Ahap É Awùt Ashín Pé Sat Pyám Huî É Hkyô
10
Ahkuî, Ahap é yhang zo yùqzô pé nyhit xê yùq gi, Samariq wà má nyi akô. Haû mù, Yehu gi, Yezirela wà mâ é zaugun wui chyáng le, sûwún wuî eq Ahap é yhang zô pé lé wú gon bâng chyáng le, laiká pé ká luî, Samariq wà shut hun kat ri. Yhang taî é gi, 2 “Núngmòq chyáng, núngmòq é yhûmsîng hpô é yhang zo yùqzô pé nyi é htoq agó, gyèlhêng pé eq myang pé, gingtîng é wà mó eq majan chûng gyèzè pé jòq akô. Ahkuî, laiká shî núngmòq chyáng jé eq yhang, 3 núngmòq é yhûmsîng hpô é yhang zo yùqzô pé mâ é je ge é eq je hpau dap é sû lé hkyîn mù, yhâng wâ é hkóhkâm tángmyhâng má zùng nhâng keq. Hau htâng, núngmòq é yhûmsîng hpô é a-myu é matú majan zan keq.” gâ ri.4 Nghut kôlhang, yhángmòq gi, gyùq nán byùq bùm kômù, “Hkóhkâm í yùq lháng, Yehu é hí má a wó yàp ging kô é nghut le gi, ngá-mòq hkâsu kut wó yàp ging râ lhú?” ga taî akô nghut ri.
5 Haû mù, hkóhkâm wâng ùp sû, wà ùp zau hpó, nhik bô sûwún wuî eq hkóhkam é yhang zô pé lé wú gon bang gi, Yehu chyáng shî su ga danglù hun kat akô; “Ngá-mòq gi, náng é duìnhâng zoshâng wuì nghut lhê mù, nàng taî é jung hkangmó lé ngá-mòq kut râ nghut lhê. Ngá-mòq gi, ó lé le hkóhkâm kut nhâng râ a nghut; nàng myìt ô nau é haî nghut kôle, kut àq.” gâ ri.
6 Haú hkûn, Yehu gi, yhángmòq chyáng, “Núngmòq gi, ngá é hkyam shut bò mù, ngá é dang lé gyo kôrâ nghut jáng, núngmòq é yhûmsîng hpô é yhang zo yùqzô pê é ulhum pé lé hpyit chûng mù, nàpmá shí u lé, Yezirela wà má ngá chyáng lé lô keq.” ga, í dâm nghû râ laiká kâ hun kat ri.
Hkóhkâm zô pé nyhit xê yùq haú bang gi, yhángmòq lé shuî kô lo é, wà mâ é ushuq wuî eq rahá nyi tô bum akô nghut ri. 7 Laiká haû jé jáng, yhángmòq gi, hkóhkâm zô pé nyhit xê yùq gón lé chyup yû mù, sat pyám bekô nghut ri. Yhángmòq gi, haú bâng é ulhum pé lé kyáng má kat luî, Yezirela wà má nyi é Yehu chyáng dé kat byî akô nghut ri. 8 Haû lagyo hpó gi, jé lé mù, Yehu lé, “Yhángmòq gi, hkóhkâm zô pê é ulhum pé lé yu lé lo akô nghut ri.” ga taî kyô ri.
Haú jáng, Yehu gi, “Haú pé lé, wà wàng hkum má í bûm bùm luî, nàpkyó jé shoq tô tô keq.” ga hkunmó hkyô ri.
9 Yehu gi, htang nàpkyó htoq ê luî, shiwa byù bànshoq bâng é hí má yàp to mù, “Núngmòq gi, mara a bò kó. Ngò shèq, ngá é yhûmsîng hpó lé gumlau toq mù, sat pyâm é ru nghut lhê; nghut kôlhang, shí bang bànshoq lé gi, ó sat pyâm é lhú? 10 Ahap é yhûm eq séng luî haû Yhûmsîng Garai taî htuqhtîng tô é dang rahkun lháng byòq byùq râ a nghut é hkyô lé, sé keq. Haû Yhûmsîng Garai gi, yhâng é duìnhâng zoshâng Eliya dông taî tô é eq rajung za, lhoqdìk bê nghut ri.” ga taî ri. 11 Haû mù, Yehu gi, Ahap yhûm mâ é, Yezirela wà má nyi myìt gyó tô é yùq hkangmó lé le, yhâng é zaugun wuì bànshoq bang lé le, yhâng é buìnùm luzúm wuî eq yhâng é hkyangjông pé lé le, rayùq lháng a myhit to loshoq, lhúnglháng sat pyám bê nghut ri.
