Isira-elaq Hkóhkâm Yeho-ahaza
13
Yudaq hkóhkâm Ahazi-a é yhang zo Yo-ashi hkóhkâm kut é í xe sum zan zàn má, Yehu é yhang zo Yeho-ahaza gi, Samariq wà má Isira-elaq hkóhkâm dùt mù, raxe nyhit zân ùp ri. 2 Yhang gi, Isira-elaq byu pé lé mara kut shut nhang é Nebat é yhang zo Yerobo-am é yubàk mara hkyô má cháng luî, haû Yhûmsîng Garaî é myòq hí má agè ashop hkyô kut mù, haú hkyô pé mai a taû lhing lò nghut ri. 3 Haû mù, Yhûmsîng Garai gi, Isira-elaq byu pé lé nhikmó-yo bê nghut mù, Aram hkóhkâm Haza-ela eq yhang zo Ben Hadat lòq má ayòq abun myáng myáng àp pyám bê nghut ri.4 Haû mù, Yeho-ahaza gi, haû Yhûmsîng Garai lé wùt dûng é nghut mù, haû Yhûmsîng Garai gi, yhang lé gyo byi bê nghut ri; hkâsu mù gâ le, Isira-elaq byu pé lé Aram hkóhkam èq htân htân zìk zô nyi é hkyô lé, Yhûmsîng Garai yhang myàng mù nghut ri. 5 Haú hkûn, haû Yhûmsîng Garai gi, Isira-elaq byu pê é matú, hkyi yù râ sû rayùq nhâng byî é nghut mù, yhángmòq gi, Aram byu pê é lòq mai wó lùt bekô. Haû mù, Isira-elaq byu pé gi, hí lhê su ó le ô é yhûm má myang nyì bekô nghut ri. 6 Nghut kôlhang, yhángmòq gi, Isira-elaq byu pé lé mara kut shut nhang é Yerobo-am é yhûmbyù wui é yubàk mara lé a tô pyám kó nghut ri; yhángmòq gi, haú hkyô pé lé xoq châng nyì kô é htoq agó, Ashera hparà zìng le, Samariq wà má ru jòq tô ashî nghut ri.
7 Aram hkóhkam gi, gótû Isira-elaq gyèzô pé lé, chyârâng mâ é hpuílhup lé su lhoqhtên mhun pyâm é yánmai, Yeho-ahaza é gyè hpúng má, myang ji jî é sarhê ngo xê yùq, gyèlhêng raxê cham eq hkyî so gyèzô pé ra-mun mai lai luî, haî le a myìt to lo nghut ri.
8 Yeho-ahaza ùp é gótû hkyô pé eq yhang kut laî lo é hkyô bànshoq eq yhang wó ûngmyuq é hkyô pé lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 9 Yeho-ahaza gi, yhâng é îchyí îwâ pé eq rahá bánnô byùq bê nghut mù, Samariq wà má myhup yhûm pyâm é hui bê nghut ri. Haû mù, yhang zo Yeho-asha gi, yhâng é hkóhkâm hkô má zùng bê nghut ri.
Isira-elaq Hkóhkâm Yeho-asha
10 Yudaq hkóhkâm Yo-ashi hkóhkâm kut é súm xe nyhit zan zàn má, Yeho-ahaza é yhang zo Yeho-asha gi, Samariq wà má Isira-elaq hkóhkâm dùt mù, raxe hkyuq zân ùp ri. 11 Yhang gi, Yhûmsîng Garaî é myòq hí má, agè ashop hkyô kut luî, Isira-elaq byu pé lé mara kut shut nhang é Nebat é yhang zo Yerobo-am é yubàk mara hkyô haî lé le, a tô pyám nghut ri; yhang gi, haú hkyô pé má ru xoq châng nyi ri.
12 Ahkuî, Yeho-asha ùp é gótû hkyô pé, yhang kut laî lo é hkyô bànshoq eq yhang wó ûngmyuq é hkyô pé, Yudaq hkóhkâm Amazi-a lé yhang lhom htuqhtîng é majan hkyô lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 13 Yeho-asha gi, yhâng é îchyí îwâ pé eq rahá bo bánnô byùq bê nghut luî, Yerobo-ama gi, yhâng é hkóhkâm hkô má zùng bê nghut ri. Yeho-asha gi, Isira-elaq hkóhkâm pé eq rahá, Samariq wà má myhup yhûm pyâm é hui bê nghut ri.
