Gyè Hpúng Pé
27
Razàn gón, lha-mó rahkyap eq rahkyap má wò ang luî, gyè hpúng pé eq sêng é múzó bànshoq má hkóhkâm lé dójaú é, yhûmhtu ushuq pé, rahkyîng ùp gyèzaû pé, rashô ùp gyèzaû pé eq yhángmòq é zaugun wuì nghut é Isira-elaq byu pê é jihpán gi, a-ô mâ é eq rajung za nghut ri; gyè hpúng hkangmó gi, 24000 yùq yùq nghut ri.2 Sânghî lhôhkyap má, sânghî é gyè hpúng lé ùp é sû gi, Zapdi-ela é yhang zo Yashobe-am nghut ri. Yhâng é hpúng bang gi, 24000 yùq nghut ri. 3 Yhang gi, Perezi é awùt ashín nghut mù, sânghî lhôhkyap mâ é gyèzaû pê é zau nghut ri.
4 Lha-mó í hkyap hkyap mâ é gyè hpúng lé ùp é sû gi, Ahohi byù Dodai nghut ri; Miklot gi, yhâng é hpúng mâ é zau nghut ri. Yhâng é hpúng bang gi, 24000 yùq nghut ri.
5 Lha-mó sum hkyap hkyap mâ é, sum yuq nghû râ gyèzau gi, hkyangjong Yehoi-ada é yhang zo Benai-a nghut ri. Yhang gi, zau nghut mù, yhâng é hpúng bang gi, 24000 yùq nghut ri. 6 Benai-a haû gi, sarhê hpó mó sum xê yùq má lòm mù, haû sum xê yùq lé ùp é sû nghut ri. Yhang zo Amizabat gi, yhâng é hpúng lé ùp ri.
7 Lha-mó myi hkyap hkyap mâ é, myi yuq nghû râ gyèzau gi, Yo-ap é yhang gu Asahela nghut ri; yhang zo Zebadi-a gi, yhâng é hkô má zung ri. Yhâng é hpúng bang gi, 24000 yùq nghut ri.
8 Lha-mó ngo hkyap hkyap mâ é, ngo yuq nghû râ gyèzau gi, Iziraha byù Shamhut nghut ri. Yhâng é hpúng bang gi, 24000 yùq nghut ri.
9 Lha-mó hkyuq hkyap hkyap mâ é, hkyuq yùq nghû râ gyèzau gi, Teko-a byù Ikesha é yhang zo Ira nghut ri. Yhâng é hpúng bang gi, 24000 yùq nghut ri.
10 Lha-mó nyhit hkyap hkyap mâ é, nyhit yùq nghû râ gyèzau gi, Ehprim up, Peloni byù Heleza nghut ri. Yhâng é hpúng bang gi, 24000 yùq nghut ri.
11 Lha-mó shit hkyap hkyap mâ é, shit yùq nghû râ gyèzau gi, Zera byù, Husha wà mâ é Sibehkai nghut ri. Yhâng é hpúng bang gi, 24000 yùq nghut ri.
12 Lha-mó gau hkyap hkyap mâ é, gau yuq nghû râ gyèzau gi, Ben-yamin up, Anahtot byù Abi-ezara nghut ri. Yhâng é hpúng bang gi, 24000 yùq nghut ri.
13 Lha-mó raxê hkyap hkyap mâ é, raxê yùq nghû râ gyèzau gi, Zera byù, Netohpat wà mâ é Maharai nghut ri. Yhâng é hpúng bang gi, 24000 yùq nghut ri.
14 Lha-mó raxe rahkyap hkyap mâ é, raxe rayùq nghû râ gyèzau gi, Ehprim up, Pirahton byù Benai-a nghut ri. Yhâng é hpúng bang gi, 24000 yùq nghut ri.
15 Lha-mó raxe í hkyap hkyap mâ é, raxe í yùq nghû râ gyèzau gi, Otni-ela yhûmhtu mâ é, Netohpat wà mâ é Helidai nghut ri. Yhâng é hpúng bang gi, 24000 yùq nghut ri.
