Chuimó Myhî É Tsanlun Xû
4
Myìqhtoi hpúng mâ é rayùq é yhûmsîng myhí gi, Elisha lé, “Náng é duìnhâng zoshâng ngá é yhûmsîng hpó shi byùq bê nghut ri; yhang, haû Yhûmsîng Garai lé gyùq hkúngga sû nghut é lé, nàng sê lhê. Nghut kôlhang, ahkuî, chyîn yhûmsîng hpó gi, ngá zô nhik lé yhâng é jùn kut râ ga lé shuî yù nau nyi ri.” ga ngau garû taî ri.2 Elisha gi, chuimó myhí haú lé, “Nang lé ngò hkâsu kut garúm yû râ lhú? Ngo lé taî wú aq; náng é yhûm má haî joq lhê lhú?” ga tû taî ri.
Chuimó myhí haû gi, “Náng é duìnhâng zoshâng myhî é yhûm má, tsanlun xû rayambú zo mai lai luî, gótû haî le a wó.” ga taî ri.
3 Elisha gi, “Ló mù, náng é yhûmkyochang pé bànshoq bâng chyáng mâ é yambú akôm pé lé ló tsing nghô yu to aq. Myo myo nghô yu to aq. 4 Hau htâng, nàng eq nungzô nhik yhúmhkaû shut wang ló mù, hkum myhî to luî, yambú haú pé bànshoq má xû tsing hut kat mù, xû byíng é yambú hkangmó lé rahkyam shut tô to keq.” ga taî ri.
5 Haû mù, myiwe myhí haû gi, Elisha chyáng mai htoq ló mù, yhang zô nhik eq rahá hkum myhi luî, ahkaû má nyi tô akô. Yhang zô nhik gi, yambú pé lé yhâng chyáng wàq byi jáng, yhang gi, xû tsing hut kat ri. 6 Yambú pé bànshoq má xû byíng jáng, myiwe myhí haû gi, yhang zo lé, “Gótû yambú yu lò shi aq.” ga taî ri.
Nghut kôlhang, yhang zo gi, “Yambú gótû a jòq lo nghut ri.” ga tû taî ri. Haú hkûn, xû yui é nô byùq bê nghut ri.
7 Myiwe myhí haû gi, Garai Gasâng é byù haú yùq chyáng ê taî kyo jáng, yhang gi, “Xû haú lé ló ung luî, náng é chyîn pé xap pyám aq; nàng eq nungzô nhik gi, myìt tô é gû mai chyungxe wó duî kôrâ nghut lhê.” ga taî ri.
Shunem Wà Byu É Yùqzo Lé Chyungxe Dum Lhoqdui É Hkyô
8 Ra-nyí lé, Elisha gi, Shunem wà má e ri. Wà haú má, sùtzè wó é myiwe myhí rayùq nyi ri; yhang gi, Elisha lé zang zo râ matú lung ri. Haû mù, Elisha gi, wà haú mai laî ló hkangmó, zo râ matú nô yù yù kut ri. 9 Myiwe myhí haû gi, yhâng é yhûmsîng hpó lé, “Ngá-nhúng nyi é hkyô mai a-num sô laî nyi é sû gi, Garai Gasâng é chyoiyúng é byù rayùq nghut é lé, ngò sê lhê. 10 Haû mù, yhûmhkûng htoq má, wàp zo ralhum saí luî, haú má, yhâng é matú yhupgyàp ralhum, zègyap ralhum, tánghkuq ralhum eq myi-kok ralhum kat to gòq. Haû jáng, yhang gi, ngá-nhûng chyáng lé hkangmó haú má wó nyî râ nghut lhê.” ga taî ri.
11 Ra-nyí lé, Elisha dum jé lé é hkûn, yhang gi, yhâng é wàp haú má dòq ló mù, ló nô lèq yu nyi ri. 12 Yhang gi, yhâng é duìnhâng zoshâng Gehazi lé, “Shunam wà byù myiwe myhí lé wùt kat àq.” ga taî ri. Haû mù, yhang gi, myiwe myhí lé wùt kat jáng, myiwe myhí haû gi, yhâng é hí má lo yàp tô ri. 13 Elisha gi, yhâng é duìnhâng zoshâng lé, “Myiwe myhí haú lé, ‘Nàng gi, ngá-nhik lé shî í lhom hkûlum yù bê nghut é yánmai, ahkuî, náng é matú ngá-nhik haî kut byi râ lhú? Hkóhkam chyáng, a nghut jáng, gyèzau hpó lé, ngá-nhik bo taí byi râ hkyô jòq ri lhú?’ nghû taí aq.” ga taî kat ri.
Myiwe myhí haû gi, “Ngò gi, ngá é byù myû wui chyáng nyi nyi lhê mù, haî a ra.” ga tû taî ri.
14 Haû mù, Elisha gi, “Haû jáng, yhâng é matú haî wó kut byi râ lhú?” ga myi jáng, Gehazi gi, “Gè gè yhang, yhang gi, zo a wó nghut ri; yhâng é yhûmsîng hpó le mâng byùq bê nghut ri.” ga taî ri.
