Yehu Lé Isira-elaq Hkóhkâm Dông Sô Kat Namngón Xû Bùt Byî É Hkyô
9
Myìqhtoi Elisha gi, myìqhtoi hpúng mâ é rayùq lé ji yù mù, yhang lé, “Náng é buhîng lé, náng é hpyihit má dûn chyap àq; tsanlun xû bòng shí lé yu chûng luî, Ramot Gile-at wà shut ê àq. 2 Nàng haú má jé jáng, Nimshi é yhang shu, Yehoshahpat é yhang zo Yehu lé hô àq. Yhâng chyáng ê mù, yhâng é luzúm wui chyáng mai shuî htoq yû luî, gaû é ahkaû wàp má shuî wàng àq. 3 Hau htâng, xû bòng haú lé yù mù, yhâng é ulhum htoq má xû hut gyun luî, ‘Haû Yhûmsîng Garai shî su ga taî ri; nàng, Isira-elaq hkóhkâm kut râ matú, Ngò, nang lé sô kat namngón xû bùt byî é nghut lhê.’ gâ ri nghû taî pyô àq. Hau htâng, a nyi to lô é za, hkum hpóng mù, din htoq ló aq hkoi!” ga taî ri.4 Haû mù, myìqhtoi hpó zo haû gi, Ramot Gile-at wà shut ê bê nghut ri. 5 Yhang gi, jé e é hkûn, gyèzaû pé rahá zung nyi bùm kô é lé myàng mù, “Gyèzau hpó ê, ngò, náng é matú danglù wun lhê.” ga taî ri.
Yehu gi, “Ngá-mòq chyáng mâ é hká yùq é matú nghut lhê lhú?” ga myi jáng, yhang gi, “Gyèzau hpó ê, náng é matú nghut lhê.” ga tû taî ri.
6 Haû jáng, Yehu gi, toq mù, yhúmhkaû shut wang ló ri. Myìqhtoi hpó zo haû gi, Yehu é ulhum má xû hut gyun mù, “Isira-elaq é Garai Gasang, haû Yhûmsîng Garai shî su ga taî ri; ‘Nàng, haû Yhûmsîng Garaî é Isira-elaq byu pê é hkóhkâm kut râ matú, Ngò, nang lé sô kat namngón xû bùt byî é nghut lhê. 7 Ngò gi, Yezebela èq lhoqshun pyâm é, Ngá é duìnhâng zoshâng myìqhtoî pê é sui eq haû Yhûmsîng Garaî é duìnhâng zoshâng wuì bànshoq é sui lé, lató wó hpuq râ matú, nàng gi, náng é yhûmsîng Ahap é yhûmbyù wuì lé sat pyám râ nghut lhê. 8 Ahap é yhûmbyù wuì lhúnglhâng bang gi, htûm byùq râ nghut lhê. Ngò gi, Isira-elaq mau má nyi é, Ahap é byù wut yùqzô pé yùq hkangmó lé, jùn nghut nghut, lùt to sû nghut nghut, chyung hpyit pyám râ nghut lhê. 9 Ngò gi, Ahap é yhûm lé, Nebat é yhang zo Yerobo-am é yhûm lé su le, Ahiya é yhang zo Basha é yhûm lé su le, kut pyám râ nghut lhê. 10 Yezebela lé gi, Yezirela é maumyî má, hkuî pê èq zô pyám râ nghut mù, yhang lé myhup yhûm pyám râ byù nyì râ a nghut.’ gâ ri.” ga taî pyo ri. Hau htâng, yhang gi, hkum hpóng luî, din htoq ló bê nghut ri.
11 Yehu gi, yhâng yhûmsîng hpô é gyèzau pê chyáng htoq e é hkûn, haú bang mâ é rayùq gi, yhang lé, “Lhúnglháng haî a ra, a nghut lhí? Byù na hpó haû, haî mù náng chyáng lé ri lhú?” ga myi jáng, Yehu gi, “Núngmòq yhang, byù haú yùq lé le, yhang go ngau myhîng é lé le, sê lhê.” ga tû taî ri.
12 Haû jáng, yhángmòq gi, “Ngá-mòq a sé! Taî kyô wú aq.” ga taí kôjáng, Yehu gi, “Yhang, ngo lé shî su ga taî kyô ri; ‘Haû Yhûmsîng Garai shî su ga taî ri; nàng, Isira-elaq hkóhkâm kut râ matú, Ngò, nang lé sô kat namngón xû bùt byî é nghut lhê.’ gâ ri.” ga taî kyô ri.
13 Haû mù, yhángmòq gi, yhûmsing é buhîng lé hân hkyut yù mù, zùmhtâng htoq, Yehu é a-ô má hkang byî akô nghut ri. Hau htâng, yhángmòq gi, tut mùt luî, “Yehu gi, hkóhkâm nghut nyi rô!” ga taî garû bum akô nghut ri.
