Wuì Má Byôm Htoq Lo É Wazung
6
Ra-nyí lé, myìqhtoi rahpúng gi, Elisha lé, “Wú aq; nàng eq rahá ngá-mòq chôm nyi é jowò gi, ngá-nhûng é matú lûm chyap byùq ri. 2 Haû mù, ngá-mòq lé, Yodan làng shut ê nhâng luî, yùq hkangmó zìng ê htuq wàq yù mù, haú má nyì jowò saî yù nhâng laq.” ga taî akô nghut ri.Elisha gi, “Ê keq.” ga taî ri.
3 Haú hkûn, yhángmòq mâ é rayùq gi, “Náng é duìnhâng zoshâng wuì ngá-mòq eq rahá bo cháng laq mhaî.” ga taî ri.
Haû jáng, Elisha gi, “Ngò, bo châng lé râ.” ga tû taî ri. 4 Haû mù, yhang gi, yhángmòq eq rahá bo ê bê nghut ri.
Yhángmòq gi, Yodan làng shut ê kôluî, sik pé yu hî bekô nghut ri. 5 Yhángmòq mâ é rayùq gi, sik htuq nyi é hkûn, jòqtoq wazung wuì hkaû má gyùt gyó wang byùq ri. Haû mù, “Goì yô, ngá é yhûmsîng ê! Haû gi, nghô lé é wazung ru nghut lhê ô!” ga wùt garû kat ri.
6 Garai Gasâng é byù haû gi, “Wazung hká má gyó ri lhú?” ga myî ri. Gyó é jowò lé haú yùq tûn shit jáng, Elisha gi, sikkoq rahkat zân yù luî, jowò haú má dú kat mù, jòqtoq wazung haû lé byôm htoq lô nhâng bê nghut ri. 7 Elisha gi, “Xe yù àq hkoi.” ga taî ri. Haû mù, yhang gi, yhâng é lòq lham luî, wazung haú lé xe yù bê nghut ri.
Aram Byu Pé Lé Elisha Myòq Jìt Nhang É Hkyô
8 Haú u má, Aram hkóhkâm gi, Isira-elaq byu pé eq majan zân lhûm nyi é nghut mù, yhâng é zaugun wuì eq, “Ngò gi, shí jowò, hé jowò má, ngá é gyèwap xuq râ nghut lhê.” ga hpyê lhûm nyi akô nghut ri.
9 Haú hkûn, Garai Gasâng é byù haû gi, Isira-elaq hkóhkam chyáng, “Aram byu pé gi, shí jowò, hé jowò shut gyó ló nyi akô nghut é yánmai, jowò haú má sidìq keq.” ga ê taí nhang kat ri. 10 Haû mù, Isira-elaq hkóhkâm gi, Garai Gasâng é byù haû tûn shit é jowò lé rago gôn wú bê nghut ri. Elisha gi, hkóhkâm lé adàm dàm sidìq byî é nghut mù, hkóhkâm gi, haú jowò pé wó koi laî pyám nhâng bê nghut ri.
11 Hau é yánmai, Aram hkóhkâm gi, nhik hko zô nyì bê nghut mù, yhâng é zaugun wuì lé ji yù luî, “Ngá-nhûng chyáng mâ é byù, Isira-elaq hkóhkam é hkyam shut dàp é, ó nghut ri lhú? Ngo lé taî kyô wú keq!” ga, yhángmòq lé dangmó hkyô ri.
12 Yhâng é zaugun wuì mâ é rayùq gi, “Ngá é yhûmsîng hkóhkâm ê, ngá-nhûng chyáng mâ é rayùq le a nghut; nghut kôlhang, Isira-elaq mau má nyi é myìqhtoi Elisha gi, náng é yhup wàp má, nàng taî é danghkun hkangmó lé lháng, Isira-elaq hkóhkam chyáng taî kyô nyi ri.” ga taî ri.