15 Haú hkûn, Elisha gi, “Myiwe myhí haú lé wùt kat keq.” ga taî ri. Haû mù, duìnhâng zoshâng gi, dum wùt kat jáng, myiwe myhí haû gi, hkúmdong má yàp tô ri. 16 Haú hkûn, Elisha gi, “Nàng, sâ-nhik shí u lé, náng é lòqyìn má yùqzo bún to râ nghut lhê.” ga taî ri.
Myiwe myhí haû gi, “Ngá yhûmsîng ê, a nghut râ ô! Garai Gasâng é byù ê, jeju mai, náng é duìnhâng zoshâng myhí lé hkâ-mhaû taí ô!” ga tû taî pyâm ri.
17 Nghut kôlhang, myiwe myhí haû gi, zogûng wun byùq mù, yhang lé Elisha taî é eq rajung za, htang zàn haú ahkyíng kô má yhang, yùqzo hkû bê nghut ri.
18 Zoshâng haû kô lò mù, ra-nyí lé, yhang gi, gùq yam bang eq rahá nghut nyi é yhâng wâ chyáng htoq e ri. 19 Yhang gi, yhâng wa lé, “Ulhum no ri! Ulhum no ri!” ga taî ri.
Haû jáng, yhâng wa gi, duìnhâng zoshâng lé, “Zoshâng shî lé, yhâng nû chyáng bún ló aq.” ga taî ri. 20 Duìnhâng zoshâng gi, zoshâng haú lé bún toq yû mù, yhâng nû chyáng ló bún dé byî é htâng má, zoshâng haû gi, yhâng nû é tanghkoí má, nyí káng jé shoq zung nyì mù, shi ló byùq bê nghut ri. 21 Yhâng nu gi, ahtoq shut dòq ló mù, Garai Gasâng é byu é yhupgyàp má yhang lé ló lheq to luî, hkum myhî pyâm to mù, htoq ló bê nghut ri.
22 Yhang gi, yhâng é yhûmsîng hpó lé wùt mù, “Ngò, haû Garai Gasâng é byù chyáng hân wó ê mù, dum wó taû lò râ matú, jeju mai, duìnhâng zoshâng wuì mâ é rayùq eq loze radu lé bo nhang kat byi laq.” ga taî ri.
23 Yhâng é yhûmsîng hpó gi, “Haî mù, yhâng chyáng hkû-nyí ê râ ri lhú? Hkû-nyí gi, Lhôxan Lhôsik poî le a nghut, Bánno Buìnyì le a nghut mhaî.” ga myi jáng, myiwe myhí haû gi, “Haî a ra râ nghut lhê.” ga tû taî ri.
24 Hau htâng, yhang gi, loze lé buí mù, yhâng é duìnhâng zoshâng lé, “So láng aq; ngò za nang lé a taí jáng, ngá é yánmai hkâsô nyhâm nyì.” ga taî ri. 25 Haû mù, yhang gi, htoq e ló luî, Hkarimela Bùm má nyi tô é Garai Gasâng é byù chyáng ê jé ri.
Garai Gasâng é byù gi, yhang lé we we mai lhom myàng jáng, yhâng é duìnhâng zoshâng Gehazi lé, “Wú aq! Shunam byù myiwe myhí lé lo ri! 26 Nàng, yhang lé ê din hui mù, ‘Nàng gi, wángzán ri lhú? Náng é yhûmsîng hpó gi, wángzán nyi ri lhú? Nungzo gi, wángzán nyi ri lhú?’ nghû yhang lé myi aq.” ga taî ri.
Myiwe myhí haû gi, “Wángzán nyi bum lhê.” ga taî ri.
27 Yhang gi, bùm má nyi tô é Garai Gasâng é byù chyáng jé jáng, yhâng é hkyî má po zing tô ri. Gehazi gi, yhang lé dûn huî pyám râ ga lé lo ri; nghut kôlhang, Garai Gasâng é byù gi, “Yhang lé haî hkâ kut! Yhang gi, gyai yhang myìt myo ûng wôm nyi ri; nghut kôlhang, haû Yhûmsîng Garai gi, haú hkyô lé ngá chyáng mai haq to mù, ngo lé hai mû nghut é hkyô lé a taî kyo shi nghut ri.” ga taî ri.
28 Haú hkûn, myiwe myhí haû gi, “Ngá yhûmsîng ê, ngò gi, nàng lé yùqzo dûng é nghut lhê lhí? Ngò gi, nang lé, ‘Ngo lé myìt myòqbyù hkyô pé hkâbyi.’ nghû taí bê a nghut lhí?” ga taî ri.
29 Haú hkûn, Elisha gi, Gehazi lé, “Náng é buhîng lé hpyihit má dûn chyap mù, ngá é dumbáng lé yù chûng luî, dìn aq. Nàng huî é ó yùq lé le dù nyo é hkyô hkâkut; rayùq yùq, nang lé lhom dù nyò jáng, hkâtû taí. Ngá é dumbáng lé, yùqzo hau é myòqdong htoq má ê kê to byi aq.” ga taî ri.
