Yerusalem Wà Mó Wó Lùt Râ Myìqhtoi Dang
19
Hkóhkâm Hezeki-a gi, haú hkyô lé wó gyo jáng, yhâng é mèbu pé lé lâng cheq pyám mù, jimê tû wùt luî, haû Yhûmsîng Garaî é noqkuq yhûm má wang e ló ri. 2 Yhang gi, jimê tû wùt bum é, hkóhkâm wâng lé wú gon sû Eli-akim, kâ xûm hpó Shebina eq hkyangjong sûwún wuî bànshoq lé, Amozi é yhang zo myìqhtoi Esai-a chyáng nhang kat ri. 3 Yhángmòq gi, Esai-a lé, “Hezeki-a shî su ga taî ri; ‘Hkû-nyí gi, myìt myo ûng wôm é buìnyì, tân mhoq shit é eq hoq hpu huî é buìnyì nghut ri. Haû gi, zo hkû râ ahkyíng jé lô kôlhang, hkû râ wum a bo é înu myhí su dùt nyi é nghut ri. 4 Rû dui nyi é Garai Gasang lé rhoi pyám râ matú, yhâng yhûmsîng nghut é Asuri hkóhkâm nhang kat é, majan zan gyèzau hpô é dang lé, náng é Garai Gasang nghut é, haû Yhûmsîng Garai wó gyo râ âbe. Haû nghut é yánmai, náng é Garai Gasang nghut é, haû Yhûmsîng Garai gi, Yhang wó gyo bê dang pê é matú, yhang lé tan sháng gàq. Haû mù luî, nyi myìt gyó to bâng é matú, kyû dung byi aq.’ gâ ri.” ga taî akô nghut ri.5 Hkóhkâm Hezeki-a é zaugun wuì haú bang, Esai-a chyáng ê jé kô é hkûn, 6 Esai-a gi, yhángmòq lé, “Núngmòq é yhûmsîng lé shî su nghû taî kyo keq; haû Yhûmsîng Garai taî le, ‘Nàng wó gyô é, Asuri hkóhkâm nhang kat é bâng èq Ngo lé rhoî kô é dang hau é yánmai, hkâgyùq kó. 7 Gyo aq! Ngò gi, yhang lé myìt gótû kat byi râ nghut mù, yhang gi, lùdang wó gyô é hkûn, yhâng é mau má taû ló râ nghut lhê. Yhang lé, haú má sham èq sat pyám nhâng râ nghut lhê.’ gâ ri.” ga taî ri.
8 Haû majan zan gyèzau hpó gi, Asuri hkóhkâm Lahkisha mai htoq ló byùq bê gâ é lé wó gyo jáng, taû lò mù, hkóhkâm hpó Lipna lé majan zân nyi é lé lo myang ri.
9 Hkóhkâm Senahkerip gi, Egutuq hkóhkâm, Hkusha byù Tirihaka, yhang lé majan zan râ ga dòq lé lo é hkyô danglù lé wó gyo jáng, yhâng é lagyô pé lé dang pyîng mù, Hezeki-a chyáng nhang kat ri. 10 Yhang pying kat é dang gi, “Yudaq hkóhkâm Hezeki-a lé îsu nghû taí keq; haû nàng lum nyi é Garai Gasang gi, nang lé, ‘Yerusalem wà mó gi, Asuri hkóhkam é lòq má àp pyâm é hui râ a nghut.’ ga taî é dông a mhaú zô yù sháng gàq. 11 Nàng gi, mîngdán hkangmó lé, Asuri hkóhkam pê èq chyut lhoqhten lhoqhpyoq pyâm é hkyô lé, hkyak wó gyo berâ nghut lhê. Haû nghut é wá, nàng baú wó lùt râ lhí? 12 Ngá é îchyí îwâ pê èq lhoqhtên pyám bê a-myû wui é hparà pé nghut é, Gozan, Haran, Rezep eq, Tela Asara mâ é Eden byu pê é hparà pé gi, a-myû haú bang lé wó hkyi yu é nghut lhê lhú? 13 Hamat wà mó é hkóhkâm, Aripat wà mó é hkóhkâm eq, Sehparawim, Hena eq Îwa wà mó pê é hkóhkam pé gi, hká má lhú?” gâ ri.