13 Haû mù, hkóhkâm haû gi, “Ngò, byù nhâng mù, yhang lé ê wó chyup yû sháng gàq, yhang hká má nyi é lé, ê ho wú keq.” ga hkunmó hkyô kat jáng, “Yhang gi, Dohtan wà má nyi tô ri.” ga, lo shit kyô akô nghut ri. 14 Haû mù, yhang gi, myang pé eq gyèlhêng pé lé le, gyè hpúng mó lé le, haú jowò shut nhâng bê nghut ri. Haú bang gi, myín lé yhang ê kômù, wà mó lé ê lhom hkyùq to bekô nghut ri.
15 Garai Gasâng é byu é duìnhâng zoshâng gi, htang nàpkyó noq le toq mù, htoq e ló é hkûn, myang pé, gyèlhêng pé eq rahá nghut é gyè hpúng mó èq wà haú lé lhom hkyùq tô é lé myàng luî, “Ngá é yhûmsîng ê, a dùt lo ô! Ngá-nhúng hkâsu kut lo râ lhú?” ga wùt myî kat ri.
16 Myìqhtoi hpó gi, “Hkâgyùq; ngá-nhúng eq rahá nghut nyi é bang gi, yhángmòq eq rahá nghut nyî bâng é htoq má jé myô lhê.” ga tû taî ri.
17 Hau htâng, Elisha gi, “Yhûmsîng Garai ê, yhang wó myâng sháng gàq, yhâng é myòq hpóng byi aq.” ga kyûdûng ri. Haú hkûn, Yhûmsîng Garai gi, duìnhâng zoshâng hau é myòq hpóng byî é nghut mù, yhang gi, wú kat le, Elisha é lhînghkyùq má, rabùm gón myang pé eq myi myanglhêng pé byíng zan tô é lé myang ri.
18 Aram gye pé gi, yhâng chyáng gyó lé lo bùm kô é hkûn, Elisha gi, Yhûmsîng Garai lé, “Gyè hpúng shî lé myòqjìt nhâng laq.” ga kyûdûng ri. Haû mù, Yhûmsîng Garai gi, Elisha dûng é eq rajung za, haú bang lé myòqjìt nhâng bê nghut ri.
19 Elisha gi, haú bang lé, “Shî gi, haú hkyô le a nghut, haú wâ le a nghut. Ngá htâng cháng keq; ngò, núngmòq lé, núngmòq ho nyi é su chyáng shuî ló râ nghut lhê.” ga taí mù, Samariq wà shut shuî ló bê nghut ri.
20 Yhángmòq wà hkaû má ban wang ló kô é htâng, Elisha gi, “Yhûmsîng Garai ê, shí bang wó myâng kó sháng gàq, yhángmòq é myòq lé hpóng byi aq.” ga taî ri. Haú hkûn, haû Yhûmsîng Garai gi, yhángmòq é myòq lé hpóng byî é nghut mù, yhángmòq gi, wú kat le, Samariq wà hkaû má jé nyi tô bum é lé myàng bekô nghut ri.
21 Isira-elaq hkóhkâm gi, haú bang lé myàng jáng, Elisha lé, “Ngá wa ê, ngò, yhángmòq lé sat pyám râ lhú? Ngò, yhángmòq lé sat pyám râ lhú?” ga myî ri.
22 Elisha gi, “Haú bang lé hkâsat; nàng gi, nàng wó chyup lo é bang lé náng é shâm eq laî èq sat pyám râ lhú? Yhángmòq myàng zo myàng shuq mù, yhángmòq é yhûmsîng hpô chyáng dum wó taû ló kó sháng gàq, yhángmòq hí má zoshuq eq ûchyam htûng byi keq.” ga tû taî ri. 23 Haû mù, yhang gi, yhángmòq é matú zoshuq poî mó hên byi mù, yhángmòq bàn zo bàn shuq kô é htâng, yhángmòq lé nhang kat bê nghut luî, yhángmòq gi, yhángmòq é yhûmsîng hpô chyáng dum taû ló bekô nghut ri. Hau htâng mai, Aram gumlau hpûng pé gi, Isira-elaq mau má a lé htim lo kó nghut ri.
