41
Nàng gi, Lewi-ahtan gâ é mànjùng mó lé ngo-nhê èq wó lâng yù râ lhú?Yhâng é shô lé tuî èq wó tuî zing to râ lhú?
2 Nàng gi, yhang lé nhôshoí wó shoí byi râ lhú?
Yhâng é âm mai gòknghê èq wó nghê ròt râ lhú?
3 Shogyo nhikmyîn yù râ matú, yhang, nang lé wùt dûng ngau nyì râ lhú?
Dang ngón dang nguî dông, yhang, nang lé nyò râ lhú?
4 Náng é jùn ayang wó dùt nyì râ matú,
yhang, nàng eq dangshikaq to râ nghut lhê lhú?
5 Nghoqzo eq gyâkûn é su, yhang eq wó gyâkûn lhê lhú?
Náng yhûm mâ é myiwe zô pê é matú, yhang lé nàng wó tui byi râ lhú?
6 Ngozo wuìloq kut bang, yhang lé wó ûng lhum kôrâ lhú?
wuìloq kut bang, yhang lé wó hpyoq gâm kôrâ lhú?
7 Yhâng é sho-kuq lé, ngogûn lham èq wó gûn râ lhú?
Yhâng é ulhum lé, ngogûn lham èq wó gun ròt râ lhú?
8 Yhang lé lòq èq záng wú kôle,
nàng gi, yhang eq hkâsu kut htîm lhûm é lé myìtbun mù,
hkâ-nhám le haû su dum kut râ a nghut lo!
9 Yhang lé wó hkang zìng râ matú myòqbyu é gi, shut é hkyô za nghut lhê;
yhang lé myang le lháng, myìt htûm lhê a nghut lhí?
10 Yhang lé wó nhaû pun shoq ê wám nyaú é myìt bo é byù ó a nyì nghut ri;
haû nghut jáng, Ngo lé htuqhtíng râ matú, Ngá é hí má ó yùq wó yàp râ lhú?
11 Ngò jeju wó tau byi shoq, Ngo lé jeju kut é byù ó nyi lhê lhú?
Mauhkûng ô mâ é lhúnglháng gi, Ngá é chyat nghut lhê.
12 Lewi-ahtan gâ é mànjùng é hkyî lòq pé, wum-o a-tsam, htuk é gùnghkyâng eq séng luî,
Ngò a taî é za nyì râ a nghut.
13 Yhâng é bumó lé ó yùq wó hkyut shang pyám byi râ lhú?
Yhâng é gyèhking í pyâm gyoro má ó yùq wó yâm ròt râ lhú?
14 Yhâng é nhuthkum lé ó yùq wám hpóng râ lhú?
Yhâng é zuì lhînghkyùq má gi, gyùq chiq hpo chyat jòq tô ri.
15 Yhâng é nùnghkûng má gi, gòlong pé ayán yán kut,
dizìk htûng tap tô é su, rahá kíng kíng tap tô ri.
16 Ralong eq ralong yhep yhep tap tô é nghut mù,
agyo má laì lháng a wó wâng nghut ri.
17 Ralong eq ralong xoq gîng lhûm tô é nghut mù,
haú pé yhep yhep dùt to luî, a wó gam hkoq pyám nghut ri.
18 Yhang âchî chî jáng, dùq bang lo ri;
yhâng é myòqjí gi, nàpsûn maubó su dùt ri.
19 Yhâng é nhut mai myishâm pé dùq htoq nyî mù,
myizik pé bik myha htoq nyi ri.
20 Jàm htang myi htoq má xuq tô é au tsû soq htoq é su,
yhâng é nhô mai myihkau htoq nyi ri.
21 Yhâng é soq gi, myigye lé myi wó dùq nhâng mù,
yhâng é nhut mai myishâm htoq nyi ri.
22 Wum-o gi, yhâng é lìngpûn má bo to mù,
gyùq nghâ hkyô gi, yhâng é hí má e ló ri.
23 Yhâng é sho long pé xoq gîng lhûm tô é nghut mù,
kíng kíng dùt tô é yánmai, a wó dui lu nghut ri.
24 Yhâng é nhiklhum gi, lùqgòk su htan é nghut mù,
a-o hkyam luí long su nghut nyi ri.
25 Yhang htoq shit jáng, wum-o bò bang lháng gyùq nán bûm mù,
gyùq ngha byùq kô é yánmai, jâng maú ngha tô bum akô nghut ri.
26 Yhang lé sham èq zan kôlhang, haî dùt râ a nghut;
lhâm, myoshi eq gyèzè pé le, yhâng chyáng zùq râ a nghut.
27 Yhang gi, jòqtoq lé, hkówá su,
gyi lé, wôm byùq bê é sik su kut pyám râ nghut lhê.
28 Myoshi pé gi, yhang lé wó hpâng nhâng râ a nghut;
lùqcham tseshi pé gi, yhâng é matú hpuichyap su nghut nyi ri.
29 Gán-yang gi, yhâng é matú hkówá hkat su nghut byùq mù,
lhâm htê lé, yhang wui pyám byî ri.
30 Yhâng é wamkuq gi, au jap su nghut mù,
gùq gyèk long su hkabap lé gyèk ri.
31 Yhang gi, nìk é jang lé, au tsu é su tsû nhâng luî,
nhông lé, nam é jung bo é au lé lhu é su lhu ri.
32 Yhang laî ló é ahkô gi, dùq bang é nghut mù,
nìk é jang lé gi, xâm hpyû su ngam pyám byi kôrâ nghut lhê.
33 Myìdàm htoq má yhang eq du é a nyì nghut ri;
a dàt gyùq é zè dông yhang lé hpan to bê nghut ri.
34 Myìt myhang é bànshoq lé, yhang ahtoq mai wú nyi ri;
yhang gi, nghutbûn é tân jung yòsô zè bànshoq é hkóhkâm nghut ri.” gâ ri.