14 Ahkuî, Elisha gi, shî nò no jamjaû nyi ri. Isira-elaq hkóhkâm Yeho-asha gi, Elisha lé hui râ ga gyó e ló luî, yhâng é hí má, “Ngá wa ê! Ngá wa ê! Isira-elaq é gyèlhêng pé eq myang ji ji sarhê pé nghut rî-nhung ô!” ga ngau ri.
15 Haû mù, Elisha gi, “Lai eq myoshi pé ê yû àq.” ga taí jáng, yhang gi, yù bê nghut ri. 16 Dum, Elisha gi, “Lai lâng htûng àq.” ga Isira-elaq hkóhkâm lé taí jáng, yhang gi, lâng htûng bê nghut ri. Haú hkûn, Elisha gi, hkóhkam é lòq htoq má yhâng é lòq ke byî ri.
17 Hau htâng, yhang gi, “Buìhtoq hkyam mâ é hkohot hpóng aq.” ga taí jáng, hkóhkâm gi, hpóng bê nghut ri. Dum, Elisha gi, “Bìk àq!” ga taí jáng, yhang gi, bìk kat bê nghut ri. Hau htâng, Elisha gi, “Haû Yhûmsîng Garaî é ûngmyuq hkyô myoshi gi, Aram byu pé lé ung é ûngmyuq hkyô myoshi nghut ri! Nàng gi, Aram byu pé lé, Ahpek jowò má chyut sat kyop pyám râ nghut lhê.” ga taî pyo ri.
18 Hau htâng, Elisha gi, “Myoshi pé yù shi aq.” ga taí jáng, hkóhkâm gi, yù bê nghut ri. Dum, Elisha gi, “Myigùng má bàt àq.” ga taí jáng, yhang gi, myigùng má sum dâm bàt mù, no bê nghut ri. 19 Haû jáng, Garai Gasâng é byù gi, yhang lé nhikjum yo mù, “Myigùng má ngo hkyuq dâm bàt é ru nghut le gi, nàng, Aram byu pé lé ûng mù, chyut wó sat kyop pyám râ nghut lhê wá; ahkuî, nàng gi, sum dâm za wó ûng râ nghut lhê.” ga taî ri.
20 Haû mù, Elisha gi, shi byùq mù, myhup yhûm pyâm é hui bê nghut ri.
Ahkuî, Moba mau mâ é mau chyin bang gi, zàn wuì zàn sik má Isira-elaq mau lé, lé wang htim htim kut akô. 21 Radàm lé, Isira-elaq byu pé gi, byù màng ramàng lé myhup yhûm nyì kô é u, dàn lòq tung, mau chyin bang rahpúng lé myang kat akô; haû mù, yhángmòq gi, màng haú lé, Elisha é lùp má dú kat to hkô akô nghut ri. Màng haû gi, Elisha é showui pé má ló záng jáng, chyungxe dum dui lò luî, toq yàp tô ri.
22 Aram hkóhkâm Haza-ela gi, Yeho-ahaza ùp é i-pyàt gón Isira-elaq byu pé lé zìk zô ri. 23 Nghut kôlhang, haû Yhûmsîng Garai gi, Abraham, Isak eq Yakup pé eq tô tô é Yhâng é dangshikaq é yánmai, yhángmòq lé jeju eq shogyo nhikmyin myìt shit luî, yhángmòq lé myìt chiq byî é hkyô shit nyi ri. Yhang gi, hkû-nyí jé shoq, yhángmòq lé lhoqhtên pyám râ le, Yhâng é hí mai yhángmòq lé lhoqkâng pyám râ le, a kám shi nghut ri.
24 Aram hkóhkâm Haza-ela gi, shi byùq bê nghut mù, yhang zo Ben Hadat gi, yhâng é hkóhkâm hkô má zùng bê nghut ri. 25 Hau htâng, Yeho-ahaza é yhang zo Yeho-asha gi, majan má yhâng wa Yeho-ahaza chyáng mai Haza-ela é yhang zo Ben Hadat èq sing yu pyám byî é wà pé lé wó dum sing yù bê nghut ri. Yeho-asha gi, Ben Hadat lé sum dâm ung é nghut mù, Isira-elaq wà pé lé wó dum taû sing yù bê nghut ri.