Hezeki-a É Kyûdung Dang
14 Hezeki-a gi, lagyo haú bâng chyáng mai laiká haú lé hàp yù mù, nghap ri. Hau htâng, yhang gi, haû Yhûmsîng Garaî é noqkuq yhûm má dòq ló mù, laiká haú lé Yhûmsîng Garaî é hí má hpyi hkâng tô ri. 15 Hau htâng, haû Yhûmsîng Garai lé Hezeki-a kyûdûng é gi, “Hkerubim ahtoq má zung tô é, Isira-elaq é Garai Gasang, Yhûmsîng Garai ê, myìdàm htoq mâ é mîngdán bànshoq é Garai Gasang gi, Nàng za nghut ri. Nàng gi, mauhkûng eq myigùng lé hpan tô é nghut ri. 16 Yhûmsîng Garai ê, nohkyap lhîng mù, gyo byi aq; Yhûmsîng Garai ê, Náng é myòq hpóng mù, myàng byi aq; rû dui nyi é Garai Gasang lé rhoi pyám râ matú, Senahkerip hun kat é dang bànshoq lé wó gyo byi aq.
17 Yhûmsîng Garai ê, Asuri hkóhkam pé mai, byù myû wuì eq haú bâng é maumyî lé lhoqhtên pyâm é gi, têng ri. 18 Yhángmòq gi, haú bâng é hparà pé lé, myi má dú kat mù, lhoqhtên pyám bekô nghut ri; hkâsu mù gâ le, haú pé gi, Garai a nghut kó; byu é lòq èq saî tô é sik eq lùqgòk za nghut ri. 19 Ahkuî, ngá-mòq é Garai Gasang nghut é, Yhûmsîng Garai ê, myìdàm htoq mâ é mîngdán pé bànshoq gi, Yhûmsîng Garai ê, Nàng za Garai Gasang nghut é lé wó sé kó sháng gàq, ngá-mòq lé, yhâng é lòq mai hkyi yù laq.” gâ ri.
Senahkerip Gyop Gyó Râ Esai-a É Myìqhtoi Dang
20 Haú hkûn, Amozi é yhang zo Esai-a gi, Hezeki-a lé ê taí râ dang hun kat ri. Haû gi, “Isira-elaq é Garai Gasang nghut é, haû Yhûmsîng Garai taî le, nàng, Asuri hkóhkâm Senahkerip eq séng luî kyûdûng é dang lé, Ngò wó gyo bê. 21 Haû Yhûmsîng Garai mai yhang lé htuqhtîng é dang shî su ga taî ri;
‘Zi-un é Byìzo Zo-myi Gyíng gi,
nang lé wú tiq luî, rhoî dang taî nyi ri.
Yerusalem Byìzo gi, nàng hpang ló é hkûn ulhîng he nyi ri.
22 Nàng gi, ó yùq lé, rhoî dang taî é eq lhoqhpoi dang taî é nghut lhê lhú?
Nàng gi, ó yùq lé, náng é htê lhoqmyhang shit luî,
nghutbun myòq tu nghâng shit é lhú?
Isira-elaq é Chyoiyúng Sû lé nghut ri myhî-nhung!
23 Nàng gi, náng é lagyô pé dông,
haû Yhûmsîng lé rhoî jihkyoî kut pyám bê nghut ri.
Nàng taî le,
“Ngò gi, ngá é gyè myanglhêng myo myo eq,
bùm gùng pé má dòq ló mù,
Lebanon é bùm nyuq pé má wang ló bê nghut lhê.
Ngò gi, je myhang é kyám gâm pé lé le,
je yúng je réng é htángmó gâm pé lé le, htuq lheng bê nghut lhê.
Ngò gi, bùm myhang htâng é jang pé má dòq jé mù,
htu dik é sikmó lung-aû yò má jé bê nghut lhê.
24 Ngò gi, gó-mau pé má wuìdong du mù,
wuì myàng shuq bê nghut lhê.
Ngò gi, ngá é hkyîwâ èq,
Egutuq ming mâ é wuì zo wuì mó lâng bànshoq lé lhoqkân pyám bê nghut lhê.” gâ ri.
