Ló Htâng É Isira-elaq Hkóhkâm Hoshe-a
17
Yudaq hkóhkâm Ahaza hkóhkâm kut é raxe í zan zàn má, Ela é yhang zo Hoshe-a gi, Samariq wà má Isira-elaq hkóhkâm dùt mù, gau zân ùp ri. 2 Yhang gi, haû Yhûmsîng Garaî é myòq hí má agè ashop é hkyô kut kôlhang, yhâng é hí mâ é Isira-elaq hkóhkâm pé í a kut nghut ri.3 Asuri hkóhkâm Shala-manese gi, Hoshe-a lé htim râ ga dòq lé lo ri; Hoshe-a gi, Shala-manese èq zuî tô é sû dùt byùq mù, yhang lé hkán kat byi sû nghut ri. 4 Nghut kôlhang, Asuri hkóhkâm gi, Hoshe-a gumlau myìt bo é hkyô lé myàng bê nghut ri; hkâsu mù gâ le, Hoshe-a gi, Egutuq hkóhkâm So gá su chyáng lagyô pé nhang kat é eq Asuri hkóhkam chyáng zàn wuì byî nyi é hkán a kat byi lo nghut ri. Haû mù, Shala-manese gi, yhang lé chyup yû luî, htóng má lhûng pyâm bê nghut ri. 5 Asuri hkóhkâm gi, Isira-elaq ra-mau gón má majan zân wàng luî, Samariq wà má yán jé mù, haú lé sum zân yhang lé lóm tô akô nghut ri. 6 Hoshe-a hkóhkâm kut é gaú zan zàn má, Asuri hkóhkâm gi, Samariq wà lé wó zân ung yù mù, Isira-elaq byu pé lé, Asuri mau shut chyup shuî ló ri. Yhang gi, yhángmòq lé, Hala jowò, Habora Wuìlàng yàm mâ é Gozan jowò eq Medi mau mâ é wà pé má ló tsing nyhi tô ri.
Yubàk Marâ É Yánmai Isira-elaq Byu Pé Shúm Zûng Huî É Hkyô
7 Shí hkyô dùt é bànshoq gi, Isira-elaq byu pé lé Egutuq hkóhkâm Hpara-uq é lòq mai hkyi xe yù mù, Egutuq ming mai yhángmòq lé shuî htoq lô Sû, yhángmòq é Garai Gasang nghut é, haû Yhûmsîng Garai lé yhángmòq mara kut shut kô é yánmai dùt é nghut ri; yhángmòq gi, gótû hparà pé lé noqkuq kô é nghut mù, 8 yhángmòq é hí mai haû Yhûmsîng Garai hkat htoq pyâm é byù myû wuì kut é hkyô lé châng kut kô é htoq agó, Isira-elaq hkóhkâm pé châng é hkyô lé châng kut akô nghut ri. 9 Isira-elaq byu pé gi, yhángmòq é Garai Gasang nghut é, haû Yhûmsîng Garai lé a jo a têng é hkyô haq kut shut akô nghut ri. Yhángmòq gi, wà zúng mâchya mai gingtîng é wà jé shoq, yhángmòq é wà pé bànshoq má, yhángmòq é matú myhang é hparà noq jowò pé saî akô nghut ri. 10 Yhángmòq gi, myhang é kong hkangmó má le, akoq hkyâm lam é sikgâm hkangmó é a-ô má le, chyoiyúng lùqzìng pé eq Ashera hparà zìng pé lé xuq tô akô nghut ri. 11 Yhángmòq gi, yhángmòq é hí mai haû Yhûmsîng Garai hkat htoq pyâm é byù myû wuì kut é su, myhang é jowò hkangmó má namngón jung nyhê nhông mù, Yhûmsîng Garaî lé nhikjum lhoqyô é, agè ashop hkyô pé kut akô nghut ri. 12 Haû Yhûmsîng Garai mai, “Núngmòq, hparà lhô pé lé ge noq râ a nghut.” ga yhángmòq lé taí kôlhang, yhángmòq gi, hparà lhô pé lé noqkuq akô nghut ri. 13 Haû Yhûmsîng Garai gi, yhâng é myìqhtoî pé eq te myàng bang bànshoq dông, Isira-elaq a-myû eq Yudaq a-myû lé, “Núngmòq agè ashop é hkyô pé mai lhing tau keq. Núngmòq é îchyí îwâ pé cháng râ matú Ngò hkunmó hkyô é eq Ngá é duìnhâng zoshâng myìqhtoî pé dông mai núngmòq lé Ngò lhai byî é târâ lhúnglháng eq rajung za, Ngá é hkunmó pé eq cháng ra târâ pé lé châng nyì keq.” ga sidìq byî ri.