Yoram Eq Ahazi-a Lé Yehu Sat Pyâm É Hkyô
14 Haû mù, Nimshi é yhang shu, Yehoshahpat é yhang zo Yehu gi, Yoram lé gumlau haq toq bê nghut ri. (Ahkuî, Yoram eq Isira-elaq byù bànshoq bang gi, Aram hkóhkâm Haza-ela lé htuqhtîng nyì mù, Ramot Gile-at wà lé zúng nyi bum akô nghut ri. 15 Nghut kôlhang, Hkóhkâm Yoram gi, Aram hkóhkâm Haza-ela eq majan zân lhûm é má, Aram byu pê èq yhang lé dàm lhoqtap byî é mai dum lhoqge yù râ matú, Yezirela wà shut dum taû ló bê nghut ri.) Yehu gi, “Núngmòq, ngo lé hkóhkâm kut nhâng naù kô é nghut jáng, Yezirela wà má hkyanglù ê taî kyo râ matú, ó yùq lé le wà mó shî mai hkâhtoq ló nhâng kó.” ga taî ri. 16 Hau htâng, yhang gi, yhâng é gyèlhêng má dòq wàng mù, Yezirela wà shut jî e ló ri; hkâsu mù gâ le, Yoram gi, wà haú má nô yu nyi é nghut mù, Yudaq hkóhkâm Ahazi-a gi, yhang lé ê hui râ matú ê bê nghut ri.
17 Wà zúng sû rayùq gi, Yezirela wà mâchya htoq má yàp tô é hkûn, Yehu eq gyèzô pé chyâng lé lo nyi é lé myàng jáng, “Byù rahpúng lé lo nyi é lé ngò myang ri.” ga garû kat ri.
Haú hkûn, Yoram gi, “Myang ji ji sû rayùq lé ji yù mù, yhángmòq lé ê hui nhâng luî, ‘Núngmòq gi, nguì ngón râ dông lé kô é lhú?’ nghû myí nhang kat keq.” ga hkunmó hkyô ri.
18 Haû mù, myang ji ji sû gi, Yehu lé hui râ ga jî htoq ló mù, “Hkóhkâm taî le, ‘Núngmòq gi, nguì ngón râ dông lé é lhú?’ gâ ri.” ga taî ri.
Haû jáng, Yehu gi, “Nguì ngón hkyô eq nàng haî sêng lhê lhú? Ngá htâng cháng aq.” ga tû taî ri.
Wà zúng sû gi, “Lagyo hpó yhángmòq chyáng jé ê bê nghut kôlhang, yhang gi, a dum taû lò nghut ri.” ga shit kyô ri.
19 Haû mù, hkóhkâm gi, í yùq nghû râ myang ji ji sû lé dum nhang kat ri. Haú yùq le, yhángmòq chyáng ê jé mù, “Hkóhkâm taî le, ‘Núngmòq gi, nguì ngón râ dông lé é lhú?’ gâ ri.” ga taî ri.
Haû jáng, Yehu gi, “Nguì ngón hkyô eq nàng haî sêng lhê lhú? Ngá htâng cháng aq.” ga tû taî ri.
20 Wà zúng sû gi, “Yhang, yhángmòq chyáng jé ê bê nghut kôlhang, yhang gi, a dum taû lò nghut ri. Lhêng kon sû gi, Nimshi é yhang zo Yehu su dùt ri; yhang gi, byù na su kôn nyi ri.” ga shit kyô ri.
21 Haû jáng, Yoram gi, “Ngá é gyèlhêng lé buí keq.” ga hkunmó hkyô ri; gyèlhêng lé ban buí kôjáng, Isira-elaq hkóhkâm Yoram eq Yudaq hkóhkâm Ahazi-a gi, ó le ô é gyèlhêng má ji mù, Yehu lé ê hui râ matú jî htoq e ló bekô nghut ri. Yhángnhik gi, Yezirela byù Nabot é maumyî má Yehu lé huî akô nghut ri. 22 Yoram gi, Yehu lé myàng jáng, “Yehu ê, nàng gi, nguì ngón râ dông lé é lhú?” ga myî ri.
Haú hkûn, Yehu gi, “Náng nu Yezebela châng é hparà noq hkyô eq mhántán lòklèq kut é hkyô bànshoq ru jòq to to gi, hkâsu kut wó nguì ngón râ lhú?” ga tû taî ri.