25 Nàng gi, Ngò, haú hkyô lé góhkûn mai masàt to luî,
góhkun lhê é buìnyì pé mai hen to bê hkyô lé,
a wó gyô wú lhí?
Ahkuî, nàng, gingtîng é wà mó pé lé,
lùqgòk bùm pé dùt shoq lhoqhtên pyâm é gi,
Ngò kut é hkyô nghut lhê.
26 Haû mù, haú mâ é bang gi, wum-o yom ló byùq mù,
gyùq chiq byùq luî, hoq hpu bekô nghut ri.
Yhángmòq gi, yò mâ é mhan-haq hpoqnòq pé su le,
mhan nyuî nyùq pé su le,
yhûmhkûng htoq má yùq htoq é mhan,
a yùq ko shi-má nyé kyuq byùq é su le, dùt akô nghut ri.
27 Nghut kôlhang, Ngò gi, nàng hká má nyi é lé le,
nàng hká u wang lò htoq ló é lé le,
nàng, Ngo lé nhikmó-yô é lé le, sê lhê.
28 Nàng, Ngo lé nhikmó-yô é hkyô eq,
náng é taî nghutbûn é dang gi, Ngá é no má jé hkyâng bê nghut é yánmai,
Ngò gi, Ngá é gòknghê èq nang lé nhôshoí shoí luî,
Ngá é nhutkyâng èq náng é nhut má kyâng to byi luî,
nàng lé lo é hkyô shut dum taû nhang kat râ nghut lhê.’ gâ ri.
29 Hezeki-a ê, náng é matú alhô agàn shí dông nghut râ nghut lhê;
shí zân gi, núngmòq, yhang baú yùq lo é mâ é myàng zo kôrâ nghut lhê;
sâ-nhik gi, dum yùq htoq lo é mâ é myàng zo kôrâ nghut lhê.
Nghut kôlhang, sum zân nghû râ zàn gi, kyô hkyó mù shû yù keq;
tsibyiq hkyâm pé saí luî, haû mâ é ashi zo keq.
30 Yudaq mau mâ é wó nyi lùt tô é bang gi,
a-ô shut a-myìt dum chín luî, ahtoq shut ashi dum zui râ nghut lhê.
31 Hkâsu mù gâ le, wó nyi myìt tô é bang gi, Yerusalem wà mó mai htoq lô mù,
wó nyi lùt tô é bang gi, Zi-un Bùm mai htoq lô kôrâ nghut lhê.
Haû Wum-o a-tsam dìk shoq bò Sû Yhûmsîng Garai myìt zìng zùq é hkyo èq hau lé kut râ nghut lhê.
32 Haû mù, Asuri hkóhkâm eq séng luî haû Yhûmsîng Garai taî le,
‘Yhang gi, wà mó shî má wàng râ a nghut;
haú má myoshi le bìk râ a nghut.
Yhang gi, hau é hí má gòlong chûng mù wó lé râ a nghut é htoq agó,
haú lé htim râ myì bùm wó dû bùm râ a nghut.
33 Yhang gi, lé lo é hkyô mai taû ló râ nghut mù,
wà mó shî má wàng râ a nghut ga,
haû Yhûmsîng Garai taî pyo ri.
34 Ngò gi, Ngá é yánmai le, Ngá é duìnhâng zoshâng Dawiq é yánmai le,
wà mó shî lé hûng mù, hkyi yù râ nghut lhê!’ gâ ri.” gâ é nghut ri.
35 Haú myîn, haû Yhûmsîng Garaî é maumang gi, htoq ê luî, Asuri gyèwap mâ é byù 185000 lé sat pyâm ri. Htang nàpkyó bûn lo bùm kô é hkûn, màng pé baú dùt to láng bê nghut ri! 36 Haû mù, Asuri hkóhkâm Senahkerip gi, gyèwap hpyoq chûng mù, Ninewe wà mó shut ló taû nyi nyì bê nghut ri.
37 Ra-nyí lé, yhang gi, yhâng é hparà Nisirok é noqkuq yhûm má noq nyi é u lé, yhang zô nhik Adaram-melek eq Sharezera gi, yhang lé sham èq zân sat pyám mù, Ararat mau shut hpang e ló byùq akô nghut ri. Haû mù, yhang zo Esarahadon gi, yhâng é hkóhkâm hkô má zùng bê nghut ri.