Hkum Zúng Bang
26
Hkum zúng é byù hpúng pé gi, Kora koq mâ é, Asap é awùt ashín, Kore é yhang zo Meshelemi-a; 2 Meshelemi-a é yhang zo yùqzô pé gi, lagám Zehkariq, lanóng Yedi-ela, lalaq Zebadi-a, latû Yatni-ela, 3 latáng Elam, layóng Yehohanan, lahkâ Elihonai nghut ri.4 Obet Edom é yhang zô pé le, lagám Shemai-a, lanóng Yehozabat, lalaq Yo-a, latû Sahkara, latáng Nehtanela, 5 layóng Ami-ela, lahkâ Yisahka, laroí Pe-ulehtai nghut ri. Hkâsu mù gâ le, Garai Gasang gi, Obet Edom lé shimân byî é nghut ri.
6 Yhang zo Shemai-a le yùqzô pé hku é nghut mù, haú bang gi, gyai yhang a-tsam bo é bang nghut kôluî, yhángmòq é yhâng wâ é yhûmhtu pé mâ é ushuq le nghut bum akô. 7 Shemai-a é yhang zo yùqzô pé gi, Otni, Rehpa-ela, Obet eq Elazabat nghut akô; yhâng é gu-mâng nhik Elihu eq Semahki-a le a-tsam bò su nhik nghut ri. 8 Shí bang bànshoq gi, Obet Edom é awùt ashín pé chyat nghut ri; yhángmòq le, yhángmòq é zodù wuì le, yhángmòq é gu-mang wuì le, dójaú râ matú wum-o a-tsam bo é bang nghut bum akô; Obet Edom é awùt ashín pé bànshoq gi, hkyuq xe í yùq nghut ri.
9 Meshelemi-a é yhang zô pé eq gu-mang wuì gi, a-tsam bò bang chyat nghut mù, bànshoq raxe shit yùq nghut ri.
10 Merari koq mâ é Hosa é yhang zo yùqzô pé gi, lagám Shimri (Yhang gi, zo-mún a nghut kôlhang, yhâng wâ èq yhang lé yùqzo lagám ayá byî é nghut ri.), 11 lanóng Hiliki-a, lalaq Tebali-a, latû Zehkariq nghut ri. Hosa é yhang zo yùqzô pé eq gu-mang wuì bànshoq raxe sum yuq nghut ri.
12 Shí bang gi, yhángmòq é gu-mang wuì su, yhángmòq é zaugun wuì má cháng luî gam tô é, haû Yhûmsîng Garaî é noqkuq yhûm má dójaú râ wò wó é hkum zúng byù hpúng pé nghut ri. 13 Tiq zo ko zo rajung za, yhángmòq é yhûmhtu má cháng luî, ó yùq hká hkum zúng râ matú hkyîn shosé she akô nghut ri.
14 Hkyîn shosé she le, Shelemi-a gi, Buìhtoq hkyam Hkum má âng ri; hau htâng, hpàqchyî ge byî é yhang zo Zehkariq é matú she le, yhang gi, Mautsûng hkyam Hkum má âng ri. 15 Obet Edom gi, Maupyî hkyam Hkum má âng ri; yhang zô pé gi, zè kat yhûm zúng âng akô nghut ri. 16 Shupim eq Hosa nhik gi, Buìwàng hkyam Hkum eq ahtoq hkyô mâ é Shaleket Hkum má âng ri.
Zúng é ahkyíng gi, rahpúng bàn jáng rahpúng zúng râ dông kut akô nghut ri. 17 Nyí wuî, buìhtoq hkyam má Lewiq byù hkyuq yùq, mautsûng hkyam má myi yuq, maupyî hkyam má myi yuq eq zè kat yhûm má í yùq yùq kut akô. 18 Buìwàng hkyam mâ é wânghkaû má gi, hkyô má myi yuq, wânghkaû má í yùq kut akô nghut ri.
