Yosi-a Dangshikaq Dum Saî Tô É Hkyô
23
Hau htâng, Hkóhkâm Yosi-a gi, Yudaq mau eq Yerusalem wà mó mâ é sûwún wuî bànshoq lé ji yu ri. 2 Haû mù, yhang gi, Yudaq byu pé, Yerusalem wà byu pé, hkyangjông pé eq myìqhtoi pé, tiq zo ko zo bànshoq bang eq rahá, haû Yhûmsîng Garaî é noqkuq yhûm shut dòq ê mù, haû Yhûmsîng Garaî é noqkuq yhûm má myang é Dangshikaq Laiká bùk mâ é dang pé bànshoq lé, yhángmòq gyô tô é hí má nghap kyô ri. 3 Hkóhkâm hpó gi, zìng nàm má yàp to mù, laiká bùk haú má kâ tô é dangshikaq pé lé lhoq gingtîng to râ matú, haû Yhûmsîng Garaî htâng cháng luî, Yhâng é hkunmó pé, cháng ra târâ pé eq târâ wàng hkunmó pé lé, i-myìt nhiklhum bànshoq eq i-myìt sô bànshoq èq châng kut râ hkyô lé, haû Yhûmsîng Garaî é hí má dangshikaq saî tô tô ri. Haû mù, shiwa byù bànshoq bang gi, dangshikaq haú lé yín yu bum akô nghut ri.4 Hau htâng, hkóhkâm gi, Balaq hparà, Ashera hparà alhô eq kyî ajùm ayò bànshoq lé noq râ matú saî tô é zèhkoq bànshoq lé, haû Yhûmsîng Garaî é noqkuq yhûm mai yu htoq pyám râ matú, hkyangjong mó Hiliki-a, hkyangjông pé eq hkum zúng bang lé hkunmó hkyô ri. Yhang gi, zèhkoq haú pé lé, Yerusalem wà mó shinggan, Kidron Langhkaû mâ é pá má nyhê pyám mù, myi-mhop lé, Behtela wà shut yu ló ri. 5 Hau htoq agó, yhang gi, Yudaq wà pé mâ é myhang é hparà noq jowò pé eq Yerusalem wà mó awui ayàm má, namngón jung nyhê nhông byi râ matú, Yudaq hkóhkam pé mai wò byî tô é, hparà hpôlhô pé eq sêng é hkyangjông pé nghut é, Balaq hparà, buì, lha-mó, kyî hpúng azòng eq kyî ajùm ayò bànshoq lé namngón jung nyhê nhông byî é bang lé, hkat htoq pyâm ri. 6 Yhang gi, Ashera hparà zìng lé, haû Yhûmsîng Garaî é noqkuq yhûm mai yu htoq mù, Yerusalem wà mó shinggan mâ é Kidron Langhkaû shut yu ê luî, haú má nyhê hkyô pyâm ri. Hau htâng, yhang gi, haú lé bàt mhun yù luî, mâyû byu pê é lùpdùng má sân pyâm ri. 7 Yhang gi, Ashera hpara é matú myiwe wuì pán-gyang wòq é jowò nghut é, haû Yhûmsîng Garaî é noqkuq yhûm má jòq é, shiwa hpô pê é nyì jowò lé lhoqhtên pyâm ri.
8 Yosi-a gi, hkyangjông pé bànshoq lé, Yudaq wà pé mai shuî tsîng yù mù, hkyangjông pé mai namngón jung nyhê nhông byî é jowò pé nghut é, myhang é hparà noq jowò pé lé, Geba wà mai Berasheba jé shoq achaq achyut kut pyâm ri. Hau htoq agó, yhang gi, wà zau Yoshuq é wâng hkúmdong nàm, wà wàng hkum lòqpaî hkyam má jòq é myhang é jowò pé lé le lhoqhtên pyâm ri. 9 Myhang é hparà noq jowò pé mâ é hkyangjông pé gi, Yerusalem wà mó mâ é, haû Yhûmsîng Garaî é hkungga gyàp má a é wó dójaú kôlhang, yhángmòq é hkyangjong luzúm wuî eq rahá múnchi a bo é mùk zô bum akô nghut ri.
10 Yhang gi, ó yùq le, yhûmsing é yùqzo, a nghut jáng, byìzo lé, Molek hpara é matú hkungga a wó nyhê nhông byi sháng gàq ga, Hinom Zo gâ é Langhkaû má jòq é Tohpet jowò lé achaq achyut kut pyâm ri. 11 Yhang gi, haû buì lé nhông byî tô é Yudaq hkóhkam pê é myang pé lé, wâng hkum mai haû Yhûmsîng Garaî é noqkuq yhûm má huî htòt kat pyâm ri. Myang haú pé gi, zaugun hpó Nahtan-Melek é wàp nàm mâ é wânghkaû má nyi tô é nghut ri. Hau htâng, yhang gi, buì lé nhông byî tô é gyèlhêng pé lé nyhê hkyô pyâm ri.