Samariq Wà Má Mùtmó Gyó É Hkyô
24 Rayòq rabun laî htâng má, Aram hkóhkâm Ben Hadat gi, yhâng é gyè hpúng bànshoq lé ji tsîng yù mù, yán htoq ê luî, Samariq wà lé ê lhom hkyùq to bê nghut ri. 25 Samariq wà má mùtmó gyó bê nghut ri; wà lé lhom hkyùq tô é lûm myáng byùq é yánmai, lozê é ulhum ralhum lé gi, ngùnhtung raxe í rûng kô ung, hpûngkyui hkyi ra-kok lé gi, ngùnhtung shit che kô ung kut akô nghut ri.
26 Isira-elaq hkóhkâm gi, wàhkûm htoq mai laî ló é hkûn, myiwe myhí rayùq gi, yhang lé, “Ngá é yhûmsîng hkóhkâm ê, ngo lé garúm yû laq ô!” ga wùt garû kat ri.
27 Hkóhkâm gi, “Nang lé, haû Yhûmsîng Garai a garúm yu é nghut jáng, ngò gi, nang lé hká mai wó garúm râ lhú? Gùq chyârâng mai lhú? Tsibyiq wing pyik jang mai lhú?” ga tû taî ri. 28 Hau htâng, yhang gi, haû myiwe myhí lé, “Nàng, haî htûng hui zô tô lhê lhú?” ga myî ri.
Myiwe myhí haû gi, “Myiwe myhí shí yuq, ngo lé, ‘Hkû-nyí ngá-nhik myàng zo râ matú, nungzo yùqzo lé àp byî pyám aq; nàpmá gi, ngá zo yùqzo lé dum chôm zo gòq.’ gâ taî ri. 29 Haû mù, ngá-nhik gi, ngá zo yùqzo lé chyoq mù, chôm zo bê nghut lhê. Htang nyí, ngò gi, yhang lé, ‘Ngá-nhik myàng zo râ matú, nungzo yùqzo lé àp byî pyám aq.’ nghû taî é nghut lhê; nghut kôlhang, yhang gi, yhang zo yùqzo lé haq pyám bê nghut ri.” ga tû taî ri.
30 Hkóhkâm gi, myiwe myhí hau é dang pé lé wó gyo jáng, yhâng é buhîng pé lé lâng cheq pyám bê nghut ri. Yhang gi, wàhkûm htoq má sô e ló nyi é nghut mù, shiwa byù gi, wú kat kó luî, yhâng é buhîng hkaû má jimê wùt tô é lé myang bum akô nghut ri. 31 Yhang gi, “Shahpat é yhang zo Elisha é ulhum lé, hkû-nyí, ngò, yhâng é gòqsân htoq má jòq nhang tô é ru nghut le gi, Garai Gasang, ngo lé dàm mó byi sháng gàq!” ga taî ri.
32 Ahkuî, Elisha gi, yhâng é yhúmhkaû má zung tô é nghut mù, sûwún wuî le, yhang eq rahá bo zung tô bum akô nghut ri. Haû hkóhkâm gi, lagyo rayùq nhang kat ri; nghut kôlhang, lagyo haû a jé shi-má, Elisha gi, sûwún wuî lé, “Byù sat sû haû gi, ngá é ulhum lé hpyit râ matú byù rayùq lé nhang kat é lé, núngmòq a myàng kó lhú? Wú keq, lagyo haû jé jáng, hkum myhî pyám mù, hkum hí má yhang lé hkûm shap to keq. Yhâng é yhûmsing é hkyîbyè htê gi, yhâng é htâng má châng nyi lhê, a nghut kó lhú?” ga taî ri. 33 Elisha gi, sûwún wuî lé dang rû nyo nyi ashî u lé, lagyo hpóa gi, yhâng chyáng jé gyó lé bê nghut ri.
Hkóhkâm gi, “Ihkyùp mó shî gi, haû Yhûmsîng Garaî chyáng mâ é nghut lhê mù, ngò gi, haî mù, haû Yhûmsîng Garai lé myìt láng nyî lo râ lhú?” ga taî ri.