Yo-ashi Noqkuq Yhûm Saî Saî É Hkyô
12
Yehu hkóhkâm kut é nyhit zan zàn má, Yo-ashi gi, hkóhkâm dùt mù, Yerusalem wà mó má myi xê zàn ùp ri. Yhâng nû é myìng gi, Zibi-a gâ ri; yhang gi, Berasheba wà mâ é nghut ri. 2 Yo-ashi gi, hkyangjong Yehoi-ada mai yhang lé mhoq kyô é zànwut pé bànshoq, haû Yhûmsîng Garaî é myòq hí má jo têng é hkyô kut bê nghut ri. 3 Nghut kôle, myhang é hparà noq jowò pé lé gi, a huî sêng pyâm é nghut mù, shiwa byu pé gi, haú jowò má, shigu hkungga pé xoq nhông byi mù, namngón hkungga nyhê nhông byî nyi akô nghut ri.4 Yo-ashi gi, hkyangjông pé lé, “Haû Yhûmsîng Garaî é noqkuq yhûm má chyoi yúng é hkungga pé dông yu lé é ngùn bànshoq nghut é, myìng jihpán gùq é hkûn hkyui yu é ngùn, dâkam bum é mai tsing hàp yu tô é ngùn eq yhûmsing myìt mai haû noqkuq yhûm má yu lé é ngùn pé lé tsîng to keq. 5 Hkyangjong yùq hkangmó gi, sùt zum bâng chyáng mâ é rayùq yùq chyáng mai ngùn hàp yù mù, noqkuq yhûm mâ é htên byòq byùq é jowò hkâ lé le saî saí râ má chûng keq.” ga taî ri.
6 Nghut kôlhang, Yo-ashi hkóhkâm kut é í xe súm zan zàn jé shoq, hkyangjông pé gi, noqkuq yhûm haú lé a saî saí shi kó nghut ri. 7 Haû mù, Hkóhkâm Yo-ashi gi, hkyangjong Yehoi-ada eq gótû hkyangjông pé lé ji yù mù, yhángmòq lé, “Noqkuq yhûm má htên byòq byùq é jowò pé lé haî mù a saî saí kô é lhú? Sùt zum bâng chyáng mai ngùn ge yu jàt râ a nghut lo; nghut kôlhang, ahkuî mai noqkuq yhûm saî saí râ matú ngùn tsing àp byi keq.” ga taî ri. 8 Hkyangjong haú bang gi, shiwa byu pê chyáng mai ngùn a gùq jàt lo râ matú le, noqkuq yhûm lé yhángmòq yhang a saî saí râ matú le, myìt hui bekô nghut ri.
9 Hkyangjong Yehoi-ada gi, sidèk ralhum yù mù, hau é a-myhi má dong htong luî, haû Yhûmsîng Garaî é noqkuq yhûm ahkaû shut wang é, lòqyò hkyam mâ é hkungga gyàp nàm má tô tô ri. Wang é hkum zúng é hkyangjông pé gi, haû Yhûmsîng Garaî é noqkuq yhûm má yu lé é ngùn bànshoq lé, sidèk haú má kat tô akô nghut ri. 10 Sidèk haú má ngùn myo myo bo é lé yhángmòq myàng hkangmó, hkóhkam é kâ xûm sû eq hkyangjong mó le mù, haû Yhûmsîng Garaî é noqkuq yhûm má yu to bê é ngùn lé nghap luî, htûng pé má tsing kat tô akô nghut ri. 11 Hau htâng, yhángnhik gi, gam hkoq ge to bê nghut é ngùn lé, noqkuq yhûm má múzó wú gôn é bang lé byî é nghut mù, yhángmòq gi, hau èq, Yhûmsîng Garaî é noqkuq yhûm má mú zui bang nghut é, làksima pé eq yhûm saí bang lé le, 12 tsohtung ge saí bang eq lùqgòk hkoq bang lé le tsing byî ri. Yhángmòq gi, haû Yhûmsîng Garaî é noqkuq yhûm dum saî saí râ matú, sik eq kyûng yúng tô é lùqgòk htung pé lé le wuì mù, noqkuq yhûm haú má saî hpô râ má gyó âng é gótû bànshoq má le chung akô nghut ri.
13 Nghut kôlhang, noqkuq yhûm má yu lé é ngùn lé gi, haû Yhûmsîng Garaî é noqkuq yhum é matú nghut é, ngùn lànghkang zô pé, nyàp pé, hkoq mó pé, tut pé eq gótû hîng zè ngùn zè pê é matú a chûng kó nghut ri. 14 Haû noqkuq yhûm saî saî é má chung jai é, mú zui bang lé shèq àp byî é nghut ri. 15 Haû mú zui bang lé byi râ matú ngùn hàp yu to byî é hui bang gi, hkyak lhumzui bang nghut é yánmai, yhángmòq lé jihpán a dung kó nghut ri. 16 Haû mara hpyî hkungga pé eq mara hkyut hkungga pé mâ é ngùn lé gi, haû Yhûmsîng Garaî é noqkuq yhûm má a yu wàng kó nghut ri. Haú pé gi, hkyangjông pé eq sêng é nghut ri.
17 Haú yòq má, Aram hkóhkâm Haza-ela gi, dòq ê mù, Gahta wà lé majan ê zân ung yù bê nghut ri. Hau htâng, yhang gi, Yerusalem wà mó lé htim râ matú taû lo ri. 18 Nghut kôlhang, Yudaq hkóhkâm Yo-ashi gi, yhâng é hí má ùp laî lo é Yudaq hkóhkâm Yehoshahpat, Yehoram eq Ahazi-a pé mai àp nhong tô é chyoiyúng zè bànshoq lé le, yhang yhang àp nhong tô é chyûnghuq pé lé le, haû Yhûmsîng Garaî é noqkuq yhûm eq hkóhkâm wâng mâ é sùtdò pé má myang ho é hîng bànshoq lé le, yù mù, Aram hkóhkâm Haza-ela chyáng dé kat ri. Haû mù, Haza-ela gi, Yerusalem wà mó lé lhaî to hkó bê nghut ri.
19 Yo-ashi ùp é gótû hkyô pé eq yhang kut laî lo é hkyô bànshoq lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 20 Yhâng é zaugun wuì gi, yhang lé gumlau haq toq kômù, Sila shut gyó ló é hkyô mâ é Bet Milo má yhang lé sat pyâm akô nghut ri. 21 Yhang lé sat pyâm é zaugun wuì gi, Shime-at é yhang zo Yozabat eq Shomera é yhang zo Yehozabat nhik nghut akô. Yhang gi, shi byùq bê nghut mù, yhâng é îchyí îwâ pé eq rahá, Dawiq é Wà má myhup yhûm pyâm é hui bê nghut ri. Haû mù, yhang zo Amazi-a gi, yhâng é hkóhkâm hkô má zùng bê nghut ri.