12 Hau htâng, Yehu gi, toq mù, Samariq wà shut htoq e ló bê nghut ri. Yhang gi, hkyô má, Sau Zúng Bâng é Saumaú Wùq Jowò gâ é jang má jé jáng, 13 Yudaq hkóhkâm Ahazi-a é buìnùm wuì ra-am eq hui mù, “Núngmòq gi, ô pé nghut akô lhú?” ga myî ri.
Haú hkûn, yhángmòq gi, “Ngá-mòq gi, Ahazi-a é buìnùm gu-mang wuì nghut lhê; hkóhkâm eq hkóhkam é yhâng nû é yhûmbyù wuì lé hui râ matú, gyó lé lo é nghut lhê.” ga taî akô nghut ri.
14 Yehu gi, “Haú bang lé duì gù chyup yû keq!” ga hkunmó hkyô ri. Haû mù, yhángmòq gi, haú bang lé duì gù chyup yû luî, Saumaú Wùq Jowò nàm mâ é wuì dong má, haú bang myí xe í yùq lé sat kat pyám bekô nghut ri. Rayùq lé lháng a myhit to lo nghut ri.
15 Yehu gi, haú mai htoq ló é htâng, yhang lé te yù râ ga htoq lé lo é, Rehkap é yhang zo Yehonadap eq huî nyò mù, “Ngá é i-myìt nhiklhum gi, nàng eq rahá nghut nyi é su, náng é i-myìt nhiklhum gi, ngò eq rahá nghut nyi lhê lhú?” ga taî ri.
Yehonadap gi, “Rahá nghut nyi lhê.” ga tû taî ri.
Yehu gi, “Haû nghut jáng, náng é lòq ngá shut lhâm kat àq.” ga taî ri. Haû mù, yhang gi, lòq lhâm kat é nghut luî, Yehu gi, gyèlhêng hkaû shut yhang lé lâng toq yû bê nghut ri. 16 Hau htâng, Yehu gi, “Ngò eq rahá cháng mù, haû Yhûmsîng Garaî é matú ngò hkâ-í myìt zùq é lé, lé wú aq.” ga taí mù, yhâng é gyèlhêng má yhang lé ji nhâng bê nghut ri.
17 Yehu gi, Samariq wà má jé jáng, haú má myìt gyó tô é Ahap é yhûmbyù wuì bànshoq bang lé sat pyám bê nghut ri; yhang gi, haû Yhûmsîng Garai mai Eliya dông taî tô é dang eq rajung za, haú bang lé chyut sat pyám é nghut ri.
Balaq É Duìnhâng Zoshâng Wuì Sat Pyám Huî É Hkyô
18 Hau htâng, Yehu gi, mingbyû bànshoq lé zùp zing nhâng mù, yhángmòq lé, “Ahap gi, Balaq hparà lé ra-tsuí za dójaú kôlhang, Yehu gi, yhâng htoq je dójaú râ nghut lhê. 19 Haû mù, Balaq hpara é myìqhtoî pé bànshoq lé le, yhâng é duìnhâng zoshâng bànshoq eq yhâng é hkyangjông pé bànshoq lé le, ji tsing keq. Rayùq lé lháng hkâ-myhit hkyô to kó; hkâsu mù gâ le, ngò gi, Balaq hparà é matú, hkungga mó nhông byi râ nghut lhê. A lé bo lom é sû ó yùq nghut kôle, chyungxe wó dui nyì râ a nghut.” ga taî ri. Nghut kôlhang, Yehu gi, Balaq hparà é duìnhâng zoshâng wuì bànshoq lé wó sat kyop pyám râ matú, shí hkyô mhaû kut é nghut ri.
20 Dum, Yehu gi, “Balaq hparà lé hkúngga hpautap râ zùphpong ralhum jì keq.” ga taî ri. Haû mù, yhángmòq gi, haú hkyô lé taî pyô bekô nghut ri. 21 Hau htâng, Yehu gi, Isira-elaq ra-mau gón jàm shoq dang kyô kat é nghut mù, Balaq hpara é duìnhâng zoshâng wuì bànshoq gi, rayùq lháng a nyi gyó byùq é za lé bum akô nghut ri. Yhángmòq gi, Balaq hparà noqkuq yhûm ahkaû má hé hkyam mai shí hkyam byíng muî shoq zùp zîng tô bùm bekô nghut ri. 22 Dum, Yehu gi, mèbu kat wàp ùp lé, “Balaq hpara é duìnhâng zoshâng wuì bànshoq é matú, buhîng yu lé byi aq.” ga taí jáng, yhang gi, haú bâng é matú buhîng yu htoq lé byi bê nghut ri.