12 Yosi-a gi, Ahaza é ahtoq wàp yhûmhkûng htoq má Yudaq hkóhkam pé saî tô é hkungga gyàp pé eq haû Yhûmsîng Garaî é noqkuq yhûm mâ é wâng í wânghkaû má Manase saî tô é hkungga gyàp pé lé huî hkyô pyám mù, haú pé lé ajàp azo dùt shoq bàt hkyop pyám luî, Kidron Langhkaû shut dú hâng pyâm ri. 13 Hkóhkâm Yosi-a gi, Yerusalem wà mó é buìhtoq hkyam, Htên Byòq Bum é maupyî má, Sidon byu pê é ashop é hparà myhí Ashatoret é matú le, Moba é ashop é hparà Hkemosha é matú le, Ammon byu pê é ashop é hparà Molek matú le, Isira-elaq hkóhkâm Sholumon èq saî tô é myhang é hparà noq jowò pé lé, achaq achyut kut pyâm ri. 14 Hau htoq agó, yhang gi, chyoiyúng lùqzìng pé lé bàt hkyop pyám mù, Ashera hparà zìng pé lé le zân hpyit pyám luî, haú pê é jowò pé má byu é showui pé lhoqpyîng tô ri.
15 Hau htoq agó, Isira-elaq byu pé lé mara kut shut nhang é sû, Nebat é yhang zo Yerobo-am mai saî tô é myhang é hparà noq jowò nghut é, Behtela wà mâ é hkungga gyàp lé lháng lhoqhtên pyâm ri. Yhang gi, myhang é hparà noq jowò lé nyhê pyám mù, haú lé lhoqmhun pyám luî, Ashera hparà zìng lé le nyhê hkyô pyâm ri. 16 Hau htâng, Yosi-a gi, lhing wú mù, haû bùm htoq má jòq é lùpdùng pé lé myàng jáng, haû lùpdùng pé mâ é showui showang pé lé pau choq yû nhâng mù, shí hkyô lé te taî to sû mai Garai Gasâng é byù dông taî pyo tô é haû Yhûmsîng Garaî é dang eq rajung za, showui showang haú pé lé hkungga gyàp htoq má nyhê hkyó mù, agòt a-û kut pyâm ri.
17 Hkóhkâm Yosi-a gi, “Haû ngò myang é lùp masàt lùqgòk gi, haî nghut ri lhú?” ga myi jáng, wà byù wuì gi, “Haû Behtela mâ é hkungga gyàp má nàng kut bê é hkyô lé yhang, taî htoq kyô laî lo é, Yudaq mau mai lé é, haû Garai Gasâng é byu é lùp masàt nghut ri.” ga taî kyô akô nghut ri.
18 Haú hkûn, yhang gi, “Haû jòq to sháng gàq. Ó yùq lé le, yhâng é showui showang pé lé hkâzáng nhâng kó.” ga taî ri. Haû mù, yhángmòq gi, yhâng é showui pé eq Samariq wà mai lé é myìqhtoi hpô é showui showang pé lé myhit hkyô tô akô nghut ri.
19 Yosi-a gi, Isira-elaq hkóhkam pé mai, haû Yhûmsîng Garai lé nhikjum lhoqyo shoq, Samariq é wà pé mâ é myhang é hparà noq jowò pé má saî tô é hparà noq jang pé bànshoq lé, Behtela wà mó má kut é eq rajung za, lhoqhtên pyâm ri. 20 Yhang gi, myhang é hparà noq jowò haú pé mâ é hkyangjông pé bànshoq lé, hkungga gyàp pê htoq má sat pyám mù, hau é ahtoq má byu é showui pé lé nyhê hkyô pyâm ri. Hau htâng, yhang gi, Yerusalem wà mó shut taû ló bê nghut ri.
Lhoqlhai Poî Kut É Hkyô
21 Hkóhkâm gi, shiwa byù bànshoq lé, “Haû Dangshikaq Laiká Bùk má kâ tô é eq rajung za, núngmòq é Garai Gasang nghut é, haû Yhûmsîng Garaî é matú Lhoqlhai Poî kut keq.” ga hkunmó hkyô ri. 22 Isira-elaq mau lé shuî-û laî lo é târâ agyì pê é i-pyàt mai, Isira-elaq hkóhkam pé eq Yudaq hkóhkam pê é i-pyàt pé má, haú sû é Lhoqlhai Poî a kut wú kó nghut ri. 23 Nghut kôlhang, Hkóhkâm Yosi-a ùp é raxe shit zan zàn má, Lhoqlhai Poî shí lé, haû Yhûmsîng Garaî é matú, Yerusalem wà mó má kut bê nghut ri.
