2 Hkóhkâm 11

Ahtali-a Eq Yo-ashi

Ahazi-a é yhâng nu Ahtali-a gi, yhang zo shi byùq bê hkyô lé myàng jáng, yhang zo hkóhkam é i-kun byù lhúnglháng lé toq sat pyám nhâng bê nghut ri. 2 Nghut kôlhang, Hkóhkâm Yehoram é yhang zo byìzo eq Ahazi-a é yhang gu nghut sû, Yehosheba gi, Ahazi-a é yùqzo Yo-ashi lé, sat pyám hui râ nghut é hkóhkâm zô pê chyáng mai hkaû bún yû mù, Ahtali-a chyáng mai Yo-ashi lé wó haq to râ matú, yhang lé wú gon sû eq rahá, yhup wàp hkaû má haq nyhi tô ri; haû mù, yhang gi, sat pyâm é a hui nghut ri. 3 Haú mau má Ahtali-a ùp nyi é u lé, Yo-ashi gi, yhâng é wú gon sû eq rahá, haû Yhûmsîng Garaî é noqkuq yhûm má hkyuq zân haq nyi tô ri.

4 Nghut kôlhang, nyhit zân nghû râ zàn má, Yehoi-ada gi, shô ùp gyèzaû pé, chyungxe zúng gyèzô pé eq hkóhkâm wâng zúng gyèzô pé lé ê ji yù mù, haû Yhûmsîng Garaî é noqkuq yhûm má, haú bang lé yhâng chyáng shuî lò nhang ri. Yhang gi, Yhûmsîng Garaî é noqkuq yhûm má, yhángmòq eq dangshikaq ralhum to mù, yhángmòq lé dakâm nhang ri. Hau htâng, yhang gi, yhángmòq lé, hkóhkam é yhang zo tûn shit bê nghut ri. 5 Yhang gi, yhángmòq lé, “Núngmòq kut râ múzó shí dông nghut lhê; Bánno Buìnyì má wò yù râ matú byù sum hpúng hkyó mù, wò âng é hpúng mâ é rahpúng gi, hkóhkâm yhûm lé zúng, 6 rahpúng gi, Sura hkum lé zúng, rahpúng gi, zúng bâng é nùnghtáng mâ é hkum lé zúng kut keq; haû jáng, núngmòq gi, noqkuq yhûm lé zúng lhing to bê nghut ri. 7 Bánno Buìnyì má wò a yù âng é gótû í hpúng gi, haû Yhûmsîng Garaî é noqkuq yhûm má, hkóhkâm lé zúng nyi bùm kôrâ nghut lhê. 8 Yùq hkangmó gi, yhûmsing é lòq má shâm lhâm chung to mù, hkóhkam é lhînghkyùq má zúng to keq; núngmòq wò âng u wang lo é ó yùq nghut kôle, sat pyâm é hui ra râ nghut lhê. Hkóhkâm hpó htoq ló wang lò kut é hkûn, htèp châng zúng keq.” ga hkunmó hkyô ri.

9 Haû mù, shô ùp gyèzaû pé gi, hkyangjong Yehoi-ada hkunmó hkyô é eq rajung za, kut bekô nghut mù, yùq hkangmó gi, yhûmsîng eq sêng é, Bánno Buìnyì má mú âng é bang, mú a âng é bang lé shuî yù mù, hkyangjong Yehoi-ada chyáng shuî lé akô nghut ri. 10 Haû jáng, hkyangjong hpó gi, gyèzaû pé lé, haû Yhûmsîng Garaî é noqkuq yhûm má kat tô é eq Hkóhkâm Dawiq eq sêng é, lhâm pé eq gòlong pé tsing àp byî ri. 11 Haû mù, zúng bang gi, yhûmsing é shâm lhâm lé chûng mù, hkungga gyàp eq noqkuq yhûm nàm má, noqkuq yhum é mautsûng hkyam mai maupyî hkyam jé shoq, hkóhkam é lhînghkyùq zúng yàp tô bum akô nghut ri.