A-myû Up Pê É Zaugun Wuì
16 Isira-elaq a-myû up pé lé ùp é zaugun wuì gi,
Rubin up má, Zihkri é yhang zo Eli-ezera;
Sime-on up má, Mahka é yhang zo Shehpati-a;
17 Lewiq up má, Kemu-ela é yhang zo Hashabi-a;
Arun koq má, Zadok;
18 Yudaq up má, Dawiq é yhang mang Elihu;
Yisahka up má, Mihka-elaq é yhang zo Omri;
19 Zebulun up má, Obadi-a é yhang zo Ishimai-a;
Naphtali up má, Aziri-ela é yhang zo Yerimot;
20 Ehprim up má, Azazi-a é yhang zo Hoshe-a;
Manase koq rahkyam má, Pedai-a é yhang zo Yo-ela;
21 Gile-at má nyi é Manase koq rahkyam má, Zehkariq é yhang zo Ido;
Ben-yamin up má, Apna é yhang zo Yasi-ela;
22 Dan up má, Yeroham é yhang zo Azarela nghut ri.
Shí bang gi, Isira-elaq a-myû up pé lé ùp é zaugun wuì nghut ri.
23 Dawiq gi, haû Yhûmsîng Garai mai Isira-elaq byu pé lé mauhkûng mâ é kyî pé su lhoqmyo byi râ ga danghtum htûm tô é nghut é yánmai, í xê zàn mai a-ô gù lé jihpán má a nghap lhóm nghut ri. 24 Zerui-a é yhang zo Yo-ap gi, jihpán gùq hî kôlhang, a wó gùq pán nghut ri. Jihpán haû gùq é yánmai, Isira-elaq byu pê chyáng Garai Gasâng é nhikmó-yo hkyô jé ri; wó gùq é jihpán lé, Hkóhkâm Dawiq é mhô-myi shindâm laiká bùk má a lhoqlhóm kó nghut ri.
Hkóhkam É Sùtzè Lé Wú Gôn É Zau Wuî
25 Adi-ela é yhang zo Azimawet gi, hkóhkam é sùt-púnglhúng pé lé wú gôn ri.
Uzi-a é yhang zo Yonahtan gi, yò pé mâ é chyî pé, wà mó wà zo pé eq gingtíng jowò pé mâ é sùt-púnglhúng pé lé wú gôn ri.
26 Hkelup é yhang zo Eziri gi, yò mú zui bang lé wú gôn ri.
27 Ramat byù Shimi gi, tsibyiq hkyâm pé lé wú gôn ri.
Shipmi byù Zapdi gi, tsibyiq shi eq tsibyiq wing kat to jang pé lé wú gôn ri.
28 Gederi byù Balaq Hanan gi, buìwàng hkyam bùmhkyî pá pé mâ é tsanlun gàm pé eq hkohúm gâm pé lé wú gôn ri.
Yo-ashi gi, tsanlun xû kat to jang pé lé wú gôn ri.
29 Sharon byù Shitirai gi, Sharon mhan nú yô mâ é no hpúng lé wú gôn ri.
Atlai é yhang zo Shahpat gi, langhkaû pé mâ é no hpúng pé lé wú gôn ri.
30 Ishima-elaq byù Obila gi, gola-uk hpúng pé lé wú gôn ri.
Meronot byù Yedi-a gi, loze hpúng pé lé wú gôn ri.
31 Hagara byù Yaziza gi, sau bainám hpúng pé lé wú gôn ri.
Shí bang bànshoq gi, Hkóhkâm Dawiq é sùtzè pé lé wú gôn é zaugun wuì nghut ri.
32 Dawiq é yhâng wâ é yhang mang Yonahtan gi, hpàqchyî byi sû, nìk nìk sê gyo sû eq laiká ká sû nghut ri. Hakmoni é yhang zo Yehi-ela gi, hkóhkam é yhang zô pé lé wú gon sû nghut ri.
33 Ahihtohpela gi, hkóhkam é hpàqchyî byi sû nghut ri.
Arihki byù Hushai gi, hkóhkam é lùmjíng luzúm nghut ri. 34 Ahihtohpela é htâng má, Benai-a é yhang zo Yehoi-ada eq Abi-ahta xoq kut akô nghut ri.
Yo-ap gi, hkóhkam é gyè hpúng pê é zau nghut ri.