Yudaq Hkóhkâm Hezeki-a
18
Ela é yhang zo Hoshe-a Isira-elaq hkóhkâm kut é súm zan zàn má, Yudaq hkóhkâm Ahaza é yhang zo Hezeki-a gi, hkóhkâm kut hî bê nghut ri. 2 Yhang gi, chyungxe zànwut í xe ngo zân má hkóhkâm dùt mù, Yerusalem wà mó má í xe gau zân ùp ri. Yhâng nu gi, Zehkariq é yhang zo byìzo Abiya ga sû nghut ri. 3 Yhang gi, yhâng é îchyí îwa Dawiq su, haû Yhûmsîng Garaî é myòq hí má jo têng é hkyô kut ri. 4 Yhang gi, myhang é hparà noq jowò pé lé huî sêng pyám mù, chyoiyúng lùqzìng pé lé bàt hkyop pyám luî, Ashera hparà zìng pé lé zân lhêng pyâm ri. Hau htoq agó, yhang gi, Mosheq saî tô é gyi lhângmuì lé le a-túm ahpyit bàt hkyop pyâm ri; hkâsu mù gâ le, Isira-elaq byu pé gi, haú ahkyíng jé shoq, hau é hí má namngón jung nyhê nhông byî nyi akô nghut ri. Gyi lhângmuì haú lé, Nehushatan ga myhîng akô nghut ri.5 Hezeki-a gi, Isira-elaq é Garai Gasang, haû Yhûmsîng Garai lé lùmhkaû sû nghut ri. Yudaq hkóhkâm pé bànshoq má, yhang sû é hkóhkâm gi, hí má le, htâng má le ó a nyì nghut ri. 6 Yhang gi, haû Yhûmsîng Garai lé ging ging lùmhkau nyì mù, Yhâng htâng abyìt alàn châng nyi ri; yhang gi, haû Yhûmsîng Garai mai Mosheq lé byî tô é hkunmó pé lé châng nyi ri. 7 Haû mù, Yhûmsîng Garai gi, yhang eq rahá nghut nyi ri; yhang gi, yhang kut é múzó hkangmó má wó ûngmyuq ri. Yhang gi, Asuri hkóhkâm lé gumlau toq mù, yhang lé a dójaú nghut ri. 8 Yhang gi, Hpilisiti byu pé lé majan zan mù, wà zúng mâchya mai gingtîng é wà pé jé shoq wó zân ung yu é htoq agó, Gaza eq haú mau gón jé shoq lháng wó zân ung pyâm ri.
9 Hkóhkâm Hezeki-a ùp é myí zan zàn, Ela é yhang zo Hoshe-a Isira-elaq hkóhkâm kut é nyhit zan zàn má, Asuri hkóhkâm Shala-manese gi, Samariq wà lé majan toq mù, haú lé lé lóm to bê nghut ri. 10 Asuri byu pé gi, sum zân byíng jáng, wà haú lé wó sing yù bekô nghut ri. Haû mù, Samariq wà lé gi, Hezeki-a hkóhkâm kut é hkyuq zan zàn, Isira-elaq hkóhkâm Hoshe-a hkóhkâm kut é gaú zan zàn má, wó zân ung yù bê nghut ri. 11 Asuri hkóhkâm gi, Isira-elaq byu pé lé, Asuri mau shut chyup shuî ló mù, Hala jowò, Habora Wuìlàng yàm mâ é Gozan jowò eq Medi mau mâ é wà pé má ló tsing nyhi tô ri. 12 Shí hkyô dùt é gi, Isira-elaq byu pé, yhángmòq é Garai Gasang nghut é, haû Yhûmsîng Garaî é jì-no a gyo kô é za, Yhûmsîng Garaî é duìnhâng zoshâng Mosheq dông mai hkunmó hkyô tô é bànshoq nghut é, Yhâng é dangshikaq lé lhoqhpyoq pyám kô é yánmai nghut ri. Yhángmòq gi, hkunmó pé lé a tâm gyo kô é htoq agó, haú pé lé a châng kut kó nghut ri.
