<<    <     2 Hkóhkâm     14     >    >> 
Yudaq Hkóhkâm Amazi-a
14
Yeho-ahaza é yhang zo Yeho-asha Isira-elaq hkóhkâm kut é í zan zàn má, Yudaq hkóhkâm Yo-ashi é yhang zo Amazi-a gi, hkóhkâm kut hî bê nghut ri. 2 Yhang gi, chyungxe zànwut í xe ngo zân má hkóhkâm dùt bê nghut mù, Yerusalem wà mó má í xe gau zân ùp ri. Yhâng nû é myìng gi, Yeho-adan gâ ri; yhang gi, Yerusalem wà mó mâ é nghut ri. 3 Amazi-a gi, haû Yhûmsîng Garaî é myòq hí má jo têng é hkyô kut ri; nghut kôlhang, yhâng é îchyí îwa Dawiq kut é su a kut é za, hkyô hkat hkangmó má, yhâng wa Yo-ashi kut é eq rajung za châng kut ri. 4 Nghut kôle, myhang é hparà noq jowò pé lé gi, a lhoqhtên pyâm é nghut mù, shiwa byu pé gi, haú jowò pé má shigu hkungga pé xoq nhông byi mù, namngón hkungga nyhê nhông byî nyi akô nghut ri.
5 Yhang gi, mîngdán lé wó zuî gingtîng tô é htâng má, yhâng wa hkóhkâm lé sat pyâm é zaugun sûwún wuî lé, sat pyám bê nghut ri. 6 Nghut kôle, yhang gi, “Zoshâng wui é yánmai mó wuî, mó wui é yánmai zoshâng wuì, sat pyâm é ge hui râ a nghut; yùq hkangmó gi, yhûmsing é mara mai za shi é hui zo râ nghut lhê.” ga Mosheq é Târâ Laiká Bùk má kâ tô é, haû Yhûmsîng Garaî é hkunmó eq rajung za, yhâng wa lé sat pyám bâng é zoshâng wuì lé, a sat pyám nghut ri.
7 Amazi-a gi, Xo Langhkaû má Edom byù ra-mun lé sat kyop pyám mù, majan má Sela wà lé wó sing yù luî, wà hau é myìng lé, hkû-nyí jé shoq Yokhtela ga myhîng akô nghut ri.
8 Hau htâng, Amazi-a gi, Yehu é yhang shu, Yeho-ahaza é yhang zo, Isira-elaq hkóhkâm Yeho-asha chyáng lagyô pé nhang kat mù, “Lé aq, ngá-nhik gi, majan pá má myòqdong hkyúm zân lhum gòq.” ga gyáng dang châng taî kat ri.
9 Nghut kôlhang, Isira-elaq hkóhkâm Yeho-asha gi, Yudaq hkóhkâm Amazi-a lé, “Lebanon bùm mâ é zu gâm gi, Lebanon bùm mâ é kyám gâm lé, ‘Náng é byìzo lé, ngá é yùqzô chyáng byi tso aq.’ ga danglù hun kat ri. Hau htâng, Lebanon mâ é tân jung yòsô zè radu gi, sô laî ló uchyang zu gâm haú lé nâng pyeq ri. 10 Nàng gi, Edom byu pé lé hkyak ung pyám bê nghut mù, ahkuî nghutbûn nyì bê nghut ri. Náng é ûngmyuq hkyô má hpungwup bo nyì kôlhang, náng é yhûm má nyi to aq! Náng gûng yhang le, Yudaq byu pé le, rahá gyòp gyó byùq râ wuîhke jamjau hkyô lé, haî mù dûng nyi lhê lhú?” ga tû taî ri.
11 Nghut kôlhang, Amazi-a gi, dang haú lé a gyo kut é yánmai, Isira-elaq hkóhkâm Yeho-asha gi, ê htim bê nghut ri. Yhang eq Yudaq hkóhkâm Amazi-a gi, Yudaq mau mâ é Bet Shemesha má, myòqdong hkyúm majan zân lhum bekô nghut ri. 12 Yudaq byu pé gi, Isira-elaq byu pê é hí má sûm byùq bekô nghut mù, yùq hkangmó gi, yhûmsing é yhûm shut hpang ló bùm bekô nghut ri. 13 Isira-elaq hkóhkâm Yeho-asha gi, Ahazi-a é yhang shu, Yo-ashi é yhang zo, Yudaq hkóhkâm Amazi-a lé, Bet Shemesha má chyup yu ri. Hau htâng, Yeho-asha gi, Yerusalem wà mó shut ê mù, Yerusalem wàhkûm lé, Ehprim Hkum mai Htúngchyûn Hkum jé shoq, myi shô dúng kô hpyoq hpyi pyám bê nghut ri. 14 Yhang gi, Yhûmsîng Garaî é noqkuq yhûm eq hkóhkâm wâng mâ é sùtdò má lúng é ngùn hîng pé eq myang é zèhkoq pé bànshoq lé le, yu chûng mù, puhkám byu pé lé le shuî chûng luî, Samariq wà shut taû ló bê nghut ri.
