7
Elisha gi, “Yhûmsîng Garaî é dang lé tâm gyo keq. Haû Yhûmsîng Garai shî su ga taî ri; nàpmá shí u lé, Samariq wà hkum má, nú é mún rajoí èq súm xe sum rûng kô lé le, mùk-yó gùq sum joí kô lé le, ngùn chap sum mû mai ung kôrâ nghut lhê gâ ri.” ga tû taî ri.2 Yhâng é lòqbú má hkóhkâm hpó nghe zung tô é zaugun hpó gi, Garai Gasâng é byù haú lé, “Wú aq, haû Yhûmsîng Garai mai mauhkûng mâ é zoshuq hkohot hkum pé hpông kat le lháng, haú hkyô wó dùt râ lhú?” ga taî ri.
Haû jáng, Elisha gi, “Náng é myòqjí èq yhang haú hkyô lé nàng myàng râ nghut lhê; nghut kôlhang, haú mâ é haî lé le, nàng myàng zo râ a nghut!” ga tû taî ri.
Aram Gyè Hpúng Toq Hpang Byùq É Hkyô
3 Ahkuî, wà wàng hkum má yàpjèq nòlì dàp é byù myi yuq nyi tô ri. Yhángmòq gi, rayùq eq rayùq, “Ngá-nhúng gi, haî mù shî shoq shí jowò má láng nyî râ lhú? 4 ‘Wà hkaû shut wang ló sháng.’ nghû ngá-nhúng taî le gi, wà hkaû má mùtmó gyó tô é nghut mù, ngá-nhúng shî râ nghut. Ngá-nhúng shí má nyi tô é nghut le le, ngá-nhúng shî râ za nghut. Haû mù, sâ, ngá-nhúng gi, Aram byu pê é gyèwap shut ê mù, sûm é hkyô lé ê hkam yù sháng. Yhángmòq mai ngá-nhúng lé lhut to jáng gi, ngá-nhúng chyungxe duì râ nghut lhê; yhángmòq mai ngá-nhúng lé lhom sat jáng gi, ngá-nhúng shî râ nghut lhê.” ga taî lhûm bum akô nghut ri.
5 Yhángmòq gi, chutshúm zó má, Aram byu pê é gyèwap shut e ló bekô nghut ri. Yhángmòq, gyèwap yâm má jé ê kô é hkûn, haú má byù rayùq lháng a nyi to láng nghut ri. 6 Hkâsu mù gâ le, haû Yhûmsîng gi, Aram byu pé lé, gyèlhêng pê é htê, myang jum é htê eq gyè hpúng mó é htê pé lé wó gyo nhang é nghut mù, yhángmòq gi, rayùq eq rayùq, “Wú keq, Isira-elaq hkóhkâm gi, ngá-nhúng lé htim râ matú, Hiti hkóhkam pé eq Egutuq hkóhkam pé lé nghô yu to bu-nhung!” ga taî lhûm bum akô nghut ri. 7 Haû mù, yhángmòq gi, chutshúm zó má toq kômù, yhángmòq é zúm pé lé le, yhángmòq é myang pé eq loze pé lé le, tô pyâm to kôluî, yhángmòq é gyèwap mai, yhángmòq é chyungxe wó lùt râ matú hpâng bekô nghut ri.
8 Yàpjèq dàp é byù haú bang gi, gyèwap yâm má jé ê kô é nghut mù, zúm ralhum má wàng luî, zô yù shuq yû bekô nghut ri. Hau htâng, yhángmòq gi, ngùn, hîng eq mèbu pé lé yù mù, htoq ló luî, haú pé lé ê haq tô akô. Yhángmòq gi, dum taû lò kômù, zúm gólhum má wàng luî, haú mâ é zè pé ra-am lé le yù mù, haq tô akô nghut ri.
9 Hau htâng, yhángmòq gi, rayùq eq rayùq, “Ngá-nhúng kut nyi é hkyô gi, a jo nghut ri. Hkû-nyí gi, gabú danglù taí râ buìnyì nghut to kôle, ngá-nhúng gi, zim za nyi tô ri nhung. Maubó shoq ngá-nhúng nyi tô é ru nghut le gi, dàm byî é ngá-nhúng hui zo râ nghut lhê. Haû mù, ngá-nhúng gi, radá dâm ló luî, hkóhkâm wâng má shí hkyô lé hkyang ló shit sháng.” ga taî lhûm akô nghut ri.
