Yudaq Hkóhkâm Yosi-a
22
Yosi-a gi, chyungxe zànwut shit zân má hkóhkâm dùt mù, Yerusalem wà mó má súm xe razàn ùp ri. Yhâng nu gi, Bozakat wà mâ é Adai-a é yhang zo byìzo Yedida ga sû nghut ri. 2 Yhang gi, haû Yhûmsîng Garaî é myòq hí má jo têng é hkyô kut mù, lòqyò lòqpai a jau ló byùq é za, yhâng é îchyí îwa Dawiq é hkyô pé má hkyak châng sô ri.Târâ Laiká Bùk Lé Myang É Hkyô
3 Hkóhkâm Yosi-a gi, yhang hkóhkâm kut é raxe shit zan zàn má, Meshulam é yhang shu, Azali-a é yhang zo, kâ xûm hpó Shahpan lé, haû Yhûmsîng Garaî é noqkuq yhûm shut nhang kat mù, 4 “Hkyangjong mó Hiliki-a chyáng dòq ê mù, shiwa byu pê chyáng mai hkum zúng bang hkyui yù luî, haû Yhûmsîng Garaî é noqkuq yhûm má yu lé é ngùn lé nghap gam ge to nhâng keq. 5 Gam hkoq ge to bê nghut é ngùn lé, noqkuq yhûm má múzó wú gôn é bang lé àp byi nhâng mù, haú bang gi, haû Yhûmsîng Garaî é noqkuq yhûm saî saî é bang lé gàm byi kó sháng gàq; 6 haû làksima pé, yhûm saí bang eq tsohtung ge saí bang lé tsing gàm byi nhâng mù, noqkuq yhûm saî saí râ matú, sik eq kyûng yúng tô é lùqgòk htung pé lé tsing wuì nhâng àq. 7 Nghut kôlhang, yhángmòq gi, jujúm bang nghut é yánmai, yhángmòq lé àp byî tô é ngùn lé, jihpán dung nó a ra.” ga châng taî kat ri.
8 Hkyangjong mó Hiliki-a gi, kâ xûm hpó Shahpan lé, “Ngò gi, haû Yhûmsîng Garaî é noqkuq yhûm má Târâ Laiká Bùk myang ho ri.” ga taî ri. Haû mù, yhang gi, Shahpan lé laiká bùk haû byî é nghut mù, Shahpan gi, haú lé nghap ri. 9 Hau htâng, kâ xûm hpó Shahpan gi, hkóhkam chyáng ló mù, yhang lé, “Náng é duìnhâng zoshâng wuì gi, haû Yhûmsîng Garaî é noqkuq yhûm mâ é ngùn lé yù mù, noqkuq yhûm má mú zui bang eq múzó wú gôn é bang lé àp byî to bê nghut lhê.” ga shit kyô ri. 10 Hau htoq agó, kâ xûm hpó Shahpan gi, hkóhkâm lé, “Hkyangjong Hiliki-a gi, ngo lé laiká bùk rabùk àp byî ri.” ga taî kyo luî, laiká haú lé hkóhkam é hí má nghap kyô ri.
11 Hkóhkâm gi, Târâ Laiká Bùk haú mâ é dang pé lé wó gyo jáng, yhâng é buhîng lé lâng cheq pyâm ri. 12 Haû mù, yhang gi, hkyangjong Hiliki-a, Shahpan é yhang zo Ahikam, Mihkai-a é yhang zo Akbora, kâ xûm hpó Shahpan eq hkóhkam é duìnhâng zoshâng Asai-a pé lé hkunmó pé hkyô ri. Hkunmó haû gi, 13 “Shî myang yu é laiká bùk má kâ tô é eq séng luî, ngá é matú le, shiwa byu pé eq Yudaq byu pé bànshoq bâng é matú le, haû Yhûmsîng Garai lé ê myî wú keq. Hkâsu mù gâ le, ngá-nhûng é îchyí îwâ pé gi, laiká bùk shî mâ é dang pé lé a cháng kô é nghut mù, haû Yhûmsîng Garai gi, ngá-nhûng é ahtoq má nhikjum mó yo bê nghut ri. Yhángmòq gi, ngá-nhúng eq séng luî laiká bùk shî má kâ tô é bànshoq eq rajung za a kut kó nghut ri.” gâ é nghut ri.
14 Haû mù, hkyangjong Hiliki-a, Ahikam, Akbora, Shahpan eq Asai-a pé gi, Harihasa é yhang shu, Tikwa é yhang zo, mèbu zúng é Shalum é yhûmsîng myhí nghut sû myìqhtoi myhí Hulada lé ê huî nyò râ ga e akô nghut ri. Myiwe myhí haû gi, Yerusalem wà mó mâ é Wà Sik dum má nyi é nghut ri.
15 Myìqhtoi myhí haû gi, yhángmòq lé, “Isira-elaq é Garai Gasang, haû Yhûmsîng Garai shî su ga taî ri; ngá chyáng núngmòq lé nhang kat sû lé ló taî kyo keq; 16 ‘Haû Yhûmsîng Garai shî su ga taî ri; Ngò gi, Yudaq hkóhkâm nghap é laiká bùk má kâ tô é eq rajung za, shí jowò eq shí jowò má nyi é byu pê é ahtoq má, wuîhke jamjau mó jé nhâng râ nghut lhê. 17 Hkâsu mù gâ le, yhángmòq gi, Ngo lé tô pyâm to kôluî, gótû hparà lhô pé lé namngón jung nyhê nhông byi kômù, yhángmòq é lòq èq saî é hparà alhô bànshoq dông Ngo lé nhikjum lhoqyo bekô nghut mù, Ngò gi, shí jowò lé nhikjum mó yo râ nghut luî, hkâ-nhám le zîm byùq râ a nghut.’ gâ ri. 18 Haû Yhûmsîng Garai lé myî wú râ matú núngmòq lé nhang kat é Yudaq hkóhkâm lé taî kyo keq; ‘Nàng wó gyo bê mungdang pé eq séng luî, Isira-elaq é Garai Gasang, haû Yhûmsîng Garai shî su ga taî ri; 19 shí jowò eq shí má nyi é byu pé gi, chamchyuîyuì dùt byùq râ eq dâkam pyâm é hui râ nghû Ngò taî é hkyô lé, nàng wó gyô é hkûn, nàng gi, i-myìt nyhôm lò mù, haû Yhûmsîng Garaî é hí má myìt lhoqnyhûm luî, náng é buhîng lé lâng cheq pyám mù, Ngá é hí má ngaù bê nghut é yánmai, Ngò gi, nang lé gyo byi bê nghut lhê. Haû gi, Yhûmsîng Garai taî pyo ri. 20 Haû mù, Ngò gi, nang lé, náng é îchyí îwâ pê chyáng shuî zùp râ nghut mù, nàng gi, ngón za myhup yhûm pyâm é hui râ nghut lhê. Shí jowò má, Ngò htûng hui zo nhâng râ nghut é wuîhke jamjau mó bànshoq lé, náng é myòq èq myàng râ a nghut.’ gâ ri.” ga taî ri.
Haû mù, yhángmòq gi, myìqhtoi myhí haû tû taî é dang lé, hkóhkam chyáng ló shit kyo bekô nghut ri.