Modehkai Èq Esihta Lé Garúm Dûng É Hkyô
4
Modehkai gi, dùt lo é hkyô bànshoq lé sé jáng, yhâng é mèbu lé lâng cheq pyám mù, jimê tû wùt luî, yhânggùng yhang myiwap kyaq gyûn ri. Hau htâng, yhang gi, htê mó èq wum kat wùt ngaù uchyang wà mó hkaû shut wang ló ri. 2 Jimê wùt bang ó le hkóhkâm é hkúmdong mai a ge laî wang é yánmai, Modehkai gi, hkóhkam é hkúmdong hí má za ê jé tô ri. 3 Hkóhkam é hkunmó laiká jé é mau hkangmó mâ é Yudaq byu pé gi, gyai yhang chôm gyi ngau bum akô. Hau htoq agó, zoshuq túm bang gi, túm, ngaù byi ngaù nhap èq ngauyáng yáng bang gi, yáng, kut bum akô nghut ri. Byù myo hpyang gi, jimê tû wùt luî, myiwap htoq má lèq yâng tô bum akô nghut ri.4 Esihta é duìnhâng myiwe zo wuî eq yhâng é u-nuk pé gi, Modehkai kut nyi é hkyô lé, Esihta lé lo taî kyo kôjáng, yhang gi, gyai yhang myìt myo myìt chiq byùq bê nghut ri. Yhang gi, Modehkai jimê htaî pyám râ matú mèbu byî kat kôlhang, Modehkai gi, mèbu haú pé lé a lhom hàp yù nghut ri. 5 Hau htâng, Esihta gi, yhâng é matú duìnhâng zoshâng dông nyhi to byî é hkóhkam é u-nuk rayùq nghut é Hahtak lé ji yù mù, hai é wuîhke hkyô jòq é yánmai Modehkai haû su dùt nyi é lé ê gôn wú râ matú, yhâng chyáng nhang kat ri.
6 Haû mù, Hahtak gi, hkóhkâm wâng hkúmdong hí mâ é jowò mó má nyi tô é Modehkai chyáng ê jé ri. 7 Haú hkûn, Modehkai gi, yhâng chyáng dùt laî lo é hkyô bànshoq lé le, Yudaq byu pé lhúnglháng lé sat râ matú, Haman mai hkóhkam é sùtdò má kat byi râ ga danghtum htûm tô é ngùn hkyak hkâ-myhó nghut é hkyô lé le, Hahtak lé lhom taî kyô ri. 8 Hau htoq agó, Hahtak lé, Yudaq byu pé lé sat kyop pyám râ matú, Susa wà mó má lhoqhtoq é hkunmó laiká lé, Esihta chyáng ló tûn shit mù, haú hkyô lé ló taî sân kyo sháng ga hkunmó laiká haû byî kat ri. Hau htoq agó, yhûmsing a-myû Yudaq byu pé lé shogyo nhikmyîn yù râ matú, hkóhkam chyáng wang taí râ dông, Esihta lé Hahtak ló taí râ matú pying kat ri.
9 Hahtak gi, Modehkai pying kat é dang lé, Esihta chyáng hkyang ló shit ri. 10 Hau htâng, Esihta gi, Hahtak lé, Modehkai chyáng radàm dum nhâng mù, châng pying kat é gi, 11 “Hkóhkam é duìnhâng zoshâng wuì eq mau hkangmó mâ é mingbyû wuì bànshoq bang gi, myiwe yùqgè ó yùq nghut kôlhang, ahkaû shut mâ é wâng, hkóhkam é hí má, yhang a ji é za wang e é nghut jáng, haú yùq lé sat pyám râ târâ hkyô tô é lé sê bum akô. Hkóhkam é hîng dumbáng tu yhun hui sû za a nghut le gi, chyungxe wó byûn râ a nghut. Ngò gi, hkóhkam èq ji yù huî é sum xê nyí za ru nghut ashî.” gâ ri.
12 Modehkai gi, Esihta pying kat é dang lé wó gyô é hkûn, 13 yhang dum taû pying kat é gi, “Gótû Yudaq byu pé chyungxe a lùt é nghut le gi, nàng hkóhkâm wâng má nyi to sû le wó lùt to nhô hkâ-ngâm; 14 Shí ahkyíng má, nàng zim za nyi tô é ru nghut le gi, Yudaq byu pé lé lhoqlhut yû râ hkyô gówô mai htoq lô râ nghut lhê; nghut kôlhang, nàng eq náng wâ é yhûmbyù bànshoq gi, shi byùq râ nghut lhê. Nghut kôlhang, nàng hkóhkâm myhí dùt lo é hkyô gi, shí ahkyíng lhê é matú haî ru nghut lhê yuq a sé?” gâ ri.
15 Hau htâng, Esihta mai Modehkai chyáng dang dum taû kat é gi, 16 “Susa wà mó má nyi é Yudaq byù lhúnglháng lé ji tsîng to mù, sum nyí sum myîn yhang, haî le a zo a shuq é za, ngá matú zo shuq túm luî, kyûdung byi keq. Ngò eq ngá é duìnhâng myiwe zo wuî le, haû eq rajung za zoshuq túm luî kyûdung râ nghut lhê. Hau htâng má, ngò gi, târâ lu lai kôlhang, hkóhkam chyáng wàng râ nghut lhê. Ngò shî ang jáng le shî hkâm râ za nghut lhê.” gâ ri.
17 Hau mù, Modehkai gi, Esihta pying kat é dang eq rajung za, jung hkangmó ló kut bê nghut ri.