2 Hkóhkâm 5

Naman É Yàpjèq Lhoqgê Byi Huî É Hkyô

Ahkuî, Naman gi, Aram hkóhkam é gyèzau hpó nghut ri. Yhang gi, yhâng yhûmsing é hí má myòqdong wó mù, gyai yhang xânghpoq nge wó sû nghut ri; hkâsu mù gâ le, haû Yhûmsîng Garai gi, Naman dông mai Aram byu pé lé ûngmyuq hkyô byî é nghut ri. Yhang gi, sarhê mó rayùq nghut kôlhang, yàpjèq nòlì dàp sû nghut ri.

2 Ahkuî, Aram byu pé rahpúng gi, Isira-elaq mau lé a bûn nùng má ê htim mù, zo-myi zo rayùq lé chyup shuî lo akô; myiwe zo haû gi, Naman é yhûmsîng myhí lé dójaú nyi ri. 3 Yhang gi, yhâng é yhûmsîng myhí lé, “Ngá é yhûmsîng hpó gi, Samariq wà má nyi é myìqhtoi hpó lé ru ê wó huî le, hkâ-í gè râ wá! Haú yùq gi, yhâng é yàpjèq nòlì lé wó lhoqgê byi râ nghut lhê.” ga taî ri.

4 Haû mù, Naman gi, yhâng é yhûmsîng hpô chyáng wàng mù, Isira-elaq mau mâ é zo-myi zo taî é hkyô lé, taî kyô ri. 5 Haû jáng, Aram hkóhkâm gi, “Ahkuî ê àq; Isira-elaq hkóhkam chyáng ngò laiká kâ hun kat râ nghut lhê.” ga tû taî ri. Haû mù, Naman gi, ngùnhtung rasho raxê joí, hîng í xe í joí eq bumê raxê zúm lé yu chûng mù, htoq e ló bê nghut ri. 6 Isira-elaq hkóhkâm lé byi râ matú yhang yu chung é laiká má gi, “Ngá é duìnhâng zoshâng Naman lé, yhâng é yàpjèq nòlì wó lhoqgê byi râ matú, ngò, yhang lé, shî laiká eq rahá náng chyáng nhang kat é nghut lhê.” ga bo tô ri.

7 Isira-elaq hkóhkâm gi, laiká haú lé ban nghap eq yhang, yhâng é buhîng pé lâng cheq pyám mù, “Ngò gi, Garai Gasang nghut lhê lhú? Ngò gi, sat pyám mù, chyungxe dum wó duî nhâng sû nghut lhê lhú? Byù shí yùq gi, yàpjèq nòlì dàp sû lé wó yâ gè byi râ matú, haî mù, yhang lé ngá chyáng nhang kat lhê laq? Wú keq; yhang gi, ngo lé hkâ-í yhang jèq ho nyi ri nhung!” ga taî ri.

8 Haû Isira-elaq hkóhkâm, yhâng é buhîng pé lâng cheq pyâm é hkyô lé, Garai Gasâng é byù Elisha wó gyo jáng, yhang gi, “Nàng, haî mù yhûmsing é buhîng pé lé lâng cheq pyâm lhê lhú? Byù haú yùq lé, ngá chyáng nhang kat àq; Isira-elaq a-myû má myìqhtoi rayùq nyi é hkyô lé, yhang sé râ nghut lhê.” ga hkóhkam chyáng dang kyô kat ri. 9 Haû mù, Naman gi, yhâng é myang pé, gyèlhêng pé eq rahá ê mù, Elisha é yhûm hí má ê nô ri. 10 Haú hkûn, Elisha gi, lagyo nhâng luî, “Ê mù, Yodan làng má náng gûng nàng nyhit dàm ê chi aq; haú hkûn, náng é showa hí lhê su dum yúng byùq mù, nàng gi, sân-yúng byùq râ nghut lhê.” ga Naman chyáng taí nhang kat ri.

11 Nghut kôlhang, Naman gi, nhikjum gyô yo mù, toq ló luî, “Myìqhtoi hpó gi, teng za ngá chyáng htoq lé lô mù, yàp to luî, yhâng é Garai Gasang nghut é, haû Yhûmsîng Garaî é myìng lé lang mù, yhâng é lòq èq dàm dùt tô é jang má sop byi luî, ngá é yàpjèq nòlì lé lhoqgê byi râ nghut lhê nghû, ngò myìt pyâm é nghut lhê wá. 12 Damasikuq wà mâ é wuìlàng Abana eq Hparapa gi, Isira-elaq mau gón mâ é wuìlàng bànshoq htoq má jé ge lhê, a nghut lhí? Ngò gi, wuìlàng haú pé má chi mù, a ge lhoq sân-yúng yû râ nghut lhê lhú?” ga taî ri. Haû mù, yhang gi, nhikmó-yô é eq taû ló bê nghut ri.

13 Naman é duìnhâng zoshâng wuì gi, yhâng chyáng huî ê kômù, “Âwa ê, myìqhtoi hpó gi, nang lé, mú mó rajung jung kut râ matú taî é nghut jáng, nàng, haú lé kut râ é a nghut lhí? Haû mù, Yhang gi, nang lé, ‘Gùng ê chi mù, sân-yúng yû àq!’ ga taí jáng, nàng gi, jé riyhang kut gíng lhê, a nghut lhí?” ga taî akô nghut ri. 14 Haû mù, yhang gi, gyó ê luî, Garai Gasâng é byù haû, yhang lé taî é eq rajung za, yhânggùng yhang Yodan làng má nyhit dâm ê jum yu ri. Haú hkûn, yhâng é showa gi, hí lhê su dum dùt byùq mù, zorâm zo rayùq su sân-yúng byùq bê nghut ri.

