Yobaq Dang Nyo Htoq É Hkyô
3
Hau htâng, Yobaq gi, nhuthkum hpóng mù, yhâng é hkû buìnyì lé nhîng pyâm ri. 2 Yhang nhîng é dang gi,3 “Ngá é hkû buìnyì eq
‘Yùqzo gùng wùn bê!’ gâ é myín gi, htûm byùq sháng gàq.
4 Buìnyì haû gi, mauchut tuq dùt byùq sháng gàq;
ahtoq mâ é Garai Gasang gi, haú lé a bun byi sháng gàq;
buìnyì haú má mau a bó sháng gàq.
5 Tîng tîng nòq é eq tuq tuq chut é mauchut gi, haú lé radàm dum ngòp pyám sháng gàq;
mhut gi, hau é ahtoq má htu byùq sháng gàq;
gyùq chiq hpo mauchut gi, haú lé hup gum pyám sháng gàq.
6 Myín haû gi, tîng tîng nòq é mauchut má myùp byùq sháng gàq;
razàn hkaû mâ é buìnyì pé má, haú lé a lhoqlhóm sháng gàq;
lhôhkyap pé nghap é hká má le, haú lé a nghap lhóm sháng gàq.
7 Myín haû gi, chamchyuîyuì dùt byùq sháng gàq;
gabú garu htê lé, myín haú má a wó gyô byùq sháng gàq.
8 Haû, buìnyì lé nhing bang eq Lewi-ahtan gâ é mànjùng mó lé wó nhaû toq râ bang gi,
buìnyì haú lé nhing kó sháng gàq.
9 Hau é bó-myhû pé gi, mauchut byùq sháng gàq;
maubó lé akôm má láng pyám mù,
nàpsûn maubó lo é le a myàng sháng gàq;
10 hkâsu mù gâ le, myín haû gi, ânû é zoyhûm lé a myhî pyám byî é eq,
wuîhke jamjau hkyô lé ngá é myòq hí mai a haq pyám byi nghut ri.
11 Ngò gi, hku kat é hkûn, haî mù a shi byùq é lhú?
Ngò gi, zoyhûm mai htoq lo é hkûn, haî mù kâng a byìt pyâm é lhú?
12 Haî mù, ngo lé lhom hàp yu é hkyîhput jòq lhê lhú?
Haî mù, ngo lé huq kô é naúwang jòq lhê lhú?
13 Haû a nghut jáng, ngò gi, ahkuî, ngón za lèq to berâ nghut lhê;
ngò gi, yhup ngón byùq mù, bánnô nyì berâ nghut lhê;
14 Haû yhûmsing é matú ahkuî byòq htên to bê nghut é jowò pé saî é,
myìdàm htoq mâ é zau wuî eq hkóhkam pé eq rahá le,
15 haû hîng hkông luî, yhûmsing é yhûm má ngùnhtung lhoqpyîng tô é zau wuî eq rahá le,
bánnô nyì berâ nghut lhê.
16 Ngò gi, haî mù, nbyá byá pyâm é zoshâng su le,
nyí mâ é buìloq lé a myang é nyheqnú su le, myigùng má haq lhûng pyâm é a huî é lhú?
17 Haú jowò má, agè ashop bang gi, wuîhke hkyô hpu zô é mai nô byùq bê nghut ri;
haú jowò má, ngú byùq é bang bánnô nyì bê nghut ri.
18 Shúm zung é bang le ngón za myang no bekô nghut ri;
wú gon sû tân garû taî é htê le a wó gyo lo nghut ri.
19 Haú jowò má tiq bang ko bang nyi bum ri;
jùn pé gi, jùnsing lòq mai lùt bekô nghut ri.
20 Wuîhke jamjau mó hui zo sû lé, haî mù mau bó byî é lhú?
I-myìt nhiklhum má no hpû nyì sû lé, haî mù chyungxe byî é lhú?
21 Yhángmòq gi, shî râ lé myìt tui kôlhang, a shî kó nghut ri;
yhángmòq gi, haq tô é sùtzè lé ho é htoq má shî râ hkyô lé je ho akô nghut ri.
22 Yhángmòq gi, lùpdùng má jé kôjáng,
gabú hkyô wó mù, gabú byam chyû akô nghut ri.
23 Yhâng é hkyô lé haq pyám byî hpyuq mù,
Garai Gasâng èq kyâm lhîng tô é huî é sû lé,
haî mù chyungxe byî é lhú?
24 Hkâsu mù gâ le, myìt nò-kying htê gi, ngá é nyí wui lhê é zoshuq dùt nyi ri;
ngá é ngaùhkyûng ngaùyang htê gi, wuìgyùn su gyun htoq lo ri.
25 Ngò gyùq kyum é hkyô gi, ngá chyáng jé bê nghut ri;
ngò gyùq chiq é hkyô gi, ngá chyáng dùt htoq bê nghut ri.
26 Ngò gi, nguì ngón hkyô le, yùqyò hkyô le, a wó nghut ri;
Ngò gi, bánno hkyô a wó, wuîhke jamjau hpu zo hkyô za ru wó ri.” gâ ri.