Yudaq Hkóhkâm Azari-a É Hkyô
15
Isira-elaq hkóhkâm Yerobo-am ùp é í xe nyhit zan zàn má, Yudaq hkóhkâm Amazi-a é yhang zo Azari-a gi, hkóhkâm kut hî bê nghut ri. 2 Yhang gi, chyungxe zànwut raxe hkyuq zân má hkóhkâm dùt mù, Yerusalem wà mó má ngó xe í zân ùp ri. Yhâng nu gi, Yerusalem wà mó mâ é Yehkoli-a ga sû nghut ri. 3 Yhang gi, yhâng wa Amazi-a kut é eq rajung za, haû Yhûmsîng Garaî é myòq hí má jo têng é hkyô kut ri. 4 Nghut kôlhang, myhang é hparà noq jowò pé lé gi, a lhoqhtên pyâm é nghut mù, shiwa byu pé gi, xoq luî, haú jowò má, shigu hkungga pé nhông byi mù, namngón jung nyhê nhông byî nyi akô nghut ri.5 Haû Yhûmsîng Garai gi, hkóhkâm lé, yhang shi byùq é hkûn jé shoq yàpjèq nòlì dàp nhang é nghut mù, yhang gi, yhûm gótû san má nyi nyi ri. Hkóhkam é yhang zo Yohtam gi, haú mau mâ é mingbyû wuì lé ùp mù, hkóhkâm wâng lé wú gôn ri.
6 Azari-a ùp é gótû hkyô pé eq yhang kut laî lo é hkyô bànshoq lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 7 Azari-a gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà, yhángmòq é ayàm má myhup yhûm pyâm é hui bê nghut ri. Haû mù, yhang zo Yohtam gi, yhâng é hkóhkâm hkô má zùng bê nghut ri.
Isira-elaq Hkóhkâm Zehkariq
8 Yudaq hkóhkâm Azari-a ùp é súm xe shit zan zàn má, Yerobo-am é yhang zo Zehkariq gi, Samariq wà má Isira-elaq hkóhkâm dùt mù, lha-mó hkyuq hkyap ùp ri. 9 Yhang gi, yhâng é îchyí îwâ pé kut é eq rajung za, Yhûmsîng Garaî é myòq hí má agè ashop é hkyô kut bê nghut ri. Yhang gi, Isira-elaq byu pé lé mara kut shut nhang é Nebat é yhang zo Yerobo-am é yubàk mara pé lé a koi pyám nghut ri.
10 Yabesha é yhang zo Shalum gi, Zehkariq lé gumlau toq mù, shiwa byu pê é hí má, yhang lé htim luî, sat pyám mù, yhâng é hkóhkâm hkô má zùng bê nghut ri. 11 Zehkariq ùp é gótû hkyô pé lé gi, Isira-elaq hkóhkam pê é mhô-myi shindâm laiká bùk má kâ tô é nghut lhê. 12 Haû mù, Yhûmsîng Garai mai Yehu lé, “Náng é awùt ashín pé gi, pyàt bán myi bán jé shoq Isira-elaq hkóhkâm tángmyhâng má zùng râ nghut lhê.” ga taî é dang dik bê nghut ri.
Isira-elaq Hkóhkâm Shalum
13 Yudaq hkóhkâm Uzi-a hkóhkâm kut é súm xe gaú zan zàn má, Yabesha é yhang zo Shalum gi, hkóhkâm dùt bê nghut mù, Samariq wà má lha-mó rahkyap ùp ri. 14 Haú hkûn, Gadi é yhang zo Menahem gi, Tiriza wà mai Samariq wà má dòq e ri. Yhang gi, Samariq wà má Yabesha é yhang zo Shalum lé htim luî, sat pyám mù, yhâng é hkóhkâm hkô má zùng bê nghut ri.
15 Shalum ùp é gótû hkyô pé eq yhang gumlau shuî toq é hkyô lé gi, Isira-elaq hkóhkam pê é mhô-myi shindâm laiká bùk má kâ tô é nghut lhê.
16 Haú hkûn, Menahem gi, Tiriza wà mai htoq e ló mù, Tihpasa wà lé le, haú má nyi é yùq hkangmó lé le, wà hau é wà kyo wà myam mâ é bang lé le, htîm sat pyâm ri; hkâsu mù gâ le, yhángmòq gi, wà hkum pé lé a hpóng byi nhô kô é yánmai nghut ri. Yhang gi, Tihpasa wà lé lhoqhtên pyám mù, zogûng wun é myiwe wuì bànshoq bâng é wamdau lé htaû hpuq pyám byî ri.
Isira-elaq Hkóhkâm Menahem
17 Yudaq hkóhkâm Azari-a hkóhkâm kut é súm xe gaú zan zàn má, Gadi é yhang zo Menahem gi, Isira-elaq hkóhkâm dùt mù, Samariq wà má raxê zàn ùp ri. 18 Yhang gi, haû Yhûmsîng Garaî é myòq hí má agè ashop é hkyô kut mù, yhang ùp é i-pyàt gón, Isira-elaq byu pé lé mara kut shut nhang é Nebat é yhang zo Yerobo-am é yubàk mara pé lé a koi pyám nghut ri.
