Yudaq Byù Myû Lé Lhoqhtûm Pyám Râ Matú Haman Haq Hen É Hkyô
3
Hau htâng,
hkâ-myháng a myáng má,
Hkóhkâm Ahasuru gi,
Agaq é awùt ashín mâ é,
Hamedahta é yùqzo Haman lé tu toq ri.
Yhang lé,
gótû zaugun sûwún wuî bànshoq bâng htoq kô é ayá byi bê nghut ri.
2 Hkóhkam é duìnhâng zoshâng wuì bànshoq bang gi,
hkóhkam é hkúmdong má,
hkyîhput htuq luî,
Haman lé hkúnggâ akô.
Hkâsu mù gâ le,
haû su kut râ matú hkóhkâm hkunmó hkyô tô é yánmai nghut ri.
Nghut kôlhang,
Modehkai kúm gi,
Haman é hí má hkyîhput le a htuq,
hkúngga le a byi kut ri.
3 Haû mù luî,
hkóhkâm hkúmdong má jé nyi é hkóhkam é duìnhâng zoshâng wuì gi,
Modehkai lé,
“Nàng gi,
haî mù hkóhkam é hkunmó lé a châng é lhú?”
ga myî akô nghut ri.
4 Haû su ga nyí wuî yhángmòq myî wú kôlhang,
Modehkai gi,
yhángmòq é dang lé a gyo byi nghut ri.
Yhang gi,
yhángmòq lé,
yhang Yudaq byù nghut é hkyô taî kyô é yánmai,
yhángmòq gi,
haû Modehkai kut é hkyô htuk a htuk wó sé râ matú,
Haman lé hkyang shit akô nghut ri.
5 Haû mù,
Haman gi,
yhang lé Modehkai hkyîhput le a htuq,
hkúngga le a byi kut é hkyô lé myàng jáng,
gyai yhang nhikjum yo bê nghut ri.
6 Haman gi,
Modehkai Yudaq byù nghut é hkyô lé sé mù,
Modehkai rayùq lé za sat pyâm le nhik shî râ su a ga luî,
Ahasuru mîngdán gón má nyi é,
Yudaq byù lhúnglháng lé sat pyám râ hkyô haq ho nyì bê nghut ri.
7 Ahasuru hkóhkâm kut é raxe í zân hkûn,
yhang haq htung é múzó hî râ buìnyì eq lhôhkyap wú râ matú,
Haman hi é má,
sânghî lhôhkyap nghut é Nisan hkyap má,
Pura gâ é hkyîn shosé she wú le,
raxe í hkyap hkyap nghut é Adara lhôhkyap raxe sum nyí nyí má ló âng ri.
8 Hau htâng,
Haman gi,
Hkóhkâm Ahasuru lé,
“Byù rahú gi,
náng é mîngdán mâ é mau hkangmó má byo myín tô ri.
Yhángmòq é htûngli gi,
gótû a-myû bànshoq bang eq shai ri.
Hau htoq agó,
yhángmòq gi,
hkóhkam é târâ pé lé le a cháng kó.
Haû mù luî,
yhángmòq lé xoq nyî nhang tô le gi,
hkóhkam é matú a-kyû bò râ a nghut.
9 Hkóhkâm nàng myìt huî é nghut le gi,
yhángmòq lé sat pyám râ hkunmó hkyô é laiká ká byi laq.
Ngò gi,
náng é mû wùn wàq bang mai hkóhkam é sùtdò má wó kat to râ matú,
yhángmòq é lòq má ngùn joí rasên ramûn sum hkyîng àp byi râ nghut lhê.”
ga taî ri.
10 Haû mù,
hkóhkâm gi,
lòqtsung dizìk lé yhâng é lòqnyhui mai hkyut yû mù,
Yudaq byu pê é gyè nghut nyi é,
Agaq é awùt ashín mâ é,
Hamedahta é yhang zo Haman lé byî ri.
11 Hau htâng,
hkóhkâm gi,
Haman lé,
“Byù haú bang eq yhángmòq é ngùn pé gi,
náng é lòq má nghut lhê;
nàng o é dông kut àq.”
ga taî ri.
12 Hau htâng,
sânghî lhôhkyap raxe sum nyí nyí má,
Haman gi,
hkóhkam é laiká ká bang lé ji yu ri.
Haú bang gi,
Haman taî é eq rajung za,
byu myû chângjup é dang dông le,
mau hkangmó mâ é laiká dông le,
hkunmó hkyó laiká kâ akô nghut ri.
Yhángmòq gi,
hkunmó hkyó laiká haû lé,
hkóhkam é mauzaû pé,
mau hkangmó mâ é ming zaû pé eq byù myû chângjup mâ é zaugun sûwún wui chyáng dé kat akô.
Hkunmó laiká haû gi,
Hkóhkâm Ahasuru é myìng mai kâ é nghut mù,
yhâng é lòqtsung dizìk èq dizìk htûng tap tô akô nghut ri.
13 Laiká dé bang gi,
hkunmó laiká haú lé hkóhkâm mîngdán mau hkangmó shut dé e ló bekô nghut ri.
Hkunmó laiká haú má gi,
Adara gâ é lhôhkyap raxe í hkyap,
buìnyì raxe sum nyí haû ra-nyí má,
Yudaq byù tiq ko bànshoq,
myiwe zoshâng lhúnglháng lé rayùq lháng a-myìt to loshoq sat pyám mù,
yhángmòq é ngùnzè pé lé yu pyám byi râ ga bo tô ri.
14 Buìnyì haû a jé shi-má,
mingbyû yùq hkangmó gi,
noq le wó hen lajâng to sháng gàq ga,
hkunmó laiká haú má bo é hkyô pé lé,
târâ dông mau hkangmó mâ é byù bànshoq bang lé sê to nhang é nghut ri.
15 Haû laiká dé bang gi,
hkóhkam é hkunmó eq rajung za,
hân hân htoq ê mù,
Susa wà mó mâ é gingtíng jowò má hkunmó laiká lé ê lhoqpyô bekô nghut ri.
Haû mù,
Susa wà mó mâ é bang myìt myo myìt chiq huî nyi bùm kô é hkûn,
hkóhkâm eq Haman kúm gi,
rahá zùng mù tsibyiq wing shuq nyi akô nghut ri.