23 Hau htâng, Yehu eq Rehkap é yhang zo Yehonadap gi, Balaq hparà noqkuq yhûm má wang e akô. Yehu gi, Balaq é duìnhâng zoshâng wuì lé, “Shí jowò má, Balaq hpara é duìnhâng zoshâng wuì baú nghut râ lhê; haû Yhûmsîng Garai lé noqkuq é rayùq le a bo to loshoq, rago chôm jep wú keq.” ga taî ri. 24 Haû mù, Yehu eq Yehonadap gi, shigu hkungga pé eq myi nyhé hkungga pé nhông byi râ matú wang akô. Yehu kúm gi, hparà yhûm shinggan má byù shit xê yùq nyhi to mù, “Ngò, núngmòq é lòq má àp byî tô é byù mâ é rayùq yùq lé lhoqlhut kat é nghut jáng, lhoqlhut kat é sû gi, lùt ló byùq su é gùnglik dông chyungxe sum râ nghut lhê.” ga, sidìq byî to bê nghut ri.
25 Yehu gi, myi nyhé hkungga ban nhông eq yhang, zúng bang eq zaugun wuì lé, “Wàng mù, yhángmòq lé sat pyám keq; rayùq lé lháng hkâ lhoqlhut kat kó.” ga hkunmó hkyô ri. Haû mù, zúng bang eq zaugun wuì gi, sham èq haú bang lé sat pyám luî, màng pé lé shinggan shut hkyom dú pyám kômù, Balaq hparà noqkuq yhûm ahkaû wàp shut wàng bekô nghut ri. 26 Yhángmòq gi, Balaq hparà noqkuq yhûm mâ é chyoiyúng lùqzìng lé yù mù, nyhê pyâm akô. 27 Hau htoq agó, yhángmòq gi, Balaq hpara é chyoiyúng lùqzìng lé lhoqhkyop pyám luî, Balaq hparà noqkuq yhûm lé hpyoq hpyi pyám kô é nghut mù, shiwa byu pé gi, jowò haú lé hkû-nyí jé shoq nghê ê jang kut pyám bekô nghut ri.
28 Haû mù, Yehu gi, Isira-elaq mau má, Balaq hparà noq é hkyô lé lhoqhtên pyám bê nghut ri. 29 Nghut kôlhang, Yehu gi, Isira-elaq byu pé lé mara kut shut nhang é Nebat é yhang zo Yerobo-am é yubàk mara nghut é Behtela eq Dan wà má tô tô é hîng no zo alhô pé lé noqkuq é lé a koi pyám shi nghut ri.
30 Haû Yhûmsîng Garai gi, Yehu lé, “Nàng gi, Ngá é myòq hí má tengmán é dông rago kut bê nghut é yánmai le, Ngò, Ahap é yhûmbyù wuì lé kut nau nyi é hkyô bànshoq lé kut bê nghut é yánmai le, náng é awùt ashín pé gi, byùxik myi xik jé shoq, Isira-elaq é hkóhkâm tángmyhâng má zùng kôrâ nghut lhê.” ga taî ri. 31 Nghut kôlhang, Yehu gi, yhâng é i-myìt nhiklhum bànshoq èq, Isira-elaq é Garai Gasang, haû Yhûmsîng Garaî é târâ lé rago a châng é htoq agó, Isira-elaq byu pé lé mara kut shut nhang é Yerobo-am é yubàk mara lé le a koi pyám nghut ri.
32 Haú ayòq abun má, Yhûmsîng Garai gi, Isira-elaq maumyî lé lhoqchyap ló nhâng bê nghut mù, Haza-ela gi, Isira-elaq lé ùp sing ló bê nghut luî, 33 Yodan làng buìhtoq hkyam, Gile-at mau bànshoq nghut é, Gat, Rubin eq Manase mau gón lé le, Arinon langhkaû nàm mâ é Aro-era wà mai, Gile-at eq Bashan mau gón jé shoq lé le, ùp sing yù bê nghut ri.
34 Yehu ùp é gótû hkyô pé lé le, yhang kut laî lo é hkyô bànshoq lé le, yhang wó ûngmyuq é hkyô bànshoq lé le, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí?