Yerusalem Gyop Gyó É Hkyô
25
Haû mù, Zedeki-a ùp é gaú zan zàn, lha-mó raxê hkyap, raxê nyí nyí má, Babelon hkóhkâm Nebuhkatneza gi, yhâng é gyè hpúng gón eq rahá Yerusalem wà mó lé lé htim luî, wà shinggan má wàp xuq mù, wàhkûm lhînghkyùq má zùmhtâng saî tap tô ri. 2 Hkóhkâm Zedeki-a ùp é raxe razan zàn jé shoq, wà lhînghkyùq má lhom tô akô nghut ri.3 Haû lha-mó myi hkyap hkyap, gau nyí nyí, wà hkaû má mùtmó gyó é je htan lo é nghut mù, mingbyû wuì zo râ zoshuq a jòq lo nghut ri. 4 Haú hkûn, Babelon byu pé gi, wàhkûm mai hput htông wang ri; wà haú lé Babelon byu pé lhom hkyùq to kôlhang, gyèzô pé lhúnglháng gi, myín lé, hkóhkâm hpô é hkyâm yàm mâ é wàhkûm í lhûm é gyoro mâ é hkum mai hpang htoq ló kômù, Araba páa shut hpang e ló akô nghut ri. 5 Nghut kôlhang, Babelon gyèzô pé gi, hkóhkâm lé châng hkat kôluî, Yerihko pá má yhang lé ê châng hkyit kôjáng, yhâng é gyèzô pé bànshoq gi, yhâng chyáng mai hpang gâng ló kômù, byo myín byùq bekô nghut ri. 6 Yhang gi, chyup yu é hui bê nghut ri.
Yhang lé gi, Ribala wà má nyi tô é Babelon hkóhkam chyáng shuî ló byî akô; haû mù, hkóhkâm gi, haú má yhang lé târâ jéyáng bê nghut ri. 7 Yhángmòq gi, Zedeki-a é yhang zo yùqzô pé lé, yhâng é myòq hí má sat pyâm akô. Hau htâng, yhángmòq gi, Zedeki-a é myòqjí lé choq pyám byi mù, gyi kyum hut byi luî, Babelon wà mó má shuî ló bekô nghut ri.
8 Babelon hkóhkâm Nebuhkatneza ùp é raxe gaú zan zàn, lha-mó ngo hkyap hkyap, nyhit nyí nyí má, Babelon hkóhkam é zaugun nghut sû, hkóhkam é chyungxe zúng é zau Nebuzaradan gi, Yerusalem wà mó má lé jé ri. 9 Yhang gi, haû Yhûmsîng Garaî é noqkuq yhûm lé le, hkóhkâm wâng lé le, Yerusalem wà mó mâ é ahkyàk é yhûm mó bànshoq lé le, nyhê hkyô pyâm ri. 10 Chyungxe zúng zau hpó shuî-û é Babelon gyèzô pé lhúnglháng gi, Yerusalem wà mó lhînghkyùq mâ é wàhkûm pé bànshoq lé lhoqhpyoq pyâm akô nghut ri. 11 Chyungxe zúng zau Nebuzaradan gi, wà má nyi gyó tô é byu pé lé le, nyi myìt tô é mâyû byu pé lé le, Babelon hkóhkam htâng dàp byùq é bang lé le, shúm byû dông shuî ló nhang ri. 12 Nghut kôlhang, gyèzau hpó Nebuzaradan gi, tsibyiq hkyâm pé eq yò pé saí râ matú, haú mau mâ é je myung é byu pé ra-am lé nyhi hkyô tô ri.
13 Babelon byu pé gi, haû Yhûmsîng Garaî é noqkuq yhûm mâ é gyi zîng pé lé le, wó huî htòt é tsûngjang pé eq gyi lànghkang mó lé le, lhoqhkyop pyám kômù, gyi haú pé lé Babelon wà mó shut yu ló akô nghut ri. 14 Hau htoq agó, yhángmòq gi, au pé, gòt zè pé, nyàp pé, gòmhtung pé eq noqkuq yhûm má dójaú é hkûn chung é gyi zèhkoq bànshoq lé le, yu ló akô nghut ri. 15 Chyungxe zúng zau hpó gi, hîng eq ngun èq saî é zè bànshoq nghut é, namngón shôm nyhê é myihkoq pé eq hkoq mó pé lé le, yu ló ri.
16 Haû Yhûmsîng Garaî é noqkuq yhum é matú Sholumon saî tô é zìng í zîng, lànghkang mó eq wó huî htòt é tsûngjang pé mâ é gyi pé gi, a ung lìk loshoq myô ri. 17 Zìng hkangmó gi, raxe shit dúng dúng myhang ri. Razìng mâ é gyi ahpyo gi, sum dúng dúng myhâng mù, hau é lhînghkyùq má gùn su dùt é tuijâng tap luî, tuijâng má gyi lungshi cham pé tsing lhâng byaû tô bum ri. Gùn su dùt é tuijâng dàp é gózîng le, haû eq rajung za nghut ri.
18 Chyungxe zúng zau Nebuzaradan gi, hkyangjong agyì Serai-a, yhâng a-ô mâ é hkyangjong Zehpani-a eq hkum zúng bang sum yuq lé shúm byû dông chyup yu ri. 19 Yhang gi, wà má nyi tô ashî nghut é byu pé mai, gyè zan bâng é zau hpó lé le, hkóhkam é hpàqchyî byi bang ngo yuq lé le, haú mau mâ é byu pé lé jihpán gùq é gyè jum é zau hpó lé le, wà hkaû má myang é byù hkyuq xê yùq lé le, shuî yu ri. 20 Zau hpó Nebuzaradan gi, yhángmòq bànshoq bang lé, Ribala wà má nyi é Babelon hkóhkam chyáng shuî ló byî ri. 21 Hkóhkâm hpó gi, Hamat mau mâ é Ribala wà má yhángmòq lé sat pyám nhang ri.
Haû mù, Yudaq byu pé gi, yhángmòq é mau mai shúm zung é hui bekô nghut ri.
22 Babelon hkóhkâm Nebuhkatneza gi, Yudaq mau má nyhi hkyô tô é shiwa byu pé lé ùp râ matú, Shahpan é yhang shu, Ahikam é yhang zo, Gedali-a lé wò byî tô ri. 23 Babelon hkóhkâm gi, Gedali-a lé ming zau wò byî tô é hkyô lé, gyèzaû pé bànshoq eq yhángmòq é gyèzô pé wó gyo kôjáng, yhángmòq gi, Mizipa wà má nyi é Gedali-a chyáng lé bum akô nghut ri; haú bang gi, Nehtani-a é yhang zo Ishima-elaq, Kare-a é yhang zo Yohanan, Netohpat byù Tan-humet é yhang zo Serai-a, Mahkahti byu é yhang zo Yazani-a eq, haú bâng é byu pé nghut akô. 24 Haû mù, Gedali-a gi, yhángmòq eq yhángmòq é byu pê èq lùm râ matú dakâm dang taî ri; haû gi, “Babelon byu pê é zaugun wuì lé hkâ-myìt gyùq kó; shí mau má nyì mù, Babelon hkóhkâm lé dójaú keq; haû jáng, núngmòq nyì ngón yùqyò kôrâ nghut lhê.” gâ é nghut ri.
25 Nghut kôlhang, nyhit hkyap hkyap má, hkóhkâm wùt le nghut sû, Elishama é yhang shu, Nehtani-a é yhang zo Ishima-elaq gi, byù raxê yùq eq rahá lé mù, Gedali-a lé le, Mizipa wà má yhang eq rahá nyi é Yudaq byu pé eq Babelon byu pé lé le, sat pyâm ri. 26 Haû mù, shiwa byù tiq zo ko zo bànshoq bang le, gyèzau wuì eq rahá kut, Babelon byu pé lé gyùq é yánmai, Egutuq ming shut hpang ê bekô nghut ri.
Yehoi-ahkin Lé Nhang Htoq Kat É Hkyô
27 Yudaq hkóhkâm Yehoi-ahkin shúm zung é súm xe nyhit zan zàn, Awela Marodak, Babelon hkóhkâm dùt é zàn má, yhang gi, Yudaq hkóhkâm Yehoi-ahkin lé htóng mai nhang htoq kat ri. Yhang gi, haú hkyô lé, raxe í hkyap hkyap, í xe nyhit nyí nyí má kut é nghut ri. 28 Ewela Mariduk gi, Yehoi-ahkin lé dang ngón nyò mù, Babelon wà má yhang eq rahá nyi é gótû hkóhkam pê htoq myhang é, xânghpoq nge wó é tángmyhâng, yhang lé byî ri. 29 Haû mù, Yehoi-ahkin gi, htóng mèbu lé htaî pyám luî, yhâng é i-pyàt htum shoq hkóhkam é zangbó má bo myang zô nyì bê nghut ri. 30 Hkóhkâm gi, Yehoi-ahkin lé, yhang râ é zoshuq, yhang chyungxe dui nyi é i-pyàt gón nyí wuî byî nyi ri.