15 Hau htâng, Naman eq yhâng htâng châng é bang bànshoq gi, Garai Gasâng é byù chyáng taû ló akô; Naman gi, yhâng é hí má yàp mù, “Isira-elaq mîngdán mai lai luî, mingkan gón má Garai Gasang a nyi é hkyô lé, ahkuî ngò sé bê. Haû mù, jeju mai, náng é duìnhâng zôshang é chyûnghuq lé hàp yù byi laq.” ga taî ri.

16 Myìqhtoi hpó haû gi, “Ngò dójaú nyi é, haû Yhûmsîng Garai rû dui nyi é eq rajung za, ngò haî lé le a hàp yù râ nghut lhê.” ga tû taî ri. Naman gi, yhang lé taî shi-kùt wú kôlhang, yhang gi, he-ngìk pyâm ri.

17 Hau htâng, Naman gi, “Nàng a hàp yu é nghut jáng, jeju mai, náng é duìnhâng zoshâng ngo lé, loze í du wó htô é myhó myi-tse byî kat laq; hkâsu mù gâ le, náng é duìnhâng zoshâng ngò gi, ahkuî mai, myi nyhé hkungga pé eq gótû hkungga pé lé, haû Yhûmsîng Garai lé nhông byî é mai lai luî, gótû hparà lé hkâ-nhám le nhông byi râ a nghut lo. 18 Nghut kôlhang, haû Yhûmsîng Garai gi, náng é duìnhâng zoshâng ngo lé, a-ô mâ é hkyô rahkat lé mara hkyut byi sháng gàq; ngá é yhûmsîng hpó gi, noqkuq râ matú Rimon noqkuq yhûm shut wang ê mù, ngá é lòqbú htoq má nghe tô é hkûn, ngò le haú má bo ngóm râ dùt é nghut lhê; haû Rimon noqkuq yhûm má, ngò ngóm gòp é hkûn, haû Yhûmsîng Garai gi, náng é duìnhâng zoshâng ngo lé, hau é mara hkyut byi sháng gàq.” ga taî ri.

19 Elisha gi, “Ngón za ló aq.” ga taî ri.

Naman gi, htoq ló mù, hkyô ralàt zo sô e ló bê nghut ri. 20 Nghut kôle, haû Garai Gasâng é byù Elisha é duìnhâng zoshâng, Gehazi gi, yhânggùng yhang, “Ngá é yhûmsîng, shî Aram byù Naman yu lé é chyûnghuq pé lé a hàp yù lhom kut kat é gi, yhâng ahtoq má lûm shogyô pyâm é dông dùt bê nghut ri. Haû Yhûmsîng Garai rû dui nyi é eq rajung za, ngò gi, yhâng é htâng má châng din ê mù, yhâng chyáng mai rajung jung ê dûng yù râ nghut lhê.” ga taî ri.

21 Haû mù, Gehazi gi, Naman é htâng má hân châng ê bê nghut ri. Naman gi, yhâng shut byù rayùq din lé lo é lé myàng jáng, haú yùq lé hui râ ga gyèlhêng mai gyó mù, yhang lé te yù luî, “Bànshoq ngón akô hkaî?” ga myî ri.

22 Gehazi gi, “Bànshoq ngón nyi lhê. Ngá é yhûmsîng gi, ngo lé nhang kat mù, ‘Ahkuî za, Ehprim bum mau mai myìqhtoi hpúng mâ é byù í yùq ngá chyáng lé jé akô. Jeju mai, yhángnhik é matú, ngùn raxe rajoí kô eq mèbu í zúm gàm byî kat laq.’ ga taí nhang kat ri.” ga tû taî ri.

23 Naman gi, “Jeju mai, ngùn í xe í joí yu ló aq.” ga tû taî ri. Yhang gi, haú pé lé hàp yù râ matú, Gehazi lé wum taî tsuq é htâng, ngùn haû í xe í joí lé htûng í lhum má kat luî, mèbu í zúm eq rahá tui mù, haú pé lé, yhâng é duìnhâng zoshâng í yùq lé byî é nghut luî, yhángnhik gi, Gehazi é hí má haú pé lé wàq so bekô nghut ri. 24 Gehazi gi, kong má jé jáng, duìnhâng zoshâng yhángnhik chyáng mai haú pé lé yù mù, yhúmhkaû má kat to luî, yhángnhik lé pûn kat jáng, yhángnhik ló byùq bê nghut ri.

25 Gehazi gi, wang ló mù, yhâng é yhûmsing hpô é hí má yàp to jáng, Elisha gi, yhang lé, “Gehazi, nàng hká mai taû lo é lhú?” ga myî ri.

Haû jáng, Gehazi gi, “Náng é duìnhâng zoshâng hká le a ló é nghut lhê.” ga tû taî ri.

26 Nghut kôlhang, Elisha gi, yhang lé, “Byù haú yùq gi, nang lé hui râ ga yhâng é myanglhêng mai gyó é hkûn, ngá é sô gi, nàng eq rahá nghut nyi lhê, a nghut lhí? Shî gi, ngùnhtung, mèbu pé, tsanlun hkyâm pé, tsibyiq hkyâm pé, sau hpúng pé, no pé eq jùn myhí jùn hpô pé lé hàp yù râ ahkyíng nghut lhê lhú? 27 Haû mù, Naman é yàpjèq nòlì gi, náng chyáng le, náng é awùt ashîn pê chyáng le, pyàt dedu ru dap nyì râ nghut lhê.” ga taî ri. Hau htâng, Gehazi gi, Elisha é hí mai htoq ló bê nghut mù, yhâng é showa má yàpjèq nòlì dàp byùq bê nghut luî, gyo su hpyu byùq bê nghut ri.