Esihta Hkóhkâm Myhí Dùt Lo É Hkyô
2
Hau htâng, Hkóhkâm Ahasuru gi, nhik-yo bui ló byùq é htâng má lháng, Washiti lé le, yhang kut é hkyô lé le, yhang eq séng luî hkunmó hkyô é lé le bûn nghâm kat ri. 2 Haú hkûn, hkóhkâm lé dójaú é, yhâng é duìnhâng zoshâng wuî gi, “Hkóhkâm náng é matú gùnghkyâng yúng é zo-myi gyíng ru jâng hô sháng. 3 Myang ho é yúng é zo-myi gyíng haú bang bànshoq lé, Susa wà mó mâ é gingtíng jowò mâ é hkóhkâm wâng myiwe wuì nyi é yhûm má shuî lò mù, myiwe wuì lé wú gôn é, hkóhkam é u-nuk Hegai é lòq má lo àp byi luî, yhángmòq lhoqchyoi lhoqyúng é wó hkam yù râ matú, hkóhkâm mai mau hkangmó má byù hkyîn nhik bô sûwún wuî hkyin tô le ge ri. 4 Hkóhkâm je riyhang nhik htûng é zo-myi gyíng lé, Washiti é gùnglik dông hkóhkâm myhí dùt sháng gàq.” ga yhang lé taî akô. Hkóhkâm gi, haú hkyô lé gyô nguì mù, haú dông kut bê nghut ri.5 Haú ahkyíng lé, Susa wà mó má, Ben-yamin up mâ é Kisha é awùt ashín, Shimi é yhang shu, Ya-ira é yhang zo Modehkai gâ é Yudaq byù rayùq nyi ri. 6 Yhang gi, Yudaq hkóhkâm Yehoi-ahkin eq rahá, Babelon hkóhkâm Nebuhkatneza èq chyup é hui mù, shúm byû dông Yerusalem wà mó mai bo jé lom lò sû nghut ri. 7 Yhang gi, yhâng wa mó é yhang zo Hadasa le gâ é Esihta lé hku baú yu ri. Haî mù gâ lé, Esihta gi, înu îwa a wó lô é sû nghut ri. Esihta gi, gùnghkyâng isâm yúng sû nghut ri. Yhâng nu eq yhâng wa shi byùq é htâng má, Modehkai gi, yhang lé yhang zo sîng dông hku kô ri.
8 Hkóhkam é mungdang eq hkunmó lé pyo kat é htâng, myiwe zo wuî myo myo lé, Susa wà mó mâ é gingtíng jowò má lé shuî zing kômù, Hegai é lòq má àp byî akô nghut ri. Esihta lé le hkóhkâm wâng má shui wàng kômù, nyhi tô é myiwe wuì lé wú gôn é Hegai é lòq má àp byi bekô nghut ri. 9 Esihta gi, Hegai lé myìt wó lhoqngón byi mù, yhâng é hí má myòqdong wó ri. Haû mù, Hegai gi, Esihta é gùng mhón râ chûngzè pé eq laksan zoshuq lé radá dâm hên byî ri. Hau htoq agó, yhang gi, hkóhkâm wâng mâ é duìnhâng zoshâng myiwe zo nyhit yùq lé hkyin yù mù, myiwe zo wuî nyi é jowò htoq je réng é jowò má, yhâng é duìnhâng zoshâng myiwe zo wuî eq rahá yhang lé htòt nyhi tô akô nghut ri.
10 Esihta gi, Modehkai sidìq byî é eq rajung za, yhâng é a-myû eq yhâng é gu-mang wui hkyô lé a taî htoq é za haq zaú tô ri. 11 Modehkai gi, Esihta hkâsu kut nyi é hkyô lé le, yhang má haî dùt nyi é hkyô lé le wó sé râ matú, myiwe zo wuî nyi é yhûmhkun hí má nyí wuî ê ê lò lò kut nyi ri.
