Yobaq
42
Haú hkûn, haû Yhûmsîng Garai lé Yobaq tû taî é gi,2 “Nàng gi, lhúnglháng wó kut é Sû nghut é lé le,
Nàng htung tô é hkyô lé a wó hkûm zing pyám nghut é lé le, ngò sê lhê.
3 ‘Ngò htung tô é hkyô lé, hpàqchyî a bo é dông lhoq nhúngnhâng pyâm é sû gi, ó yùq nghut lhê lhú?’ ga Nàng myî é nghut lhê.
Gè gè yhang, ngò gi, ngò a sê gyô é hkyô pé lé le,
ngò a ung sê é maúhpo hkyô pé lé le, záng taí bê nghut ri.
4 ‘Ahkuî gyo aq; Ngò dang nyô bá;
Ngò, nang lé myi râ; nàng tû taí aq.’ ga Nàng taî é nghut lhê.
5 Ngò gi, Nàng eq séng luî, ngá nohkyap èq yhang wó gyô wú bê nghut lhê;
nghut kôle, ahkuî gi, ngá myòq èq yhang Nang lé myàng bê nghut ri.
6 Haû mù, ngò gi, ngá gûng ngò wú tiq pyám luî,
hpuílhup yô eq myiwap bûm má myìt lhîng wó é nghut lhê.” gâ ri.
Danghtâng Sat É Hkyô
7 Haû Yhûmsîng Garai gi, Yobaq lé dang haú pé ban taî é htâng má, Teman byù Elihpaza lé, “Nàng eq náng é luzúm nhik gi, ngá é duìnhâng zoshâng Yobaq su, Ngò eq séng luî tengmán é hkyô a taí kó nghut é yánmai, Ngò, núngmòq lé nhikjum yô ri. 8 Haû mù, núngmòq gi, nohtó nyhit du eq saulo nyhit du hkyin yù mù, Ngá é duìnhâng zoshâng Yobaq chyáng ê luî, núngmòq é matú myi nyhé hkungga ê nhông byi keq. Haú hkûn, Ngá é duìnhâng zoshâng Yobaq mai núngmòq é matú kyûdûng tôngbán byi râ nghut luî, Ngò gi, núngmòq go pyâm é hkyô lé mara dam a byi râ matú, yhang kyûdûng é dang lé gyo byi râ nghut lhê. Núngmòq gi, Ngá é duìnhâng zoshâng Yobaq su, Ngò eq séng luî tengmán é hkyô a taí kó nghut ri.” ga taî ri. 9 Haû mù, Teman byù Elihpaza, Shu-a byù Bilidat eq Namat byù Zohpara gi, yhángmòq lé haû Yhûmsîng Garai taî é eq rajung za kut bekô nghut mù, haû Yhûmsîng Garai gi, Yobaq é kyûdung dang lé gyo byi bê nghut ri.
10 Yobaq mai yhâng luzúm wui é matú kyûdung byî é htâng má, haû Yhûmsîng Garai gi, Yobaq no hpuzô nyi é mai lhoqlhut yû luî, hí lé yhang wó é htoq má í tú puq byi bê nghut ri. 11 Haú hkûn, yhâng é gu-mang gu-nhá wuî bànshoq bang eq hí lhê é yhâng é buìnùm wuì yùq hkangmó gi, yhang lé lahpùq lé kôluî, yhâng é yhûm má yhang eq rahá chôm zoshuq akô nghut ri. Yhángmòq gi, yhang lé haû Yhûmsîng Garaî èq hpu hke zó nhang é hkyô bànshoq é yánmai, yhang lé nhiktíng byi kôluî, yùq hkangmó, yhang lé ngùnhkyí eq hîng góng tsing byî bum akô nghut ri.
12 Haû Yhûmsîng Garai gi, Yobaq lé, yhâng é i-pyàt hî tûm htoq htang túm je riyhang shimân byi bê nghut ri; yhang gi, sau ramûn myi hkyîng, gola-uk hkyuq hkyîng, nohtó rahkyîng zúm eq loze rahkyîng du wó ri. 13 Hau htoq agó, yhang gi, yùqzo nyhit yùq eq byìzo sum yuq le wó ri. 14 Zo nhammó yùq é myìng gi, Yemima gâ ri; mulat yùq é myìng gi, Kezi-a gâ ri; muroí yùq é myìng gi, Keren Hapuk gâ ri. 15 Yobaq é yhang zo byìzô pé su yúng é myiwe zo wuî lé, haú mau ra-mau gón má a myang hô nghut ri; yhángmòq é yhâng wa Yobaq gi, yhángmòq é mùng zô pé eq rajung za, yhángmòq lé silî wunlî tsing gàm byî ri.