HKYA-ON KÚNGTÔN
Laiká
(Psalms)
1 BÙK
Hkya-on Kúngtôn Laiká 1-41
Díngmán Sû Hkungsô Wó É Hkyô
1
Agè ashop bang haq htung é hpàqchyî máa bo cháng,
yubàk dàp bang kut é hkyô má
a bo yàp,
rhoî jihkyoî kut bâng é zùng jang má
a bo zung e za,
2 haû Yhûmsîng Garaî é jep é târâ lé
myìt nguì ô nau nyi é htoq agó,
târâ hau lé nyí myín
myìt lhîng hkyùq wú nyi é sû gi,
hkungsô wó nyi ri.
3 Haú yùq gi, wuìlàng yàm má hô tô é,
ahkyíng yàm-yòq jé jáng ashi zuî é,
ahaq pé le a nyhuî byùq é
agàm su nghut nyi ri.
Yhang zui saî é múzó hkangmó
wó ûngmyuq râ nghut lhê.
4 Haû agè ashop é bang kúm gi,
haû su a nghut!
Yhángmòq gi, lai èq mùt tâng é
hpuichyap eq pung akô nghut ri.
5 Haû mù luî, agè ashop bang gi,
târâ jéyáng é má mara hun é
hui zo kôrâ nghut mù,
yubàk dàp bang gi,
díngmán bâng é hpong má,
wó bo yàp kôrâ a nghut.
6 Hkâsu mù gâ le, Yhûmsîng Garai gi,
díngmán bâng é hkyô lé
wú zúng byî nyi é nghut mù,
agè ashop bâng é hkyô kúm gi,
htên byòq byùq râ nghut lhê.