkûm htoq má nhông byî ri. Haú hkûn, Isira-elaq byu pê chyáng nhikmó-yo hkyô jé bê nghut mù, yhángmòq gi, zùt tau luî, yhûmsing é mau shut taû ló bûm bekô nghut ri.