10 Haû mù, yhángmòq gi, ló luî, wà hkum zúng bang lé ê wùt mù, yhángmòq lé, “Ngá-mòq gi, Aram byu pê é gyèwap má wang e é nghut lhê; haú má byu rayùq le a nyì to láng, ô é htê lé le a wó gyo nghut ri. Tuî tô é myang pé eq loze pé za nyi to láng ri; zúm pé le roq yhang jòq tô ri.” ga taî kyô akô nghut ri. 11 Hkum zúng bang gi, hkyanglù haú lé wùt taî kat é nghut mù, hkyanglù haú lé hkóhkâm wâng má shit kyo bekô nghut ri.
12 Hkóhkâm gi, myín lé toq mù, yhâng é zaugun wuì lé, “Aram byu pé mai ngá-nhúng lé hkâsu kut râ hkyô, ngò, núngmòq lé taî kyo kó lé. Yhángmòq gi, ngá-nhúng zò-mut wuìshit nyi é lé sê akô; haû mù, yhángmòq gi, ‘Teng za yhángmòq htoq lé lô râ nghut lhê; haú hkûn, ngá-nhúng gi, yhángmòq lé duì gù chyup yû mù, wà hkaû má wàng kôrâ nghut lhê.’ ga myìt yù kôluî, wàp shinggan yòso má ê haq to râ ga gyèwap mai htoq ló kô é ru nghut lhê.” ga taî ri.
13 Yhâng é zaugun wuì mâ é rayùq gi, “Haû wà hkaû má myìt tô é myang pé mâ é ngo du, byù ra-am lé àp byi aq. Byù eq myang haú pé gi, wà hkaû shî má nyi myìt gyó tô é Isira-elaq byù bànshoq bang eq le, htên byòq huî tô é Isira-elaq byu pé lhúnglhâng bang eq le, du é za nghut lhê yánmai, haú bang eq e wú kó sháng gàq.” ga tû taî ri.
14 Haû mù, yhángmòq gi, yhángmòq é myang pé eq gyèlhêng í cham lé hkyin yu akô; haû hkóhkâm hpó le, “Haû dùt nyi é lé ê wú lô keq.” ga hkunmó hkyó mù, Aram gyè pê é htâng má, yhángmòq lé nhang kat bê nghut ri. 15 Yhángmòq gi, Yodan làng jé shoq, haú bâng htâng châng ê kômù, Aram byu pé hân hân din hpang é hkûn dú pyâm to hkô é mèbu eq zè pé, hkyô htáng shoq lèq tô bum é lé myang akô nghut ri. Haû mù, lagyo haú bang gi, dum taû lò luî, hkóhkam chyáng lo shit kyô akô nghut ri. 16 Hau htâng, mingbyû wuì gi, htoq ê kômù, Aram byu pê é gyèwap lé ê hpyoq yu pyám bekô nghut ri. Haû mù, Yhûmsîng Garai taî tô é eq rajung za, nú é mún rajoí èq súm xe sum rûng kô lé le, mùk-yó gùq sum joí kô lé le, ngùn chap sum mû mai ung bekó nghut ri.
17 Hkóhkâm gi, yhang nghêhkau nyi é zaugun hpó lé, wà hkum zúng wò yù sû kut nhang tô ri; mingbyû wuì gi, wâng hkúmdong haú má yhang lé nâng pyet kô é nghut mù, yhang gi, shi byùq bê nghut ri. Haû gi, Garai Gasâng é byù Elisha é yhûm má, hkóhkâm gyó lé é hkûn, Elisha te taî tô é eq rajung za dùt byùq é nghut ri. 18 Haû dùt é gi, Garai Gasâng é byù mai hkóhkâm lé, “Nàpmá shí u lé, Samariq wà hkum má, nú é mún rajoí èq súm xe sum rûng kô lé le, mùk-yó gùq sum joí kô lé le, ngùn chap sum mû mai ung kôrâ nghut lhê.” ga taî tô é eq rajung za dik é nghut ri.
19 Zaugun hpó gi, Garai Gasâng é byù haú lé, “Wú aq, haû Yhûmsîng Garai mai mauhkûng mâ é zoshuq hkohot hkum pé hpông kat le lháng, haú hkyô wó dùt râ lhú?” ga taî é nghut ri.
Haú hkûn, Garai Gasâng é byù haû gi, “Náng é myòqjí èq yhang haú hkyô lé nàng myàng râ nghut lhê; nghut kôlhang, haú mâ é haî lé le, nàng myàng zo râ a nghut!” ga tû taî é nghut ri. 20 Dang haû eq rajung za yhang, sûwún hpó haú yùq chyáng dùt htoq bê nghut ri; hkâsu mù gâ le, mingbyû wuì gi, wâng hkúmdong má yhang lé nâng pyeq kô é nghut mù, yhang gi, shi byùq bê nghut ri.