14 Nghut kôlhang, yhángmòq gi, a tâm gyo kô é htoq agó, yhángmòq é Garai Gasang nghut é, haû Yhûmsîng Garai lé a lùmhkaû kut kô é yhángmòq é îchyí îwâ pé eq rajung za, myìt htan bum akô nghut ri. 15 Yhángmòq gi, Yhûmsîng Garaî é târâ wàng hkunmó lé le, Yhang mai yhángmòq é îchyí îwâ pé eq tô tô é dangshikaq lé le, Yhang mai yhángmòq cháng râ matú sidìq byî tô é cháng ra târâ pé lé, he-ngìk pyâm akô nghut ri. Yhángmòq gi, hpau a dàp é hparà lhô pê é htâng cháng kômù, yhángmòq yhang hpau a dàp bang dùt byùq bekô nghut ri. Yhángmòq gi, haû Yhûmsîng Garai mai “Yhángmòq kut é su hkâchâng kut kó.” ga yhángmòq lé hkunmó hkyô to kôle, yhángmòq é awui ayàm mâ é byù myû wuì lé alìk chôm yu bum akô nghut ri.
16 Yhángmòq gi, yhángmòq é Garai Gasang nghut é, haû Yhûmsîng Garaî é hkunmó bànshoq lé tô pyám kômù, yhángmòq é matú, no zo lhô nghut é gyi hparà lhô í lhum eq Ashera hparà zìng lé saî akô nghut ri. Yhángmòq gi, mauhkûng mâ é kyî ajùm ayò bànshoq lé paî gòp luî, Balaq hparà lé le noqkuq akô nghut ri. 17 Yhángmòq gi, yhángmòq é yùqzo byìzô pé lé lháng myi nyhê nhông byi mù, bùt hpyit hkyô eq bùt wú hkyô kut kôluî, haû Yhûmsîng Garai lé nhikjum lhoqyô nyì nhâng râ ga, Yhâng é myòq hí má agè ashop hkyô kut râ matú, yhûmsing gùng lé ung zô pyâm akô nghut ri.
18 Haû mù, haû Yhûmsîng Garai gi, Isira-elaq byu pé lé gyai yhang nhikjum yo mù, Yhâng é hí mai yhángmòq lé hkat htoq pyâm bê nghut ri. Yudaq up za myìt gyó tô alô nghut ri. 19 Yudaq byu pé le, yhángmòq é Garai Gasang nghut é, haû Yhûmsîng Garaî é hkunmó pé lé a cháng kó nghut ri. Yhángmòq gi, Isira-elaq byu pé châng kut é hkyô pé lé kut akô nghut ri. 20 Haû mù, haû Yhûmsîng Garai gi, Isira-elaq byu pé bànshoq lé tô pyám luî, yhángmòq lé wuîhke jamjau hpu zo nhâng mù, Yhâng é hí mai lhoqhtoq pyâm é hkûn jé shoq, lú zo lú shuq é gyè pê é lòq má àp pyám bê nghut ri.
21 Yhang, Isira-elaq byu pé lé Dawiq é yhûm mai lhoqhtoq pyâm é hkûn, yhángmòq gi, Nebat é yhang zo Yerobo-am lé, yhángmòq é hkóhkâm kut nhang akô nghut ri. Yerobo-am gi, Isira-elaq byu pé lé, haû Yhûmsîng Garaî é htâng châng nyi é hkyô mai lhoqnghoq pyám byi mù, yhángmòq lé yubàk mara mó kut shut nhâng bê nghut ri. 22-23 Haû mù, haû Yhûmsîng Garai gi, yhâng é duìnhâng zoshâng wuì myìqhtoî pé bànshoq bang dông sidìq byî tô é eq rajung za, Yhâng é hí mai Isira-elaq byu pé lé huî sêng pyâm é hkûn jé shoq, Isira-elaq byu pé gi, Yerobo-am é yubàk mara hkyô bànshoq châng kut nyî kômù, haú hkyô pé lé a koi pyám kó nghut ri. Haû mù, Isira-elaq byu pé gi, yhángmòq é yhum mau mai Asuri mau má shúm byû dông chyup shuî ló é hui kômù, hkû-nyí jé shoq haú má nyi nyi akô nghut ri.
Samariq Wà Má Jowò Dum Hkyô É Hkyô
24 Asuri Hkóhkâm gi, Babelon, Kuhta, Awa, Hamat eq Sehparawim wà pé mâ é byu pé lé shuî chûng mù, Isira-elaq byu pê é malaî yhángmòq lé Samariq mâ é wà pé má jowò hkyó byî ri. Haú bang gi, Samariq mau lé sing yu pyám mù, haú mâ é wà pé má tsing nyi to bekô nghut ri. 25 Yhángmòq gi, haú mau má nyi hi ló kô é hkûn, haû Yhûmsîng Garai lé a noqkuq kó nghut ri; haû mù, Yhûmsîng Garai gi, yhángmòq chyáng hkanghkyi pé nhang kat é nghut mù, haú mâ é byù ra-am lé ngàt sat pyâm ri. 26 Haû mù, byu pé gi, Asuri hkóhkâm lé, “Samariq mau mâ é wà pé má nàng shuî htòt nyhi tô é byu pé gi, haú mau mâ é hparàa haî ô nau é hkyô lé a sé kó nghut ri. Nàt hparà haû gi, yhángmòq chyáng hkanghkyi pé nhang kat é nghut mù, yhángmòq lé ngàt sat pyâm ri; hkâsu mù gâ le, byù haú bang gi, nàt hparà haû haî ô nau é hkyô lé a sé kó nghut ri.” ga taî kyô akô nghut ri.
