Yudaq Hkóhkâm Manase
21
Manase gi, chyungxe zànwut raxe í zân má hkóhkâm dùt mù, Yerusalem wà mó má ngó xe ngo zân ùp ri. Yhâng nû é myìng gi, Hepziba nghut ri. 2 Yhang gi, Isira-elaq byu pê é hí mai haû Yhûmsîng Garaî èq hkat htoq pyám bê nghut é gótû a-myû wui é achaq achyut hkyô cháng luî, haû Yhûmsîng Garaî é myòq hí má agè ashop é hkyô kut ri. 3 Yhang gi, yhâng wa Hezeki-a lhoqhtên pyám bê nghut é myhang é hparà noq jowò pé lé dum saî saí mù, Isira-elaq hkóhkâm Ahap kut é eq rajung za, Balaq hparà pê é hkungga gyàp pé lé saî tsûng luî, Ashera hparà zìng pé lé saî shap mù, mauhkûng mâ é kyî pé bànshoq lé paî gòp noqkuq ri. 4 Yhang gi, haû Yhûmsîng Garai mai, “Yerusalem wà mó má Ngá é Myìng ahtum abyùq jòq nyì râ nghut lhê.” ga taî é, haû Yhûmsîng Garaî é noqkuq yhûm má gótû hkungga gyàp pé saî jàt tô ri. 5 Dum, yhang gi, haû Yhûmsîng Garaî é noqkuq yhum é wâng í jowò má, mauhkûng mâ é kyî bànshoq é matú hkungga gyàp pé saî ri. 6 Hau htoq agó, yhang gi, yhûmsing yhang zo lé nyhê nhông byi luî, bùt hpyit é eq bùt wú é hkyô kut mù, sôbyô dàt ji é bang eq bùt hpyit bâng chyáng mai hpàqchyî yu ri. Yhang gi, haú dông mai Yhûmsîng Garaî é myòq hí má agè ashop é hkyô myo myo kut mù, Yhang lé nhikjum lhoqyô ri.7 Yhang gi, yhang saî é kyûng tô é Ashera hparà zìng lé yù mù, noqkuq yhûm má kat tô ri; nghut kôle, noqkuq yhûm haû eq séng luî, haû Yhûmsîng Garai gi, Dawiq eq yhang zo Sholumon lé, “Ngò gi, Isira-elaq a-myû up bànshoq mai hkyin htoq yu é noqkuq yhûm shî eq Yerusalem wà mó má Ngá é myìng lé ahtum abyùq tô to râ nghut lhê. 8 Ngá é duìnhâng zoshâng Mosheq dông yhángmòq lé byî tô é târâ pé bànshoq lé cháng mù, yhángmòq lé Ngò hkunmó hkyô tô é jung hkangmó lé, yhángmòq rago châng kut kô é za nghut jáng, Ngò gi, yhángmòq é îchyí îwâ pé lé byî tô é mau mai Isira-elaq byu pé lé dum lám yông wún nhâng râ a nghut.” ga taî tô ri. 9 Nghut kôlhang, shiwa byu pé gi, a gyo kó nghut ri. Manase gi, yhángmòq lé hkyô shuî nghoq é nghut mù, yhángmòq gi, haû Yhûmsîng Garaî èq Isira-elaq byu pê é hí má lhoqhtên pyám bê nghut é gótû byù myû wui htoq je riyhang agè ashop hkyô kut akô nghut ri.
10 Haû mù, Yhûmsîng Garai gi, Yhâng é duìnhâng zoshâng myìqhtoî pé dông mai, 11 “Yudaq hkóhkâm Manase gi, achaq achyut múzó shí pé kut bê nghut ri. Yhang gi, yhâng é hí má nyi laî lo é Amori byu pê htoq je riyhang agè ashop é hkyô kut mù, yhâng é hparà lhô pé èq Yudaq byu pé lé mara shuî kut shut bê nghut ri. 12 Haû mù, Isira-elaq é Garai Gasang, haû Yhûmsîng Garai shî su ga taî ri; Ngò gi, haû danglù wó gyo bang yùq hkangmó é nohkyap í hkyap é maú dan byùq shoq, Yerusalem wà mó eq Yudaq mau má ihkyùp mó gyó nhâng râ nghut lhê. 13 Ngò gi, Samariq wà lé kê wú é tuî èqa le, Ahap é yhûm lé kê wú é chuî lhang tuî èq le, Yerusalem wà mó ahtoq má ké râ nghut lhê. Ngò gi, hkoq pé lé sut shang pyám mù, nghop pyâm é su, Yerusalem wà mó lé shûm pyám râ nghut lhê. 14 Ngò gi, nyi myìt gyó tô é Ngá é silî wunlî a-myû lé tô pyâm to mù, yhángmòq lé gye pê é lòq má àp pyám râ nghut lhê. Yhángmòq gi, yhángmòq é gyè pé bànshoq bâng èq lú yû zìk yu é hui zo kôrâ nghut lhê. 15 Hkâsu mù gâ le, yhángmòq gi, yhángmòq é îchyí îwâ pé Egutuq ming mai htoq lo é buìnyì mai hkû-nyí jé shoq, Ngá é myòq hí má agè ashop é hkyô kut kômù, Ngo lé nhikjum lhoqyô akô nghut ri.” ga taî ri.
16 Hau htoq agó, Manase gi, Yudaq byu pé lé, haû Yhûmsîng Garaî é myòq hí má agè ashop é hkyô kut râ matú, mara kut shut nhang é htoq agó, mara a bo é byù myo myo lé sat pyâm é nghut mù, haú bâng é sui gi, Yerusalem wà mó rahtâng mai góhtâng jé shoq byíng zan tô é nghut ri.
17 Manase ùp é gótû hkyô pé, yhang kut laî lo é hkyô bànshoq eq yhang mara kut shut é hkyô pé lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 18 Manase gi, yhâng é îchyí îwâ pé eq ló bo bánnô byùq bê nghut mù, Uza é hkyâm nghut é, yhâng é hkóhkâm wâng hkyâm má myhup yhûm pyâm é huî ri. Haû mù, yhang zo Amon gi, yhâng é hkóhkâm hkô má zùng bê nghut ri.
Yudaq Hkóhkâm Amon
19 Amon gi, chyungxe zànwut í xe í zân má hkóhkâm dùt mù, Yerusalem wà mó má í zân ùp ri. Yhâng nu gi, Yotba wà mâ é Haruza é yhang zo byìzo Meshulemet ga sû nghut ri. 20 Amon gi, yhâng wa Manase kut é su, haû Yhûmsîng Garaî é myòq hí má agè ashop é hkyô kut ri. 21 Yhang gi, yhâng wa kut é hkyô bànshoq lé châng kut é nghut mù, yhâng wa noqkuq é hparà hpôlhô pé lé noqkuq luî, paî ngóm gòp ri. 22 Yhang gi, yhâng é îchyí îwâ pê é Garai Gasang, haû Yhûmsîng Garai lé tô pyâm to mù, Yhâng é jì-no a gyo kut ri.
23 Amon é zaugun wuì gi, yhang lé gumlau toq kômù, yhâng é hkóhkâm wàng má yhang lé sat pyâm akô nghut ri. 24 Haû mù, mingbyû wuì gi, Hkóhkâm Amon lé gumlau toq é bànshoq bang lé sat pyám kômù, yhang zo Yosi-a lé yhâng wâ é hkóhkâm hkô má zùng nhâng bekô nghut ri.