Yudaq Hkóhkâm Ahaza
16
Remali-a é yhang zo Peka hkóhkâm kut é raxe nyhit zan zàn má, Yudaq hkóhkâm Yohtam é yhang zo Ahaza gi, hkóhkâm kut hî bê nghut ri. 2 Ahaza gi, chyungxe zànwut í xê zàn má hkóhkâm dùt mù, Yerusalem wà mó má raxe hkyuq zân ùp ri. Yhang gi, yhâng é îchyí îwa Dawiq kut é su, haû Yhûmsîng Garaî é myòq hí má jo têng é hkyô a kut nghut ri. 3 Yhang gi, Isira-elaq hkóhkam pê é hkyô pé má cháng mù, haû Yhûmsîng Garaî èq Isira-elaq byu pê é hí mai hkat htoq pyâm é gótû a-myû wui é achaq achyut hkyô má cháng luî, yhûmsing é yhang zo lé lháng myi nyhé hkungga dông nhông byî ri. 4 Yhang gi, myhang é hparà noq jowò pé má le, kong htoq pé má le, sikkoq hkyâm lam é sikgâm ô má le, hkungga pé eq namngón jung pé nyhê nhông byî ri.5 Haú hkûn, Aram hkóhkâm Rezin eq Isira-elaq hkóhkâm, Remali-a é yhang zo Peka gi, Yerusalem wà mó lé majan ê dòq zan mù, Ahaza lé lom hkyuq to kôlhang, yhang lé a wó ûng kó nghut ri. 6 Haú u má, Aram hkóhkâm Rezin gi, Yudaq byu pé lé hkat htoq pyám luî, Elat wà lé Aram mau má wó dum lhoqlhôm yù bê nghut ri. Haû mù, Edom byu pé gi, Elat wà má htòt wang nyì mù, hkû-nyí jé shoq haú má nyi to bekô nghut ri.
7 Haû mù, Ahaza gi, lagyô pé nhang kat luî, Asuri hkóhkâm Tigalat-Pilesera chyáng, “Ngò gi, náng é jujúm duìnhâng zoshâng eq nungzo nghut lhê. Ngo lé majan zân nyi é Isira-elaq hkóhkâm eq Aram hkóhkam é lòq mai, ngo lé lé hkyi xe yù laq.” ga taí nhang kat ri. 8 Hau htâng, Ahaza gi, haû Yhûmsîng Garaî é noqkuq yhûm eq hkóhkâm wâng mâ é sùtdò pé má myang é hîng eq ngùn lé yù mù, Asuri hkóhkam chyáng chyûnghuq dông dé kat byî ri. 9 Asuri hkóhkâm gi, Ahaza é dang lé gyo byi luî, Damasikuq wà mó lé majan ê zân yù luî, mingbyû wuì lé Kira wà shut shúm dông chyup shuî ló mù, Rezin lé sat pyâm bê nghut ri.
10 Hau htâng, Hkóhkâm Ahaza gi, Asuri hkóhkâm Tigalat-Pilesera lé hui râ matú, Damasikuq wà mó shut dòq e ló le, Damasikuq wà mó má hkungga gyàp ralhum lé myàng mù, haú lé saî é azó pé eq hau é azòng roq nghut é hkungga gyàp alhô lé, hkyangjong Uri-a chyáng dé kat ri. 11 Haû mù, hkyangjong Uri-a gi, Damasikuq wà mó mai Hkóhkâm Ahaza dé kat é azó azòng pé eq rajung za hkungga gyàp ralhum lé saî hî mù, Hkóhkâm Ahaza a taû lò shi-má, haû lé ban saí bê nghut ri. 12 Hkóhkâm gi, Damasikuq wà mó mai dum taû lo é hkûn, hkungga gyàp lé myàng mù, haú shut huî ê luî, hau é ahtoq má hkungga pé nhông byî ri. 13 Yhang gi, myi nyhé hkungga eq gùqzò hkungga lé nhông byi mù, yhâng é shuq jung hkungga lé hut gyun luî, yhâng é zùmhkaû hkungga pé mâ é sui lé, hkungga gyàp htoq má hpyûn gyûn ri. 14 Yhang gi, haû Yhûmsîng Garaî é hí má jòq tô é gyi hkungga gyàp lé, hkungga gyàp asik eq haû Yhûmsîng Garaî é noqkuq yhûm gyoro nghut é, noqkuq yhûm hí mai htòt yù mù, hkungga gyàp sik é mautsûng hkyam shut tô tô ri.
15 Hau htâng, Hkóhkâm Ahaza gi, hkyangjong Uri-a lé, “Hkungga gyàp mó asik hau é ahtoq má, nàpsûn lhê é myi nyhé hkungga eq myínhtâng lhê é gùqzò hkungga lé le, hkóhkam é myi nyhé hkungga eq yhâng é gùqzò hkungga lé le, mingbyû wuì bànshoq bâng é myi nyhé hkungga, yhángmòq é gùqzò hkungga eq shuq jung hkungga lé le, nhông byi aq. Hkungga gyàp shi é ahtoq má, myi nyhé hkungga pê é sui eq shigu hkungga pê é sui bànshoq lé hut gyun aq. Nghut kôlhang, gyi hkungga gyàp lé gi, hkyô shit yû râ lé myi râ matú, ngò chûng râ nghut lhê.” ga hkunmó pé hkyô ri. 16 Haû mù, hkyangjong Uri-a gi, Hkóhkâm Ahaza hkunmó hkyô é eq rajung za kut bê nghut ri.
17 Hkóhkâm Ahaza gi, ayàm mâ é adúng pé lé hpyit pyám mù, wó dûn huî é tsûngjang mai lànghkang pé lé htòt pyâm ri. Yhang gi, lànghkang mó lé le, gyi nohtó pê htoq mai wàq hkyô yù luî, lùqgòk hkâng to jang má tô tô ri. 18 Yhang gi, Asuri hkóhkâm lé myìt gyùq é yánmai, Bánno Buìnyì lé noqkuq yhûm má wàng râ matú saî tô é gyam lé yu pyám mù, haû Yhûmsîng Garaî é yhûmhkun mâ é, hkóhkâm hpó wang é hkyô lé huî htòt pyâm ri.
19 Ahaza ùp é gótû hkyô pé eq yhang kut laî lo é hkyô lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 20 Ahaza gi, yhâng é îchyí îwâ pê chyáng ló bo bánnô byùq bê nghut mù, Dawiq é Wà má yhángmòq eq rahá myhup yhûm pyâm é hui bê nghut ri. Haû mù, yhang zo Hezeki-a gi, yhâng é hkóhkâm hkô má zùng bê nghut ri.