Shunem Myiwe Myhî É Mau Lé Dum Tau Byî É Hkyô
8
Elisha gi, yhang chyungxe dum lhoqduî byî é yùqzô é yhâng nu lé, “Toq mù, náng é i-kun byu pé eq rahá, ge nyi é jang hkâmá nghut kôle, ê byam htòt nyi nyì keq. Hkâsu mù gâ le, haû Yhûmsîng Garai gi, shí mau ra-mau gón má nyhit zân yhang mùtmó gyó nhâng râ hkunmó hkyô to bê nghut ri.” ga taî ri. 2 Myiwe myhí haû gi, toq mù, Garai Gasâng é byù haû taî é eq rajung za châng kut é nghut luî, yhâng é i-kun byu pé eq rahá htoq ló mù, Hpilisiti mau má nyhit zân ê nyi nyì bê nghut ri.3 Nyhit zân byíng jáng, myiwe myhí haû gi, Hpilisiti mau mai dum taû lò mù, yhâng é yhûm eq yò pé ê dung râ ga, hkóhkam chyáng wang e ri. 4 Haú hkûn, hkóhkâm gi, Garai Gasâng é byu é duìnhâng zoshâng Gehazi eq dáng nyo nyì uchyang, “Elisha kut é múzó mó bànshoq eq séng luî, ngo lé taî kyô wú aq.” ga taî ri. 5 Haû mù, Gehazi gi, Elisha mai shi byùq bê sû lé hkâsu kut chyungxe dum lhoqduî byî é hkyô, hkóhkâm lé taî kyô nyi é u, Elisha mai yhang zo yùqzo lé chyungxe dum lhoqduî byi huî é myiwe myhí gi, yhâng é yhûm eq yò pé lé dung râ matú, hkóhkam chyáng wang lé ri.
Haú hkûn, Gehazi gi, “Ngá yhûmsîng hkóhkâm ê, ngò taî nyi é myiwe myhí gi, shí yùq nghut bê; Elisha mai chyungxe dum lhoqduî byî é yhang zo yùqzo le, shí yùq nghut ri.” ga taî ri. 6 Haú hkûn, hkóhkâm gi, haú hkyô eq séng luî myiwe myhí haú yùq lé myi jáng, myiwe myhí haû gi, hkóhkâm lé taî kyô ri.
Haû jáng, hkóhkâm gi, myiwe myhí haú yùq é hkyô eq séng luî, zaugun rayùq masàt to byi mù, haú yùq lé, “Hí lhê é, yhang eq sêng é jung hkangmó lé le, yhang htoq ló é buìnyì mai ahkuî jé shoq, yhâng é yò pé mai htoq é gùloq bànshoq lé le, dum tau byi keq.” ga taî ri.
Ben Hadat Lé Haza-ela Sat Pyâm É Hkyô
7 Elisha gi, Damasikuq wà shut e ló ri; haú u, Aram hkóhkâm Ben Hadat gi, no nyi ri. “Haû Garai Gasâng é byù gi, shí má jé nyi tô ri.” ga, hkóhkâm lé taî kyô akô nghut ri. 8 Haû jáng, hkóhkâm gi, Haza-ela lé, “Nàng, chyûnghuq yu chûng mù, Garai Gasâng é byù lé ê te yù luî, ‘Ngò, nòlì shî mai dum wó ge lò râ lhú?’ nghû, yhang dông mai haû Yhûmsîng Garai lé myî wú nhâng àq.” ga taî ri.
9 Haû mù, Haza-ela gi, Elisha lé ê tê râ ga, Damasikuq wà mó mâ é je réng é zè jung hkangmó lé chyûnghuq dông kut mù, gola-uk myi xê du má htô chûng luî, htoq e ló ri. Yhang gi, jé ê jáng, Elisha é hí má yàp mù, “Nungzo Aram hkóhkâm Ben Hadat gi, ‘Ngò, nòlì shî mai dum wó ge lo râ lhú?’ ga, ngo lé, náng chyáng lé myi nhang ri.” ga taî ri.
10 Haú hkûn, Elisha gi, “Nàng ló mù, yhang lé, ‘Nàng, teng za dum ge lò râ nghut lhê.’ nghû, ló taî kyo aq. Nghut kôle, yhang shî râ za nghut é hkyô lé, haû Yhûmsîng Garai, ngo lé tûn shit to bê nghut ri.” ga tû taî ri. 11 Elisha gi, Haza-ela gùng-yui byùq shoq wú tsuq tô ri. Hau htâng, Garai Gasâng é byù haû gi, ngaù bê nghut ri.
12 Haza-ela gi, “Ngá é yhûmsîng ê, haî mù ngau nyi lhê lhú?” ga myi jáng, Elisha gi, “Isira-elaq byu pé lé, nàng kut râ wuîhke jamjau hkyô lé, ngò sê é yánmai nghut lhê. Nàng gi, yhángmòq é gingtíng jowò pé lé nyhê pyám mù, yhángmòq é zorâm zo wuî lé, sham èq sat pyám râ nghut lhê. Zoshâng zo wuì lé, myigùng má nâng pyeq sat pyám mù, zogûng dùt é myiwe wui é wamdau lé hkoq pyám râ nghut lhê.” ga tû taî ri.