13 Hkóhkâm Hezeki-a ùp é raxe myí zan zàn má, Asuri hkóhkâm Senahkerip gi, Yudaq mau mâ é gingtíng wà mó pé bànshoq lé htim mù, wó ung yù bê nghut ri. 14 Haû mù, Yudaq hkóhkâm Hezeki-a gi, Lahkisha má nyi é Asuri hkóhkam chyáng, “Ngò shut bê; ngá chyáng mai ló byùq àq. Nàng haî byí nhang le haî ngò byi râ nghut lhê.” ga danglù hun kat ri. Asuri hkóhkâm gi, Yudaq hkóhkâm Hezeki-a lé, ngùnhtung 3300 joí eq hîng 330 joí chyîn but yû bê nghut ri. 15 Haû mù, Hezeki-a gi, yhang lé, haû Yhûmsîng Garaî é noqkuq yhûm eq hkóhkâm wâng mâ é sùtdò pé má myang é ngùnhtung bànshoq byi bê nghut ri.
16 Haú u, Yudaq hkóhkâm Hezeki-a gi, haû Yhûmsîng Garaî é noqkuq yhûm mâ é hkum pé eq hkumzîng pé má yhang shup tô é hîng pé lé hî yù mù, Asuri hkóhkâm lé byî pyám bê nghut ri.
Yerusalem Wà Mó Lé Senahkerip Kyuq É Hkyô
17 Asuri hkóhkâm gi, yhâng é gyèzau mó, yhâng é zaugun mó eq majan zan gyèzaû pé lé, gyè hpúng mó eq rahá, Lahkisha wà mai Yerusalem wà mó má nyi tô é Hkóhkâm Hezeki-a chyáng nhang kat ri. Yhángmòq gi, Yerusalem wà mó má jé dòq ló kômù, Mèbu chí Su é Yò hkyô mó yâm mâ é Ahtoq hkyam Wuìhtum lé tsâm tô é lànghkang nàm má, nô nyi bum akô nghut ri. 18 Yhángmòq gi, hkóhkâm lé wùt kat jáng, Hiliki-a é yhang zo, hkóhkâm wâng lé wú gon sû Eli-akim, kâ xûm hpó Shebina eq labaû ká sû Asap é yhang zo Yo-a pé, yhángmòq chyáng htoq e ló akô nghut ri.
19 Majan zan gyèzau hpó gi, yhángmòq lé, “Hezeki-a lé taî kyo keq; ‘Haû hkóhkâm mó nghut é Asuri hkóhkâm shî su ga taî ri; nàng gi, haî lé lùmhkaû luî, haû su wó myìt lum tô lhê lhú? 20 Nàng gi, majan zan râ matú, hpàqchyî byéng-yá le, wum-o a-tsam le bo lhê ga taí kôlhang, haû gi, dangsôm za dùt byùq ri. Nàng gi, ó lé lum luî, ngo lé gumlau toq nyi lhê lhú? 21 Wú aq, nàng gi, gyuî jàp byùq bê jàm dumbáng gâ é, Egutuq ming lé lùmhkau nyi é lé, ngò sê lhê. Jàm dumbáng haû gi, nghêhkaû su é lòq má zû kyáng râ nghut lhê! Haû Egutuq hkóhkâm Hpara-uq lé nghêhkau é bang bànshoq gi, haû su hui zo kôrâ nghut lhê. 22 Nghut kôlhang, núngmòq gi, ngo lé, “Ngá-mòq gi, ngá-mòq é Garai Gasang nghut é, haû Yhûmsîng Garai lé nghêhkau nyi lhê.” ga taí kô é nghut jáng, yhâng é myhang é noqkuq jowò pé eq hkungga gyàp pé lé, Hezeki-a huî sêng pyám luî, “Yerusalem wà mó mâ é hkungga gyàp shí lhûm é hí má za, núngmòq noqkuq ra râ nghut lhê.” ga Yudaq eq Yerusalem wà mó lé taî to bê, a nghut kó lhí?
23 Haû nghut mù, ahkuî lé aq; ngá é yhûmsîng Asuri hkóhkâm eq danghtum htûm to aq. Nàng gi, myangji jî é byù myang ho é nghut jáng, ngò, nang lé myang í hkyîng du byi râ nghut lhê! 24 Nàng gi, ngá é yhûmsing é gyèzaû pé mâ é je tiq sû lé lháng a wó ung pyâm é nhîng, gyèlhêng eq myangji jî é byù wó râ matú, Egutuq hkóhkâm lé nghêhkau nyi lhê lhú? 25 Hau htoq agó, haû Yhûmsîng Garai ahkáng a byî é za, shí mau lé lhoqhtên pyám râ matú, ngò, lé é nghut lhê lhú? Haû Yhûmsîng Garai yhang, ngo lé, shí mau lé majan toq mù, lhoqhtên pyám râ matú taî é nghut lhê.’ gâ ri.” ga taî ri.