12 Myiwe zo wuî gi, yhûmsing gùng lé hí lha-mó raxe í hkyap yhang lhoqyúng râ htûng jòq é eq rajung za, lha-mó hkyuq hkyap gi, mura xû chûng mù, lha-mó hkyuq hkyap gi, namngón jung eq bùt jung chûng luî lhoqyúng râ dùt lhê. Haû jáng shèq, yhángmòq gi, rayùq htâng rayùq Hkóhkâm Ahasuru é hí má wó wang é nghut lhê. 13 Myiwe zo rayùq gi, myiwe zo wuî nyi é yhûm mai hkóhkâm wâng shut e ló é hkûn, yhang ô nau é su ge mhôn chung lhê. 14 Yhang gi, myín lé wàng luî, htang nàpkyó nghut jáng, hkóhkam é myi-ngê wuì nyi é yhûm shut shuî ló é hui mù, haú bang lé wú gôn é u-nuk Shagaza é lòqhkaû má àp byî é huî ri. Hkóhkam èq wú nguî mù, myìng du htau luî wùt é za a nghut jáng, yhang gi, hkóhkam chyáng dum ge wàng râ a nghut.
15 Yhûmsing yhang zo su yhang Modehkai hku kô é yhâng wa mó Abihaila é yhang zo Esihta gi, hkóhkam chyáng wàng râ ahkyíng jé é hkûn, myiwe zo wuî lé wú gôn é hkóhkam é u-nuk Hegai lajang byî é mai lai luî, haî lé le a dung nghut ri. Esihta gi, yhang lé myang é bang yùq hkangmó é hí má myòqdong wó ri. 16 Hkóhkâm Ahasuru hkóhkâm kut é nyhit zân, Tebet nghu é lhôhkyap raxê hkyap má, yhang gi, yhâng é hkóhkâm yhûm mó má, Esihta lé shuî wàng nhâng bê nghut ri.
17 Hkóhkâm gi, myiwe zo wuî góbang bànshoq htoq má Esihta lé je riyhang wú nguî luî, Esihta gi, zo-myi gyíng bànshoq htoq yhâng é hí má myòqdong wó ri; haû mù, yhang gi, Esihta lé hkóhkâm jánmaú tsung byi luî, Washiti é gùnglik dông hkóhkâm myhí ayá byi bê nghut ri. 18 Hau htâng, hkóhkâm gi, yhâng é zaugun sûwún wuî eq duìnhâng zoshâng wuì bànshoq bâng é matú, Esihta é poî nghu é poî mó lé shuî kut ri. Hau htoq agó, yhang gi, mau hkangmó mâ é mû zui bang múzó mai nô yù râ hkunmó hkyó luî, yhâng é chyitdàp myìt mó mai chyûnghuq le tsing gâm byî ri.
Hkóhkâm Lé Sat Pyám Râ Haq Dâ É Hkyô Lé Modehkai Sê Pyám Byî É Hkyô
19 Zo-myi gyíng pé, í dâm nghû râ dá zùp zîng é hkûn, Modehkai gi, hkóhkâm hkúmdong má zung tô ri. 20 Esihta kúm gi, yhang lé Modehkai mhoqshit é lé hkâ-nhám le jì-no gyô é nghut mù, Modehkai sidìq byî é eq rajung za, yhâng é a-myû eq gu-mang wui é hkyô lé a taî htoq é za haq zaú tô ri.
21 Modehkai gi, hkóhkam é hkúmdong má zung tô é u lé, hkum zúng su nhik nghut é, hkóhkam é u-nuk Bigihtan eq Teresha gi, nhikjum yo luî, Hkóhkâm Ahasuru lé sat pyám râ haq htung nyi akô nghut ri. 22 Haú hkyô lé Modehkai wó sê yù mù, yhang gi, Hkóhkâm myhí Esihta lé shit kyô ri; haû mù, Esihta gi, haú hkyô lé Modehkai é gùnglik dông hkóhkam chyáng hkyang ló shit ri. 23 Hkyanglù haú lé gôn wú le, têng é hkyô lé myang gôn htoq jáng, haú nhik lé byù lhâng sat zîng má tuî lhâng sat pyám bê nghut ri. Haú hkyô lé, hkóhkam é hí má yhang, mhô-myi shindâm laiká bùk má kâ xûm to bê nghut ri.