24
Yehoi-akim ùp nyi é u má, Babelon hkóhkâm Nebuhkatneza gi, Yudaq mau lé majan lé zan mù, Yehoi-akim lé sum zân yhang, yhâng é lòq má zuî zing pyám bê nghut ri. Nghut kôlhang, Yehoi-akim gi, myìt htaî lhik pyám mù, Nebuhkatneza lé gumlau toq bê nghut ri. 2 Haû Yhûmsîng Garai gi, Yhâng é duìnhâng zoshâng myìqhtoî pé dông mai taî tô é Yhâng é dang eq rajung za, Yudaq mau lé lhoqhtên pyám râ matú, Babelon byù gyè hpúng, Aram byù gyè hpúng, Moba byù gyè hpúng eq Ammon byù gyè hpúng pé lé nhang kat ri. 3-4 Shí hkyô pé dùt htoq é gi, Manase kut shut é yubàk mara pé bànshoq eq mara a bo é sui lé yhang lhoqshun pyâm é yánmai le, Yerusalem wà mó má mara a bò bâng é sui lhoqpyîng é yánmai le, haû Yhûmsîng Garai, yubàk mara haú lé a hkyut byi nhô nghut mù, Yudaq byu pé lé, Yhâng é myòq hí mai hkat htoq pyám râ matú, haû Yhûmsîng Garai tô tô é hkunmó eq rajung za hkyak dùt é nghut ri.5 Yehoi-akim ùp é gótû hkyô pé eq yhang kut laî lo é bànshoq lé gi, Yudaq hkóhkam pê é mhô-myi shindâm laiká bùk má kâ tô lhê, a nghut lhí? 6 Yehoi-akim gi, yhâng é îchyí îwâ pé eq ló bo bánnô byùq bê nghut mù, yhang zo Yehoi-ahkin gi, yhâng é hkóhkâm hkô má zùng bê nghut ri.
7 Egutuq hkóhkâm gi, yhâng é ming mai a htoq lô lo nghut ri; hkâsu mù gâ le, Babelon hkóhkâm gi, Egutuq hkóhkâm ùp é maumyî bànshoq lé, Egutuq ming mâ é Wuìlàng mai Uhprat gâ é Wuìlàng jé shoq lú sing yu pyám byî é yánmai nghut ri.
Yudaq Hkóhkâm Yehoi-ahkin
8 Yehoi-ahkin gi, chyungxe zànwut raxe shit zân má hkóhkâm dùt mù, Yerusalem wà mó má lha-mó sum hkyap ùp ri. Yhâng nu gi, Yerusalem wà mó mâ é Elinahtan é yhang zo byìzo Nehushata nghut ri. 9 Yhang gi, yhâng wa kut é eq rajung za, haû Yhûmsîng Garaî é myòq hí má agè ashop é hkyô kut ri.
10 Haú u má, Babelon hkóhkâm Nebuhkatneza é zaugun wuì gi, Yerusalem wà mó lé majan lé zan mù, haú lé lé lóm tô akô nghut ri; 11 Nebuhkatneza gi, yhâng é zaugun wuì wà mó haú lé lé lóm to kô é u, yhânggùng yhang dòq jé lé ri. 12 Haú hkûn, Yudaq hkóhkâm Yehoi-ahkin, yhâng nu, yhâng é duìnhâng zoshâng wuì, yhâng é nhik bô sûwún wuî eq zaugun wuì bànshoq bang gi, Babelon hkóhkam chyáng yhángmòq sum bê hkyô ê hkam yu akô nghut ri.
Haû mù, Babelon hkóhkâm gi, yhang hkóhkâm kut é shit zan zàn má, Yehoi-ahkin lé htóng byû dông chyup yû bê nghut ri. 13 Hau htoq agó, haû Yhûmsîng Garai taî tô é eq rajung za, Nebuhkatneza gi, Yhûmsîng Garaî é noqkuq yhûm eq hkóhkâm wâng mâ é sùtzè pé lé sing yù mù, haû Yhûmsîng Garaî é noqkuq yhum é matú, Isira-elaq hkóhkâm Sholumon saî tô é hîng zèhkoq pé lé lhoqhkyop pyâm ri. 14 Yhang gi, Yerusalem wà mó mâ é, zaugun wuì bànshoq, gyè zan sarhê pé, mú zui kung bang bànshoq eq jòqtoq mú zui bang, bànshoq byù ra-mun lé shúm byû dông chyup shuî ló bê nghut ri. Haú mau mâ é myung dik é bang lé za nyhi hkyô to hkô ri.
15 Nebuhkatneza gi, Yehoi-ahkin lé le, hkóhkam é yhâng nu eq yhâng é yhûmsîng myhî pé lé le, yhâng é zaugun wuì eq haú mau mâ é zau wuî lé le, Yerusalem wà mó mai Babelon wà mó shut shúm byû dông tsing chyup shuî ló bê nghut ri. 16 Hau htoq agó, Babelon hkóhkâm gi, majan wó zan bê é, wum bô wàqngân nyhit hkyîng yùq lé le, mú zui kung bang eq jòqtoq mú zui bang rahkyîng yùq lé le, Babelon wà mó shut chyup shuî ló bê nghut ri. 17 Hau htâng, yhang gi, Yehoi-ahkin é yhâng wa bok Matani-a lé, Yehoi-ahkin é hkô má hkóhkâm kut nhâng mù, yhâng é myìng lé Zedeki-a ga htaî myhíng byî ri.
Yudaq Hkóhkâm Zedeki-a
18 Zedeki-a gi, chyungxe zànwut í xe razàn má hkóhkâm dùt mù, Yerusalem wà mó má raxe razàn ùp ri. Yhâng nu gi, Lipna wà mó mâ é Yeremi-aq é yhang zo byìzo Hamutala nghut ri. 19 Yhang gi, Yehoi-akim kut é eq rajung za, haû Yhûmsîng Garaî é myòq hí má agè ashop é hkyô kut ri. 20 Haû Yhûmsîng Garai gi, Yerusalem wà mó eq Yudaq mau lé, Yhâng é myòq hí mai shang pyâm é buìnyì jé shoq, nhikjum yô nyi é yánmai, shí hkyô pé bànshoq dùt htoq é nghut ri.
Haû mù, Zedeki-a gi, Babelon hkóhkâm lé htuqhtíng gumlau bê nghut ri.