27 Haú hkûn, Asuri hkóhkâm gi, “Samariq mau mai núngmòq chyup shuî ló é hkyangjông pé mâ é rayùq lé, haú má ló taû nyì nhâng keq; yhang gi, shiwa byu pé lé haú mau mâ é hparà haî ô nau é hkyô lé mhoq byi sháng gàq.” gâ é hkunmó hkyô ri. 28 Haû mù, Samariq mau mai chyup shuî ló é hkyangjông pé mâ é rayùq gi, Behtela wà má ló jé nyi to mù, haû Yhûmsîng Garai lé hkâsu kut noqkuq râ hkyô, yhángmòq lé mhoq byî ri.
29 Nghut kôlhang, byù myû hkangmó gi, yhángmòq nyi é wà pé má, yhûmsing é matú hparà pé lé tsing saí kômù, haú pé lé, Samariq byu pé saî tô é myhang é hparà noq jowò pé mâ é hparà yhûm pé má tô tô akô nghut ri. 30 Babelon mâ é byu pé gi, Suhkut Benot hparà saí, Kuhta mâ é byu pé gi, Nerigala hparà saí, Hamat mâ é byu pé gi, Ashima hparà saí; 31 Awa byu pé gi, Nip-haza eq Taratak hparà saí kut akô; Sehparawim byu pé gi, Sehparawim hparà pé nghut é Adaram-melek eq Anam-melek hparà pê é matú, yhángmòq é zoshâng wuì lé myi nyhé hkungga dông nyhê nhông byî akô nghut ri. 32 Haú bang gi, haû Yhûmsîng Garai lé noqkuq kôlhang, yhûmsing é byu pé mâ é lé, hkyangjong wò byi mù, myhang é hparà noq jowò pé mâ é hparà yhûm pé má, shiwa byu pê é matú, hkungga nhông byî akô nghut ri. 33 Yhángmòq gi, haû Yhûmsîng Garai lé noqkuq kôlhang, yhûmsing é yhummau mai yu lé lo é a-myû htûngli pé má cháng luî, yhángmòq é hparà pé lé le noqkuq bum akô nghut ri.
34 Yhángmòq gi, hkû-nyí jé shoq, hí lhê é yhángmòq é htûngli lé xoq châng nyi akô. Yhángmòq gi, Yhûmsîng Garai lé le a noqkuq, Yhûmsîng Garai mai Isira-elaq ga myìng myhíng byî é, Yakup é awùt ashîn pé lé byî tô é târâ pé eq hkunmó pé lé le, cháng ra târâ pé eq târâ wàng hkunmó pé lé le, a cháng kó nghut ri. 35 Haû Yhûmsîng Garai mai Isira-elaq byu pé eq dangshikaq tô é hkûn, Yhang gi, yhángmòq lé, “Gótû hparà haî lé le hkâ noqkuq kó; haú pé lé, hkâ-paî gòp, hkâ dójaú, hkungga hkâ-nhông byi kó. 36 Nghut kôlhang, núngmòq lé, wum-o a-tsam mó eq lhâm tô é lòqbú èq Egutuq ming mai shuî htoq lò sû, haû Yhûmsîng Garai lé za noqkuq ra râ nghut lhê. Yhang lé paî gòp luî, hkungga pé nhông byi ra râ nghut lhê. 37 Núngmòq gi, núngmòq é matú Yhang kâ tô byî é târâ pé eq hkunmó pé lé le, cháng ra târâ pé eq târâ wàng hkunmó pé lé le, ayang rago châng nyì ra kôrâ nghut lhê. Gótû hparà pé lé hkâ noqkuq kó. 38 Núngmòq eq Ngò tô tô é dangshikaq lé hkâ tô-myhí kó; gótû hparà pé lé hkâ noqkuq kó. 39 Núngmòq é Garai Gasang nghut é, haû Yhûmsîng Garai lé za noqkuq keq; Yhang gi, núngmòq lé, núngmòq é gyè bànshoq bâng é lòq mai hkyi yù râ Sû nghut lhê.” ga hkunmó hkyô ri.
40 Nghut kôlhang, yhángmòq gi, a tâm gyo kômù, hí lé yhángmòq châng nyi é htûnghking má, ru châng nyi akô nghut ri. 41 Byù shí bang gi, Yhûmsîng Garai lé noqkuq nyî kôlhang, yhángmòq é hparà pé lé le dójaú nyi akô nghut ri. Hkû-nyí jé shoq, yhángmòq é awùt ashín pé gi, yhángmòq é îchyí îwâ pé kut é eq rajung za, xoq kut nyi akô nghut ri.