19 Haú pyàt má, Asuri hkóhkâm Pulaa gi, Isira-elaq mau lé majan lé zân é nghut mù, Menahem gi, Pula chyáng mâ é garúm htuqbáng hkyô wó yû râ matú eq yhâng é mîngdán lé yhâng é lòq má wó zuî zing to mù, wó lhoq gingtîng yù râ matú, yhang lé ngùnhtung 11000 joí kô byî ri. 20 Menahem gi, Asuri hkóhkâm lé byi râ matú, Isira-elaq mau mâ é sùtzè wó é bang yùq hkangmó lé ngùnhtung nyhit rûng kô kô byí nhang ri. Haû mù, Asuri hkóhkâm hpó gi, Isira-elaq mau má a nyi nân to lô é za taû ló bê nghut ri.
21 Menahem ùp é gótû hkyô pé eq yhang kut laî lo é hkyô bànshoq lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí? 22 Menahem gi, yhâng é îchyí îwâ pê chyáng ló bo bánnô byùq bê nghut mù, yhang zo Pekahi-a gi, yhâng é hkóhkâm hkô má zùng bê nghut ri.
Isira-elaq Hkóhkâm Pekahi-a
23 Yudaq hkóhkâm Azari-a hkóhkâm kut é ngo xê zan zàn má, Menahem é yhang zo Pekahi-a gi, Samariq wà má Isira-elaq hkóhkâm dùt mù, í zân ùp ri. 24 Pekahi-a gi, haû Yhûmsîng Garaî é myòq hí má agè ashop é hkyô kut ri. Yhang gi, Isira-elaq byu pé lé mara kut shut nhang é Nebat é yhang zo Yerobo-am é yubàk mara pé lé a koi pyám nghut ri. 25 Yhâng é gyèzaû pé mâ é rayùq nghut sû, Remali-a é yhang zo Peka gi, yhang lé gumlau toq ri. Yhang gi, Gile-at byù ngo xê yùq lé, yhang eq rahá shuî chûng mù, Samariq wà mâ é, hkóhkâm wâng mâ é gingtíng jowò má, Pekahi-a lé le, Arigoba eq Ari-a nhik lé le sat pyâm ri. Haû mù, Peka gi, Pekahi-a lé sat pyám luî, yhâng é hkóhkâm hkô má zùng bê nghut ri.
26 Pekahi-a ùp é gótû hkyô pé eq yhang kut laî lo é hkyô bànshoq lé gi, Isira-elaq hkóhkam pê é mhô-myi shindâm laiká bùk má kâ tô é nghut lhê.
Isira-elaq Hkóhkâm Peka
27 Yudaq hkóhkâm Azari-a hkóhkâm kut é ngó xe í zan zàn má, Remali-a é yhang zo Peka gi, Samariq wà má Isira-elaq hkóhkâm dùt mù, í xê zàn ùp ri. 28 Yhang gi, haû Yhûmsîng Garaî é myòq hí má agè ashop é hkyô kut ri. Yhang gi, Isira-elaq byu pé lé mara kut shut nhang é Nebat é yhang zo Yerobo-am é yubàk mara pé lé a koi pyám nghut ri.
29 Isira-elaq hkóhkâm Peka é i-pyàt má, Asuri hkóhkâm Tigalat-Pilesera lé jé mù, Iyon, Abela Bet Mahka, Yano-a, Kedesha, Hazora wà pé lé le, Gile-at mau, Galile mau eq Naphtali mau bànshoq lé le, sing yù luî, mingbyû wuì lé Asuri mau shut chyup shuî ló ri. 30 Haú hkûn, Ela é yhang zo Hoshe-a gi, Remali-a é yhang zo Peka lé gumlau toq mù, yhang lé sat pyám luî, Uzi-a é yhang zo Yohtam hkóhkâm kut é í xê zan zàn má, Peka é hkóhkâm hkô má zùng bê nghut ri.
31 Peka ùp é gótû hkyô pé eq yhang kut laî lo é hkyô bànshoq lé gi, Isira-elaq hkóhkam pê é mhô-myi shindâm laiká bùk má kâ tô lhê, a nghut lhí?
Yudaq Hkóhkâm Yohtam
32 Remali-a é yhang zo Peka Isira-elaq hkóhkâm kut é í zan zàn má, Uzi-a é yhang zo Yohtam gi, Yudaq hkóhkâm kut hî bê nghut ri. 33 Yhang gi, chyungxe zànwut í xe ngo zân má hkóhkâm dùt mù, Yerusalem wà mó má raxe hkyuq zân ùp ri. Yhâng nu gi, Zadok é yhang zo byìzo Yerusha ga sû nghut ri. 34 Yhang gi, yhâng wa Uzi-a kut é su, haû Yhûmsîng Garaî é myòq hí má jo têng é hkyô kut ri. 35 Nghut kôlhang, myhang é hparà noq jowò pé lé gi, a huî sêng pyâm é nghut mù, shiwa byu pé gi, haú jowò má, shigu hkungga pé eq namngón jung xoq nyhê nhông byî nyi akô nghut ri. Yohtam gi, haû Yhûmsîng Garaî é noqkuq yhum é Ahtoq Hkum lé saî saî ri.
36 Yohtam ùp é gótû hkyô pé eq yhang kut laî lo é hkyô lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 37 (Haú buìnyì pé má, haû Yhûmsîng Garai gi, Yudaq mau lé majan zan râ matú, Aram hkóhkâm Rezin eq Remali-a é yhang zo Peka lé nhang kat ri.) 38 Yohtam gi, yhâng é îchyí îwâ pê chyáng ló bo bánnô byùq bê nghut mù, yhâng wa Dawiq é Wà má yhángmòq eq rahá myhup yhûm pyâm é hui bê nghut ri. Haú hkûn, yhang zo Ahaza gi, yhâng é hkóhkâm hkô má zùng bê nghut ri.