23 Haû mù, Yoram gi, lhik hpâng luî, Ahazi-a lé, “Ahazi-a ê, gumlau toq é mû nghut bê ô!” ga taî garû ri.
24 Haú hkûn, Yehu gi, yhâng é lai lé wum kat lâng htûng mù, Yoram é gòpjì gyoro má bìk kat é nghut luî, myoshi gi, yhâng é nhiklhum má hkyang ròt bê nghut é yánmai, yhang gi, yhâng é gyèlhêng htoq má shi lêng gòp to bê nghut ri. 25 Yehu gi, yhâng é gyèlhêng kon zau Bitka lé, “Yhâng é màng lé wàq yù luî, Yezirela byù Nabot sing é yòso má ê dú lheq pyám aq. Nàng eq ngò gi, yhâng wa Ahap é htâng má gyèlhêng bo jî é hkûn, haû Yhûmsîng Garai mai shî su ga myìqhtoi dang taî é lé myìtbun aq; haû gi, 26 ‘Haû Yhûmsîng Garai shî su ga taî pyo ri; anyí-nap, Ngò, Nabot é sui lé le, yhang zô pê é sui lé le, myang ri; haû mù, Ngò gi, gè gè yhang, maumyî shí jàp htoq má nanga lé lató hpuq râ nghut lhê.’ gâ é nghut ri. Haû mù, ahkuî, Yhûmsîng Garaî é dang eq rajung za, Yoram é màng lé wàq yù luî, maumyî haú jàp má ê dú lheq pyám aq.” ga taî ri.
27 Yudaq hkóhkâm Ahazi-a gi, dùt htoq é hkyô lé myàng jáng, Bet Haganb wà hkyô shut toq hpâng bê nghut ri. Yehu gi, yhang lé châng hkat mù, “Yhang lé le sat pyám keq!” ga garû kat ri. Haû jáng, yhángmòq gi, Ahazi-a lé, Ibalam wà nàm mâ é Gura shut dòq ló é hkyô má, yhâng é gyèlhêng htoq má yhang dàm tap byi bekô nghut ri. Nghut kôlhang, yhang gi, Megido wà má hpang jé ló mù, haú má shi byùq bê nghut ri. 28 Yhâng é duìnhâng zoshâng wuì gi, yhâng màng lé gyèlhêng mai Yerusalem wà mó má htô ló kômù, Dawiq é Wà mâ é yhâng é lùp má, yhâng é îchyí îwâ pé eq rahá myhup yhûm pyám bekô nghut ri. 29 (Ahap é yhang zo Yoram hkóhkâm kut é raxe razàn má, Ahazi-a gi, Yudaq hkóhkâm dùt bê nghut ri.)
Yezebela Sat Pyám Huî É Hkyô
30 Hau htâng, Yehu gi, Yezirela wà má ló jé ri. Yezebela gi, haú hkyô lé wó gyo jáng, yhâng é myòqxâm má chi but pyám mù, uxâm lé mhôn pyám luî, hkohot mai wú nyi ri. 31 Haû mù, yhang gi, wàhkum má Yehu wang lò jáng, “Yhûmsîng hpó lé sat pyám sû Zimri su nghut sû ê, nàng gi, nguì ngón râ dông lé é lhú?” ga myî ri.
32 Yehu gi, hkohot haú shut tu wú kat mù, “Ngá htâng dàp é ó yùq nghut lhê lhú? Ó yùq lhú?” ga garû taî kat jáng, u-nuk í sum yuq, yhang lé wú kat akô nghut ri. 33 Yehu gi, “Yhang lé, dûn hpyit hkyô kat keq!” ga taí jáng, yhángmòq gi, yhang lé dûn hpyit hkyô kat bekô nghut mù, yhâng é sui pé gi, yhûm xêwâm má le, myang pê chyáng le záng gyun bê nghut mù, myang pé gi, yhang lé nâng pyeq bê nghut ri.
34 Yehu gi, wang ló mù, zo zo shuq shuq kut luî, “Dakâm huî é myiwe myhí haú lé ê gùq myhup pyám keq; hkâsu mù gâ le, yhang gi, hkóhkam é byìzo nghut ri.” ga taî ri. 35 Nghut kôlhang, yhang lé myhup yhûm pyám râ ga htoq e bùm kô é hkûn, yhángmòq gi, yhâng é ugyap eq lòq hkyî pé mai lai luî, haî lé le a myàng kó nghut ri. 36-37 Haû mù, yhángmòq gi, taû ló luî, Yehu lé ló shit kyô akô nghut ri. Haú hkûn, Yehu gi, “Hkuî pé gi, Yezirela maumyî má Yezebela é sho lé zô pyám kôrâ nghut lhê; ‘Shî gi, Yezebela é nghut ri.’ ga ó yùq le a wó taí loshoq, Yezebela é màng gi, Yezirela maumyî mâ é yò rajàp má hkyi hpún su dùt byùq râ nghut lhê ga, haû Yhûmsîng Garaî é duìnhâng zoshâng Tishibi byù Eliya dông, haû Yhûmsîng Garai taî é dang dìk byùq é nghut ri.” ga taî ri.