19 Shí bang gi, Kora eq Merari é awùt ashín pé mâ é hkum zúng é byù hpúng pé nghut ri.
Sùtdò Wú Gon Bang Eq Gótû Zaugun Wuì
20 Yhángmòq é gótû gu-mang Lewiq byua pé gi, Garai Gasâng é yhûm mâ é sùtdò eq àp nhong to bê zè pé é sùtdò lé wú gôn akô nghut ri.
21 Gerishon koq, Ladan é awùt ashín pé nghut mù, Gerishon koq, Ladan é yhûmhtu ushuq pé gi, Yehi-ela, 22 Yehi-ela é yhang zô nhik Zehtam eq yhang gu Yo-ela nghut akô. Yhángmòq gi, haû Yhûmsîng Garaî é noqkuq yhûm mâ é sùtdò lé wú gôn akô nghut ri.
23 Amram byu pé, Izihara byu pé, Hebron byu pé eq Uzi-ela byu pé mai bo lom é bang gi, 24 Mosheq é yhang zo, Gerishom é awùt ashín Shebu-ela gi, sùtdò wú gôn é zau nghut ri. 25 Yhâng é gu-mang wuì mâ é Eli-ezera le nghut ri; Eli-ezera é yhang zo gi, Rehabi-a, Rehabi-a é yhang zo gi, Yeshai-a, Yeshai-a é yhang zo gi, Yoram, Yoram é yhang zo gi, Zihkri, Zihkri é yhang zo gi, Shelomit nghut ri. 26 Shelomit eq yhâng é gu-mang wuì gi, Hkóhkâm Dawiq èq le, yhángmòq é yhûmhtu pê é ushuq pé nghut é, gyèzo rahkyîng ùp zau wuî, rashô ùp zau wuî eq gótû gyèzaû pê èq le, àp nhong é zè pê é sùtdò pé bànshoq lé wú gôn akô nghut ri. 27 Yhángmòq gi, majan mai wó lú lo é zè pé ra-am lé, haû Yhûmsîng Garaî é noqkuq yhûm saî saí râ matú àp nhong akô nghut ri. 28 Myìqhtoi Samu-elaq, Kisha é yhang zo Sholuq, Nera é yhang zo Apna, Zerui-a é yhang zo Yo-ap pé mai àp nhong é jung hkangmó eq gótû àp nhong é zè pé bànshoq lé gi, Shelomit eq yhâng é gu-mang wuì wú gôn akô nghut ri.
29 Izihara byù mâ é, Kenani-a eq yhang zô pé gi, noqkuq yhûm shinggan mâ é wò nghut é, zaugun wuì eq târâ agyi pé dông Isira-elaq mîngdán lé up akô nghut ri.
30 Hebron byu pé mâ é, a-tsam bo é Hashabi-a eq yhâng é gu-mang wuì rahkying nyhit shô yùq gi, haû Yhûmsîng Garaî é múzó bànshoq é matú eq hkóhkâm lé dójaú râ matú, Yodan làng buìwàng hkyam mâ é Isira-elaq mau má wò yu akô nghut ri. 31 Hebron byu pé mâ é, Yeri-a gi, yhángmòq é yhûmhtu byùxik labaû má wú jáng, yhángmòq é zau nghut ri. Dawiq hkóhkâm kut é myi xê zan zàn, byù haú bang eq séng luî ho wú le, Gile-at mau Yazera wà má, Hebron byu pé mâ é a-tsam bo é byu pé lé myang ho htoq ri. 32 Yeri-a gi, yhángmòq é yhûmhtu ushuq pé nghut é, a-tsam bo é gu-mang wuì í hkying nyhit shô yùq wó é nghut luî, Hkóhkâm Dawiq gi, Garai Gasang eq hkóhkam é múzó pê é matú, Rubin byu pé, Gat byu pé eq Manase koq rahkyam lé ùp nhang ri.