Elihpaza
4
Haú hkûn, Teman byù Elihpaza tû taî é gi,2 “Nàng eq dáng nyo le, nàng a wó jân pyám dùt râ lhú?
Nghut kôlhang, dang a nyo é za ó yùq wó nyi to râ lhú?
3 Byù myo myo lé nàng hkâsu kut mhoq kyô é hkyô eq,
lòq wum a bò bang lé nang hkâsu kut wum-o lhoqkíng byî é hkyô lé, myìt tû wú aq.
4 Náng é dang pé gi, myìt lèqbàt bang lé htuqbáng byi bê nghut lhê mhaî;
nàng gi, nyhuî lhâng byùq bê hkyîhput lé wum-o lhoqkíng byi bê nghut lhê mhaî.
5 Nghut kôlhang, ahkuî, náng chyáng wuîhke jamjau hkyô jé jáng, nàng gi, myìt wum gyuî byùq bê nghut ri;
hau èq nang lé nhuq bàt jáng, nàng gi, gyùq ngha to bê nghut ri.
6 Nàng târâ hkúnggâ é hkyô gi, nàng myìt lum tô é jang nghut mù,
nàng mara a bo é hkyô pé gi, nàng myòqbyu é jowo nghut lhê, a nghut lhí?
7 Ahkuî, myìt wú aq; mara a bo é sû ó yùq wá, lhoqhtûm pyâm é huî ri lhú?
I-myìt díng é sû ó yùq wá, lhoqhtên hpyoq pyâm é huî ri lhú?
8 Ngò byu myang é dông ga jáng, agè ashop hkyô lé hpuq ho sû eq,
wuîhke jamjau hkyô lé hô hkyô é sû gi, haú lé myang yâm yù râ nghut lhê.
9 Yhángmòq gi, Garai Gasang soq mùt é mai htên byòq byùq râ nghut lhê;
yhángmòq gi, yhâng é nhikmó-yo hkyô mai htûm byùq kôrâ nghut lhê.
10 Hkanghkyî pé gi, mying garû é eq nying kyuq sê lhê;
nghut kôle, hkanghkyi râm zô pê é zuì le gyuî byùq bê nghut ri.
11 Hkanghkyi lo gi, sho a wó yû lo mù shi byùq é nghut mù,
hkanghkyi zing é yhang zô pé gi, byo myín byùq bê nghut ri.
12 Dang rahkun gi, ngo lé haq taî é nghut mù,
ngá é nohkyap gi, dangsoq htê haú lé wó gyo bê nghut ri.
13 Byu pé yhup mó myí tô é hkûn,
myín lhê é yhupmòq é yánmai, ngá é i-myìt nhúngnhâng nyi é u,
14 ngò gi, gyùq mù, gyùq nán nyî luî,
ngá é showui showang bànshoq gi, nún byùq bê nghut ri.
15 Sôbyô rabyò, ngá é myòq hí mai laî ló é nghut mù,
ngá é gùng mâ é sho-maú pé gi, xông xông dùt bùm bê nghut ri.
16 Haû gi, nô yàp to kôlhang,
haî nghut é lé ngò a wú sé nghut ri.
Ngá é myòq hí má wùpzo za yàp tô é nghut mù,
yin za gâ é htê lé ngò wó gyô é gi,
17 ‘Shi byùq sê é byù gi, Garai Gasâng htoq je wó díngmán râ lhú?
Xângzo byù gi, yhang lé Hpân Su htoq je wó sân-yúng râ lhú?
18 Garai Gasang gi, Yhâng é duìnhâng zoshâng wuì lé a lum é nghut mù,
Yhâng é maumang lagyô pé lé lháng, Yhang mara hun é nghut jáng,
19 tsohtung nghut é gùng pé má chyungxe duì mù,
tseyûn lé a-pûn awang hi to luî,
bau su lhoqhkyop pyâm é hui bang gi,
je riyhang mara hûn jang jòq lhê, a nghut lhí?
20 Yhángmòq gi, nàpsûn eq myín gyoro má bàt hkyop pyâm é huî nyì mù,
ó le haî su a ngàm byî é za, ahtum abyùq htûm ló byùq bê nghut ri.
21 Yhángmòq gi, hpàqchyî byéng-yá a bo é za shi ló byùq kó sháng gàq ga,
yhángmòq é sùtzè lé wùp yu pyám byi bê, a nghut lhí?’ gâ ri.