Hezeki-a Shî Nò No É Hkyô
20
Haú yòq haú bun pé má, Hezeki-a gi, awáng nòhpyo hui luî, shî nò no nyi ri. Amozi é yhang zo myìqhtoi Esai-a gi, yhâng chyáng ê mù, “Haû Yhûmsîng Garai taî le, ‘Nàng gi, wó gê râ a nghut lo, shî râ nghut bê yánmai, náng é yhûm i-kun hkyô madàt rago taî to aq.’ gâ ri.” ga taî ri.2 Haû mù, Hezeki-a gi, xêwâm shut myòqdong hû luî, haû Yhûmsîng Garai lé, 3 “Yhûmsîng Garai ê, ngò, Náng é hí má jujúm myìt mai i-myìt nhiklhum bànshoq èq hkâsu kut sô lai bê eq Náng é myòq hí má ge é hkyô lé châng kut bê lé, bun byi laq ô!” ga kyûdûng ri. Hau htâng, Hezeki-a gi, wum kat yhang ngaù bê nghut ri.
4 Esai-a gi, htoq ló mù, hkóhkâm wâng agùng má a jé shi-má, haû Yhûmsîng Garaî é mungdang yhâng chyáng jé é gi, 5 “Taû wang ló mù, Ngá é byu pê é zau Hezeki-a lé shî su nghû taî kyo aq; Náng é îchyí îwa Dawiq é Garai Gasang nghut é, haû Yhûmsîng Garai taî le, ‘Ngò gi, náng é kyûdung dang lé wó gyo mù, náng é ngaùbyi lé myàng byi bê nghut lhê; Ngò gi, nang lé yâ gè byi râ nghut lhê. Ahkuî mai súm nyí nghû râ nyí má, nàng gi, haû Yhûmsîng Garaî é noqkuq yhûm shut dòq ê ra râ nghut lhê. 6 Ngò gi, nang lé chyungxe zànwut raxe ngo zân xoq byi râ nghut lhê. Ngò gi, nang lé le, wà mó shî lé le, Asuri hkóhkam é lòq mai hkyi yù râ nghut lhê. Ngò gi, Ngá é yánmai le, Ngá é duìnhâng zoshâng Dawiq é yánmai le, wà mó shî lé hung yù râ nghut lhê.’ gâ ri.” gâ ri.
7 Hau htâng, Esai-a gi, “Byìng lé hup râ matú hkohúm-shi long hen lajang keq.” ga taî ri. Haú hkûn, yhángmòq yu lé lô mù, haû byìng htoq má hup byi jáng, byìng haû ge ló byùq bê nghut ri.
8 Hau htâng, Hezeki-a gi, Esai-a lé, “Haû Yhûmsîng Garai, ngo lé lhoqgê byi râ eq, ahkuî mai sum nyí nghû râ nyí má, ngò, haû Yhûmsîng Garaî é noqkuq yhûm shut dòq ê râ gi, hkâsû é alhô agàn dùt htoq râ nghut lhê lhú?” ga myî ri.
9 Haú hkûn, Esai-a gi, “Haû Yhûmsîng Garai gi, Yhang danghtum htûm tô é lé kut râ nghut mù, náng é matú Yhûmsîng Garaî é alhô agàn gi, shí dông nghut râ nghut lhê; buìshûm lé, hí shut raxê byè huî ê râ lhú? Haû a nghut jáng, htâng shut raxê byè taû zùt râ lhú?” ga tû taî ri.
10 Hezeki-a gi, “Buìshûm hí shut raxê byè huî e ló râ gi, lui lhê; haú dông a nghut, htâng shut raxê byè taû zùt ló nhâng àq.” ga taî ri.
11 Haû mù, myìqhtoi Esai-a gi, haû Yhûmsîng Garai lé wùt dûng é nghut mù, haû Yhûmsîng Garai gi, Ahaza é zùmhtâng má shum nghop ló bê buìshûm lé, raxê mhak dum taû hkyô yù bê nghut lhê.
Babelon Mâ É Lagyô Pé
12 Haú u lé, Babelon hkóhkâm, Baladan é yhang zo Merodak Baladan gi, Hezeki-a awáng nòhpyo huî nyi é hkyô lé wó gyo luî, yhâng chyáng laiká pé eq chyûnghuq hun kat ri. 13 Hezeki-a gi, haû lagyô pé lé lhom pang yù mù, yhâng é sùtzè kat tô é yhûm mâ é ngùn, hîng, namngón jung, hpaû jung tsanlun xû eq yhâng é gyèzè bànshoq lé le, yhâng é sùt-púnglhúng pé má bo é jung hkangmó lé le, bànshoq tsing tûn shit ri. Hezeki-a gi, yhâng é hkóhkâm wâng eq yhâng é mîngdán mâ é lhúnglháng lé a tûn shit é, haî le a jòq nghut ri.
14 Haú hkûn, myìqhtoi Esai-a gi, Hkóhkâm Hezeki-a chyáng ê mù, “Byù shí bang haî taî akô lhú? Yhángmòq gi, hká mai lé é bang nghut akô lhú?” ga ê myî ri.
Hezeki-a gi, “Yhángmòq gi, gyai wê é mau Babelon mai lé é bang nghut akô.” ga tû taî ri.
15 Myìqhtoi gi, “Yhángmòq, náng é hkóhkâm wâng má haî myàng bekô lhú?” ga myi jáng, Hezeki-a gi, “Ngá é hkóhkâm wâng mâ é jung hkang jung mó lé yhángmòq myàng bekô nghut ri; ngò, ngá é sùtdò pé mâ é, yhángmòq lé a tûn shit é, haî lháng a jòq lô é nghut lhê.” ga taî ri.
16 Haû mù, Esai-a gi, Hezeki-a lé, “Haû Yhûmsîng Garaî é dang lé gyo aq; 17 Yhûmsîng Garai taî le, ‘Náng é hkóhkâm wâng mâ é jòq mîjòq lé le, hkû-nyí jé shoq náng é îchyí îwâ pé hkong tô é lhúnglháng lé le, Babelon wà mó shut hkyom yu ló é ahkyíng hkyak jé râ nghut lhê. Haî le myìt to râ a nghut. 18 Náng é ûng gyó suisho mâ é awùt ashín pé ra-am gi, shuî ló byùq é hui mù, Babelon hkóhkam é wâng mâ é u-nuk pé dùt kôrâ nghut lhê.’ gâ ri.” ga taî ri.
19 Haú hkûn, Hezeki-a gi, “Ngá é i-pyàt má nguì ngón yùqyò râ nghut lhê.” ga myìt yù luî, “Nàng taî é, Yhûmsîng Garaî é dang gi, ge ri.” ga tû taî ri.
20 Hezeki-a ùp é gótû hkyô pé lé le, yhang wó ûngmyuq é hkyô bànshoq lé le, wuìhtum eq wà hkaû má wuì she hâng é wuìhkyo lé, yhang hkâsu kut saî é lé le, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 21 Hezeki-a gi, yhâng é îchyí îwâ pê chyáng ló bo bánnô byùq bê nghut ri. Haû mù, yhang zo Manase gi, yhâng é hkóhkâm hkô má zùng bê nghut ri.