30 Nghut kôlhang, zôshang é yhâng nu gi, “Haû Yhûmsîng Garai rû dui nyi é su, nàng le dui nyi é eq rajung za, ngò gi, nàng eq gang râ a nghut.” ga taî ri. Haû mù, Elisha gi, toq luî, yhâng htâng bo cháng bê nghut ri.
31 Gehazi gi, hí ê mù, dumbáng lé yùqzo hau é myòqdong htoq má ê kê to byî ri; nghut kôlhang, zoshâng gi, htê le a htoq, haî le a tû lò nghut ri. Haû mù, Gehazi gi, Elisha lé hui râ matú taû ló luî, yhang lé, “Zoshâng gi, a bûn lò nhô nghut ri.” ga taî ri.
32 Elisha, yhûm má jé wang é hkûn, zoshâng haû gi, yhâng é yhupgyàp htoq má shi lèq to láng ri. 33 Yhang gi, wang ê mù, yhángnhik í yùq baú nghut é má hkum myhî pyám luî, haû Yhûmsîng Garai lé kyûdûng ri. 34 Hau htâng, yhang gi, yhupgyàp htoq má dòq mù, nhut eq nhut, myòqjí eq myòqjí, lòq eq lòq kut luî, zoshâng hau é ahtoq má lèq nghop tô ri. Yhang gi, zoshâng hau é ahtoq má lèq nghop tô é hkûn, zoshâng hau é gùngdu nyê lo ri. 35 Elisha gi, toq mù, wàp hkaû má ê lò sô lhing é htâng má, yhupgyàp htoq má dum dòq luî, zoshâng hau é ahtoq má radàm dum lèq nghop tô ri. Zoshâng haû gi, nyhit dâm achu chu mù, myòq hpông lò bê nghut ri.
36 Elisha gi, Gehazi lé wùt yù mù, “Shunam myiwe myhí lé wùt kat àq.” ga taí jáng, yhang wùt kat bê nghut ri. Myiwe myhí haû lé lô jáng, Elisha gi, “Nungzo lé bún yû àq.” ga taî ri. 37 Myiwe myhí haû gi, ahkaû shut wang lò mù, Elisha é hkyî wang má, myigùng jé shoq ngóm gòp ri. Hau htâng, yhang gi, yhang zo lé bún yû mù, htoq ló bê nghut ri.
Au Hkaû Mâ É Myo-noq
38 Elisha gi, Giligala wà má taû lo é hkûn, haú mau má mùtmó gyó nyi ri. Myìqhtoi rahpúng, yhâng é hí má zung tô bum é hkûn, yhang gi, yhâng é duìnhâng zoshâng lé, “Au mó xuq luî, myìqhtoi shí bâng é matú, xun chyoq aq.” ga taî ri.
39 Yhángmòq mâ é rayùq gi, xun mhan-haq ê hku râ ga pá shut htoq e ló le, nuì lám rahkat lé myàng mù, haú mâ é ûm shi pé lé yhâng é buhîng mai wó bóm wàq é myhó hpyoq lô mù, yhang taû jé lô jáng, haú pé haî nghut é lé a sé kôlhang, hkoq jàp luî, xun au má kat bê nghut ri. 40 Xun haú lé yhángmòq é hí má hkû to byi bê nghut ri. Nghut kôlhang, yhángmòq gi, haú lé zô hi ló kô é hkûn, “Garai Gasâng é byù ê, xun au má myo-noq bo ri nhung mhaî!” ga wùt garû akô. Haû mù, yhángmòq gi, a ge zo lo kó nghut ri.
41 Elisha gi, “Mùk mùn ra-tsuí yu lò keq.” ga taí luî, mún haú lé au má kat mù, “Byù haú bang zo râ matú hku byi keq.” ga taí jáng, xun au hkaû má myo-noq a bo byùq lo nghut ri.
Byù Rashô Yùq Lé Zoshuq Byi Tsô É Hkyô
42 Byù rayùq gi, Balaq Shalisha wà mai lé mù, haû Garai Gasâng é byù chyáng, sânghi myhîng é gùqzò mâ é bûng nyhoq tô é mùk-yó mùk í xê long eq gùqnhâm sik ra-tsuí yu lé byî ri. Elisha gi, “Byù shí bang lé byi tso keq.” ga taî ri.
43 Yhâng é duìnhâng zoshâng gi, “Shí gû zâ é, byù rashô yùq lé hkâsu kut wó gâm byi ra lhú?” ga myî ri.
Nghut kôlhang, Elisha gi, “Byù shí bang lé haû tsing gàm byi aq. Hkâsu mù gâ le, haû Yhûmsîng Garai shî su ga taî ri; ‘Yhángmòq zo kôrâ nghut mù, ra-am lháng myìt to shirâ nghut lhê.’ gâ ri.” ga tû taî ri. 44 Haû mù, duìnhâng zoshâng haû gi, byù haú bâng é hí má tsing gàm byi jáng, yhángmòq gi, haû Yhûmsîng Garaî é dang eq rajung za, haú lé zo kômù, ra-am lháng myìt tô ashî nghut ri.