40
Haû Yhûmsîng Garai, Yobaq lé xoq taî é gi,2 “Dangnyhin nyhin naû sû gi, Wum-o a-tsam dìk shoq bò Sû eq dangnyhin ge nyhîn lhum râ lhú?
Garai Gasang lé mara hun é sû gi, Yhang lé tû taî wú sháng gàq!” gâ ri.
3 Haú hkûn, haû Yhûmsîng Garai lé Yobaq tû taî é gi,
4 “Ngò gi, gíngdán sû a nghut mù, Nang lé hkâsu wó tû taí râ lhú?
Ngò gi, ngá é lòq èq ngá é nhut lé nghop pyâm to râ nghut lhê.
5 Ngò gi, radàm taí jáng, tû taí râ hkyô haî a bò lo;
í dâm taí jáng, xoq taí râ a nghut lo.” gâ ri.
6 Haú hkûn, haû Yhûmsîng Garai gi, laìdun mó mai Yobaq lé dáng nyo ri; Yhang nyo é gi,
7 “Sarhê hpó su hpyihit hit mù, rì rì kut to aq;
Ngò gi, nang lé myi bá;
nàng gi, Ngo lé tû taí aq.
8 Nàng gi, Ngá é târâ ràp-rá hkyô lé lhoqbyòk pyám mù,
nàng díngmán é hkyô lé shit râ matú, Ngo lé mara hûn nau ri lhú?
9 Garai Gasâng é lòqbú sû é lòqbú nàng wó lhê lhú?
Yhang su maugum htê wó lhoqmyhíng râ lhú?
10 Haû jáng, hpungwup shingkang eq hkìkhkâm hkyô lé mhôn chûng mù,
xânghpoq nge wó hkyô eq kô làm hkyô lé mèbu su wùt to aq.
11 Náng é nhikmó-yo hkyô lé hut hkyô kat mù,
nghutbûn é bang bànshoq lé wú luî, yhángmòq lé lhoqnyhum pyám aq;
12 nghutbûn é bang bànshoq lé wú mù, yhángmòq lé lhoqnyhum pyám luî,
agè ashop bang lé, yhángmòq yàp tô é jang má nâng zìk pyám aq.
13 Yhángmòq bànshoq bang lé, hpuílhup yô má rahá myhup pyám luî,
yhángmòq é myòqdong lé mosumhkung má haq pyám byi aq.
14 Haú hkûn, Ngò gi, náng é lòqyo lòq èq nang lé wó hkyi yù râ nghut lhê nghû,
náng é hí má yín yû râ nghut lhê.
15 Ngò, nang lé hpan é su,
hpan é Behemot gâ é yòsô zè mó lé wú aq;
yhang gi, no su mhan zô ri.
16 Yhâng é wum-o gi, yhâng é hpyidum má nghut luî,
yhâng é a-tsam gi, yhâng é wamdau shogyi má nghut ri!
17 Yhâng é sho-myi gi, kyám gâm su fùt fùt hê luî,
yhâng é tangbaú shogyi pé gi, a-pyâm pyâm dàp tô ri.
18 Yhâng é showui showang pé gi, gyi chô hkat pé su nghut luî,
yhâng é hkyî lòq pé gi, jòqtoq dumbáng eq du ri.
19 Yhang gi, Garai Gasâng é lòqmú pé má sânghî é lòqmú nghut mù,
yhang lé hpan é Sû za, yhang lé shâm wó byî é nghut lhê.
20 Bùm pé gi, yhâng é matú zoshuq lhoqhtoq byi mù,
tân jung yòsô zè bànshoq gi, haú pé má lé sùp gyâkûn akô nghut ri.
21 Yhang gi, wuì muidum gàm ô pé má ùp mù,
jàm gàm pé eq mhanhpup yô hkaû má haq tô ri.
22 Wuì muidum gàm pé gi, yhang lé yhángmòq é wùpzo ô má haq to luî,
wuìlàng zo ayàm mâ é sikxû gàm pé gi, yhang lé yùq lhîng tô ri.
23 Wuìlàng ûm lò kôlhang, yhang gi, a gyùq nghut ri;
Yhâng é nhut má Yodan làng lo htung kôlhang, yhang gi, ngón za nyi tô ri.
24 Yhang byu myang tô é má, yhang lé ó yùq wó chyup râ lhú?
Yhang lé myhî yù mù, nhôshoí wó shoí byi râ lhú?