26 Haú hkûn, Hiliki-a é yhang zo Eli-akim, Shebina eq Yo-a pé gi, majan zan gyèzau hpó lé, “Ngá-mòq gi, Aram myíng sê gyô lhê nghut é yánmai, ngá-mòq lé Aram myíng dông tû taí laq. Wàhkûm htoq mâ é shiwa byu pé gyô tô é má, ngá-mòq lé Hebre myíng dông hkâtaí.” ga taî akô nghut ri.
27 Nghut kôlhang, majan zan gyèzau hpó gi, “Ngá é yhûmsîng gi, nàng eq náng é yhûmsîng lé za, shí hkyô pé taí râ matú, ngo lé nhang kat é nghut lhê lhú? Núngmòq eq rajung za, yhûmsing é hkyi lé zo râ, yhûmsing é ishî lé shuq râ nghut é, wàhkûm htoq má zung bum é shiwa byu pê chyáng nhang kat é nghut lhê, a nghut lhú?” ga tû taî ri.
28 Hau htâng, majan zan gyèzau hpó gi, toq mù, Hebre myíng dông, “Hkìkhkâm kô myhang é, Asuri hkóhkam é dang lé gyo keq! 29 Haû hkóhkâm shî su ga taî ri; Hezeki-a gi, núngmòq lé a mhaû zô pyám sháng gàq. Yhang gi, ngá lòq mai núngmòq lé wó hkyi yù râ a nghut. 30 ‘Haû Yhûmsîng Garai gi, ngá-nhúng lé teng za hkyi yù râ nghut lhê; wà mó shí lé Asuri hkóhkam é lòq má àp pyám râ a nghut.’ ga, Hezeki-a taí mù, núngmòq lé haû Yhûmsîng Garaî chyáng lùmhkaû nhang shi-kùt é nghut jáng, hkâcháng kó.
31-32 Hezeki-a é dang lé hkâgyo kó. Haû Asuri hkóhkâm shî su ga taî ri; ngò eq nguì ngón hkyô yù mù, ngá chyáng htoq lé keq. Hau jáng, ngò gi, núngmòq é mau eq du é mau nghut é, gùqzò muilhum, tsibyiq wing asik, mùk eq tsibyiq hkyâm pé, tsanlun gàm pé eq byo-î jòq é mau má núngmòq lé shuî lo é hkûn jé shoq, núngmòq yùq hkangmó gi, yhûmsing é tsibyiq hkyâm eq hkohúm gâm mâ é ashi pé lé myàng zo mù, yhûmsing é wuì tíng htum mai ûchyam myàng shuq kôrâ nghut lhê. Shî râ hkyô lé a nghut é za, chyungxe duì hkyô lé hkyin yù keq!
‘Haû Yhûmsîng Garai gi, ngá-nhúng lé hkyi yù râ nghut lhê.’ ga, Hezeki-a èq núngmòq lé hkyô shuî nghoq jáng, hkâgyo byi kó. 33 Byù myû wui é hparà hká pé gi, yhûmsing é mau lé Asuri hkóhkam é lòq mai wó hkyi yu wú é lhú? 34 Hamat eq Aripat wà mó mâ é hparà pé gi, hká má lhú? Sehparawim, Hena eq Iwa wà mó mâ é hparà pé gi, hká má lhú? Yhángmòq gi, Samariq mau lé ngá é lòq mai wó hkyi yu wú ri lhú? 35 Mau shí pé mâ é hparà bànshoq mâ é hká hparà gi, yhûmsing é mau lé, ngá lòq mai wó hkyi yu wú é lhú? Haû jáng, haû Yhûmsîng Garai gi, Yerusalem wà mó lé, ngá lòq mai hkâsu kut wó hkyi yù râ lhú?” ga wùt taî ri.
36 Nghut kôlhang, shiwa byu pé gi, zim za nyì mù, haî le a tû taí kó nghut ri; hkâsu mù gâ le, hkóhkâm gi, “Yhang lé hkâtû taí kó.” ga hkunmó hkyô tô é yánmai nghut ri.
37 Hau htâng, Hiliki-a é yhang zo, hkóhkâm wâng lé wú gon sû Eli-akim, kâ xûm hpó Shebina eq labaû ká sû Asap é yhang zo Yo-a pé gi, yhûmsing é mèbu pé lé lâng cheq pyâm chûng mù, Hezeki-a chyáng ê kôluî, majan zan gyèzau hpó taî é dang lé, taî kyô akô nghut ri.