12 Haú hkûn, Yehoi-ada gi, hkóhkam é yhang zo haú lé shuî htoq lô mù, hkóhkâm mùq tsung byi luî, dangshikaq laiká àp byi mù, yhang lé hkóhkâm ga taî pyô luî, yhang lé namngón xû bùt byî ri. Haû mù, shiwa byu pé gi, lòqpyuq chôm bàt mù, “Hkóhkâm chyung hîng xê hing nyì sháng gàq ô!” ga garû bum akô nghut ri.

13 Ahtali-a gi, zúng bang eq shiwa byu pê é garu garín htê lé wó gyo jáng, haû Yhûmsîng Garaî é noqkuq yhûm má nyi é shiwa byu pê chyáng ê jé ri. 14 Yhang wú kat le, htûngli jòq é eq rajung za, zìng nàm má hkóhkâm yàp tô é lé le, hkóhkam é nàm má zaugun wuì eq tut mùt bang nyi tô é lé le, mingbyû wuì bànshoq bang gabú byam chyû nyi é eq tut mùt nyi bùm kô é lé le, myang ri. Haú hkûn, Ahtali-a gi, yhâng é buhîng lé lâng cheq pyám mù, “Gumlau toq bê ô! Gumlau toq bê ô!” ga wùt garû ri.

15 Hkyangjong Yehoi-ada gi, gyè hpúng pé lé wú gôn nyi é, shô ùp gyèzaû pé lé, “Yhang lé, zúng bâng é gyoro mai shuî htoq yû mù, yhâng htâng châng é sû ó yùq lé le, sham èq sat pyám keq.” ga hkunmó hkyô ri. Hkâsu mù gâ le, “Yhang gi, haû Yhûmsîng Garaî é noqkuq yhûm má sat pyâm é ge hui râ a nghut.” ga haû hkyangjong hpó taí bê yánmai nghut ri. 16 Haû mù, yhángmòq gi, yhang lé chyup yû luî, hkóhkâm wâng má myang pé wang é jowò má jé jáng, yhang lé haú má sat pyám bekô nghut ri.

17 Yehoi-ada gi, hkóhkâm eq shiwa byu pé lé, Yhûmsîng Garaî é byu pé dùt râ matú, haû Yhûmsîng Garai eq yhángmòq é gyoro má dangshikaq tó nhang ri. Hau htoq agó, yhang gi, hkóhkâm eq shiwa byu pê é gyoro má le, dangshikaq tó nhang ri. 18 Mingbyû wuì bànshoq bang gi, Balaq hparà yhûm shut ê mù, haú lé hpyoq hpyi pyâm bekô nghut ri. Yhángmòq gi, hkungga gyàp pé eq hparà azòng pé lé le bàt mhun pyám kôluî, Balaq hpara é hkyangjong Matan lé le, hkungga gyàp pê é hí má sat pyâm akô nghut ri.

Hau htâng, hkyangjong Yehoi-ada gi, Yhûmsîng Garaî é noqkuq yhûm má zúng râ gyèzô pé nyhi to bê nghut ri. 19 Yhang gi, yhang eq rahá, shô ùp gyèzaû pé, chyungxe zúng gyèzô pé, hkóhkâm wâng zúng gyèzô pé eq mingbyû wuì bànshoq bang lé ji yù mù, yhángmòq bànshoq bang rahá, haû hkóhkâm lé Yhûmsîng Garaî é noqkuq yhûm mai shuî gyó lô mù, hkóhkâm wâng zúng gyèzô pé nyi é hkum mai, hkóhkâm wâng shut wang ló akô. Haû mù, hkóhkâm gi, hkóhkâm tángmyhâng htoq má yhâng é jowò yù bê nghut ri. 20 Mingbyû wuì bànshoq bang gi, gabú byam chyû bum akô; wà haû gi, hkóhkâm wâng má Ahtali-a lé sham èq sat pyám bê nghut é yánmai, zim za dùt byùq bê nghut ri.

21 Yo-ashi gi, hkóhkâm kut hi é hkûn, chyungxe zànwut nyhit zân bò bê nghut ri.