15 Yeho-asha ùp é gótû hkyô pé, yhang kut laî lo é hkyô eq yhang wó ûngmyuq é hkyô pé, Yudaq hkóhkâm Amazi-a lé yhang lhom htuqhtîng é majan hkyô lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 16 Yeho-asha gi, yhâng é îchyí îwâ pé eq rahá bo bánnô byùq mù, Isira-elaq hkóhkâm pé eq rahá, Samariq wà má myhup yhûm pyâm é hui bê nghut ri. Haû mù, yhang zo Yerobo-am gi, yhâng é hkóhkâm hkô má zùng bê nghut ri.
17 Yudaq hkóhkâm, Yo-ashi é yhang zo Amazi-a gi, Isira-elaq hkóhkâm, Yeho-ahaza é yhang zo Yeho-asha shi byùq é htâng má raxe ngo zân chyungxe dui ashî nghut ri. 18 Amazi-a ùp é gótû hkyô pé lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí?
19 Yerusalem wà mó má Amazi-a lé gumlau toq kô é nghut mù, yhang gi, Lahkisha wà shut hpang e ri; nghut kôlhang, yhángmòq gi, Lahkisha wà shut byù châng nhâng mù, yhang lé haú má sat pyám bekô nghut ri. 20 Yhâng é màng lé gi, myang mai htô taû lò kômù, Yerusalem wà mó, Dawiq é Wà má yhâng é îchyí îwâ pé eq rahá myhup yhûm pyám bekô nghut ri.
21 Hau htâng, Yudaq byù bànshoq bang gi, chyungxe zànwut raxe hkyuq zân bò bê é Azari-a lé shuî yù mù, yhâng wa Amazi-a é hkô má hkóhkâm kut nhang akô nghut ri. 22 Azari-a gi, yhâng wa Amazi-a, yhâng é îchyí îwâ pé eq rahá bo bánnô byùq é htâng má, Elat wà lé dum saî xuq mù, Yudaq mau má dum lhoqlhôm yu é sû nghut ri.
Í Yùq Nghû Râ Yerobo-am Isira-elaq Hkóhkâm Kut É Hkyô
23 Yudaq hkóhkâm Yo-ashi é yhang zo Amazi-a hkóhkâm kut é raxe ngó zan zàn má, Yeho-asha é yhang zo Yerobo-am gi, Samariq wà má Isira-elaq hkóhkâm dùt mù, myí xe razàn ùp ri. 24 Yhang gi, haû Yhûmsîng Garaî é myòq hí má agè ashop é hkyô kut mù, Isira-elaq byu pé lé mara kut shut nhang é Nebat é yhang zo Yerobo-am é yubàk mara lé a koi pyám shi nghut ri. 25 Yhang gi, Isira-elaq é Garai Gasang, haû Yhûmsîng Garai mai, yhâng é duìnhâng zoshâng, Gahta Hehpera wà mâ é Amitai é yhang zo myìqhtoi Yonaq dông taî tô é dang eq rajung za, Isira-elaq maukyo pé lé, Lebo Hamat wà mai Xo Nhông jé shoq dum wó sing yù bê nghut ri.
26 Hkâsu mù gâ le, Isira-elaq byù yùq hkangmó, jùn nghut nghut, lùt hkyô wó sû nghut nghut, hkâ-í yhang hpu jamjau zô nyi é hkyô lé, haû Yhûmsîng Garai myàng byi bê nghut ri; Isira-elaq byu pé lé le garúm yû râ byù ó a nyì nghut ri. 27 Haû mù, Yhûmsîng Garai gi, mauhkûng a-ô mai Isira-elaq byu pê é myìng lé bùt sut pyám râ ga a taî tô é yánmai, Yeho-asha é yhang zo Yerobo-am é lòq èq yhángmòq lé hkyi xe yù bê nghut ri.
28 Yerobo-am ùp é gótû hkyô pé lé le, yhang kut laî lo é hkyô bànshoq lé le, yhang majan zân é má wó ûngmyuq é hkyô pé lé le, Yudaq hkóhkâm pé ùp tô é Damasikuq wà eq Hamat jowò lé, Isira-elaq byu pê é matú hkâsu dum wó sing yu é hkyô lé le, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 29 Yerobo-am gi, Isira-elaq é hkóhkam pé nghut é, yhâng é îchyí îwâ pé eq rahá bo bánnô byùq bê nghut luî, yhang zo Zehkariq gi, yhâng é hkóhkâm hkô má zùng bê nghut ri.