13 Haza-ela gi, “Náng é duìnhâng zoshâng gi, hkui za shèq ru nghut le nhîng, haú í kô é mú lé wó kut râ lhú?” ga taî ri.
Haú hkûn, “Nàng gi, Aram hkóhkâm dùt râ nghut lhê ga, haû Yhûmsîng Garai mai ngo lé tûn shit bê nghut ri.” ga Elisha tû taî ri.
14 Hau htâng, Haza-ela gi, Elisha chyáng mai htoq ló mù, yhâng é yhûmsîng hpô chyáng taû ló ri. Ben Hadat gi, “Nang lé Elisha haî lhom taî kat ri lhú?” ga lhom myi jáng, Haza-ela gi, “Nàng, teng za dum ge lò râ nghut lhê ga, ngo lé lhom taî kat ri.” ga tû taî ri. 15 Nghut kôlhang, htang nyí má, Haza-ela gi, htu é mè radung lé yù mù, wuì má jùm luî, hkóhkâm shi byùq shoq yhâng é myòqdong má nghop byî é nghut luî, yhâng é hkóhkâm hkô má zùng bê nghut ri.
Yudaq Hkóhkâm Yehoram É Hkyô
16 Yehoshahpat gi, Yudaq mau má hkóhkâm kut nyi é hkûn, Ahap é yhang zo Yoram Isira-elaq hkóhkâm kut é ngó zan zàn má, Yehoshahpat é yhang zo Yehoram gi, Yudaq mau má hkóhkâm kut hî bê nghut ri. 17 Yhang gi, hkóhkâm kut hi é hkûn chyungxe zànwut súm xe í zân bò bê nghut ri; yhang gi, Yerusalem wà mó má shit zân ùp ri. 18 Yhang gi, Ahap é yhang zo byìzo lé hâng yu é yánmai, Ahap é yhûmbyù wuì kut é su, Isira-elaq hkóhkâm pê é hkyô pé má châng é nghut mù, haû Yhûmsîng Garaî é myòq hí má agè ashop hkyô kut bê nghut ri. 19 Nghut kôlhang, haû Yhûmsîng Garai gi, yhâng é duìnhâng zoshâng Dawiq é myòqdong tê mù, Yudaq mau lé a lhoqhtên pyám naù nghut ri; hkâsu mù gâ le, Dawiq eq yhâng é awùt ashín pê é matú, ahtum abyùq myibung dùq nhang to râ ga danghtum htûm tô é yánmai nghut ri.
20 Yehoram é i-pyàt má, Edom byu pé gi, Yudaq mau lé gumlau toq kômù, yhûmsing é a-myû hkóhkâm lhoqtoq yu akô nghut ri. 21 Haû mù, Yehoram gi, yhâng é gyèlhêng pé bànshoq eq rahá, Zaira wà mó má e akô nghut ri. Edom byu pé gi, yhang eq yhâng é gyèlhêng zau wuî lé lhom hkyùq to kôlhang, yhang gi, myín lé zân hput cheq htoq ló bê nghut luî, yhâng é gyèzô pé le, yhûmsing é yhûm shut hpang taû ló bûm bekô nghut ri. 22 Edom mau gi, hkû-nyí jé shoq Yudaq hkóhkâm lé gumlau toq nyi akô. Haú u má, Lipna wà mó le, gumlau toq nyi ri.
23 Yehoram ùp é gótû hkyô pé eq yhang kut laî lo é hkyô bànshoq lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 24 Yehoram gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà mó má myhup yhûm pyâm é hui bê nghut ri. Haû mù, yhang zo Ahazi-a gi, yhâng é hkóhkâm hkô má zùng bê nghut ri.
Yudaq Hkóhkâm Ahazi-a É Hkyô
25 Ahap é yhang zo Yoram Isira-elaq hkóhkâm kut é raxe í zan zàn má, Yudaq hkóhkâm Yehoram é yhang zo Ahazi-a gi, hkóhkâm kut hî bê nghut ri. 26 Ahazi-a gi, hkóhkâm dùt é hkûn chyungxe zànwut í xe í zân bê nghut ri; yhang gi, Yerusalem wà mó má razàn ùp ri. Yhâng nû é myìng gi, Isira-elaq hkóhkâm Omri é yhang shu, Ahtali-a ga sû nghut ri. 27 Yhang gi, Ahap é zo-moq hpó nghut é yánmai, Ahap yhûmbyù wuì kut é hkyô má cháng luî, Ahap é yhûmbyù wuì kut é su, haû Yhûmsîng Garaî é myòq hí má agè ashop hkyô kut bê nghut ri.
28 Ahazi-a gi, Ramot Gile-at wà má, Aram hkóhkâm Haza-ela lé majan zan râ matú, Ahap é yhang zo Yoram eq rahá bo châng e ri. Haú hkûn, Aram byu pé gi, Yoram lé dàm lhom tap byi bekô nghut ri; 29 haû mù, Hkóhkâm Yoram gi, Aram hkóhkâm Haza-ela eq Ramot wà má majan zân lhûm é hkûn, Aram byu pê èq yhang lé dàm lhom tap byî é nghut mù, dàm haû lhoqge yù râ matú, Yezirela wà shut dum taû ló bê nghut ri.
Yhang gi, dàm dap to bê nghut é yánmai, Yudaq hkóhkâm nghut é, Yehoram é yhang zo Ahazi-a gi, Ahap é yhang zo Yoram lé hui râ ga, Yezirela wà shut gyó e ri.