24 Hau htoq agó, Yosi-a gi, haû Yhûmsîng Garaî é noqkuq yhûm má, hkyangjong Hiliki-a myang é laiká bùk má kâ tô é târâ lé lhoqdìk pyâm é dông, sôbyô dàt ji é bang eq bùt hpyit bang, yhûmwù nàt zòng pé eq hparà hpôlhô pé, Yudaq mau eq Yerusalem wà mó má myang é gótû achaq achyut é zè pé bànshoq lé huî sêng pyâm ri. 25 Mosheq é Târâ bànshoq eq rajung za, yhâng é i-myìt nhiklhum bànshoq, i-myìt sô lhum gón eq wum-o a-tsam bànshoq èq, Yosi-a su kut haû Yhûmsîng Garaî chyáng lhing taû ló é hkóhkâm, yhâng é hí má le, yhâng é htâng má le, rayùq lháng a htoq nghut ri.
26 Nghut kôlhang, haû Yhûmsîng Garai lé nhikjum lhoqyo râ matú, Manase kut é hkyô bànshoq é yánmai, Yhûmsîng Garai gi, Yudaq a-myû lé nhikjum gyai yô é myìt châm byùq râ a nghut. 27 Haû mù, Yhûmsîng Garai gi, “Ngò, Isira-elaq a-myû lé hkat htoq pyâm é su, Yudaq a-myû lé le Ngá é myòq hí mai hkat htoq pyám râ nghut lhê. Ngò gi, Ngò hkyin yu é wà Yerusalem lé le, ‘Ngá é myìng haú má jòq nyì râ nghut lhê.’ nghû Ngò taî é noqkuq yhûm shí lé le, he-ngìk pyám râ nghut lhê.” ga taî ri.
28 Yosi-a ùp é gótû hkyô pé eq yhang kut é bànshoq lé gi, Yudaq hkóhkam pê é mhô-myi shindâm laiká bùk má tsing kâ tô lhê, a nghut lhí?
29 Yosi-a hkóhkâm kut é u, Egutuq hkóhkâm Hpara-uq Nehko gi, Asuri hkóhkâm lé garúm râ matú, Uhprat Làng shut dòq e ri. Hkóhkâm Yosi-a gi, majan má yhang lé hui râ ga htoq e ló ri; nghut kôlhang, Nehko gi, Megido jowò má yhang lé hui mù, sat pyám bê nghut ri. 30 Yosi-a é duìnhâng zoshâng wuì gi, Megido mai Yerusalem wà mó má yhâng é màng lé gyèlheng èq htô lò kômù, yhâng é lùp má yhang, myhup yhûm pyám bekô nghut ri. Haû mù, mingbyû wuì gi, Yosi-a é yhang zo Yeho-ahaza lé ji yù mù, sô kat namngón xû bùt byi luî, yhâng wâ é hkô má hkóhkâm kut nhang bekô nghut ri.
Yudaq Hkóhkâm Yeho-ahaza
31 Yeho-ahaza gi, chyungxe zànwut í xe sum zân má hkóhkâm dùt mù, Yerusalem wà mó má lha-mó sum hkyap ùp ri. Yhâng nu gi, Lipna wà mâ é Yeremi-aq é yhang zo byìzo Hamutala nghut ri. 32 Yhang gi, îchyí îwâ pé kut é eq rajung za, haû Yhûmsîng Garaî é myòq hí má, agè ashop é hkyô kut bê nghut ri. 33 Hpara-uq Nehko gi, Yeho-ahaza lé, Yerusalem wà mó má a wó ùp shoq, Hamat mau mâ é Ribala wà mó má kyum hut pyám luî, Yudaq byu pé lé, ngùnhtung rahkying rashô joí eq hîng raxe rajoí chup yu ri. 34 Hau htâng, Hpara-uq Nehko gi, Yosi-a é yhang zo Eli-akim lé, yhâng wa Yosi-a é hkô má hkóhkâm kut nhâng mù, Eli-akim é myìng lé Yehoi-akim ga htaî myíng byî ri. Nghut kôlhang, yhang gi, Yeho-ahaza lé Egutuq ming shut shuî ló é nghut mù, Yeho-ahaza gi, haú má shi byùq bê nghut ri. 35 Yehoi-akim gi, Hpara-uq Nehko hkunmó hkyô é eq rajung za, yhang lé ngùn eq hîng byî ri; yhang gi, hkóhkâm lé haû wó byi râ matú, mingbyû wui chyáng mai, yhángmòq wó é má cháng luî, hkán hkyuî mù, ngùn eq hîng tsing hkyui yu ri.
Yudaq Hkóhkâm Yehoi-akim