39
Yo pé hkâ-nhám azo shuî é lé, nàng sê lhê lhú?Xat zîng xat zo shuî é hkûn, nàng byu wú é nghut lhê lhú?
2 Haú pé lha-mó hkâ-myhó hkyap màt mù, azo shuî é lé nàng nghap wú é lhú?
Haú pé azo shui râ ahkyíng lé, nàng sê lhê lhú?
3 Haú pé gi, dô gòp luî azo shuî pyám mù,
azo shui nô no é hkyô zîm byùq é nghut ri.
4 Azô pé gi, wáng lô mù, yòso má kô lò luî,
góshut htoq e ló mù, înû chyáng a dum taû lò lo kó nghut ri.
5 Yòsô loze lé ó yùq lhoqlhut tô é lhú?
Haú pé lé tuî tô é tui lé ó yùq hpyi pyám byî é lhú?
6 Ngò gi, haú pê é matú, yòso lé yhángmòq é yhûm dông byî to mù,
xô ngam é maumyî lé yhángmòq é nyì jang dông byî tô é nghut lhê.
7 Haú pé gi, wà mâ é garu garín htê lé haî su a ngàm kut mù,
châng hkat kón su é htê lé a wó gyo byi kut ri.
8 Bùm pé gi, haú pê é mhan yô dùt mù,
haú pé gi, mhan nyuî haq lé hô zô bum akô nghut ri.
9 Hpòqlhâm gi, náng é mú zui saí naû luî,
myín lé náng é no-tso lànghkang má yhup râ lhú?
10 Yhang lé nàng li wó tuî tap byî chûng mù,
langhkaû pé lé wó hpuq nhâng râ lhú?
11 Yhang wum mó bo é yánmai nàng wó lùmhkaû râ lhú?
Yhang lé náng é múzó mó pé wó àp to râ lhú?
12 Náng é gùqzò muilhum lé ê hto mù,
chyârâng má lo tsîng bum to râ matú, yhang lé nàng wó lûm râ lhú?
13 Gola-uk nghoq é dùng eq sho-maú pé gi,
wàgyàng nghoq lé a hkyit kôlhang,
hkyî kyang nghoq gi, gabú tung dùng bat nyi ri.
14 Yhang gi, yhâng é a-ú pé lé myigùng má tô pyâm tô é nghut mù,
hpuílhup gi, a-ú haú pé lé lhoqnye byî é nghut ri;
15 yhang gi, a-ú haú pé lé, hkyi èq záng nâng pyám byi râ eq
yòsô zè pê èq záng nâng hkoq pyám byi râ lé, a myìt chiq nghut ri.
16 Yhang gi, yhang shuî é azo pé lé, yhang eq a sêng é dông htân htân kut pyám luî,
akôm za a-ú hkyô pyâm é lé, haî su a ngàm kut pyâm ri;
17 hkâsu mù gâ le, Garai Gasang gi, yhâng chyáng mai hpàqchyî byéng-yá wùp yu pyám byi luî,
yhang lé sê gyô é u-nuq a byi kut é nghut ri.
18 Nghut kôlhang, yhang gi, dìn râ matú dùng pyo é hkûn,
myang eq myang ji ji sû lé wuìhô hkyô pyám byî ri.
19 Myâng é wum gi, nàng byî é nghut lhê lhú?
Myâng é lìngzing mâ é xâm shuq lé gi, nàng yùq nhang é nghut lhê lhú?
20 Nàng gi, yhang lé, dinggám pé byam gó é su byam gó nhang é nghut lhê lhú?
Myâng é nhô myìng htê gi, gyùq chiq hpo nghut lhê, a nghut lhú?
21 Yhang gi, nhikhko zô é dông hkôdòq èq myì gyek gyèk mù, yhâng é wum lé gabú nghutbun luî,
gyè jùm lé tê râ matú htoq e ló ri.
22 Yhang gi, gyùq chiq hkyô lé wuìhô hkyô pyám byi luî, haî lé le a gyùq nghut ri;
shâm pê é yánmai le a huî zùt nghut ri.
23 Myoshi htuq eq dùq wìk é lhâm mó lhâm zo gi,
yhâng gùng htoq má rùk ràk myhîng ri.
24 Yhang gi, nhikmó-yo luî, myi-tse lé ngàt zoa mù,
tut htê myìng jáng a wó jân yàp to lo nghut ri.
25 Yhang gi, tut htê myìng eq, ‘Ahà!’ ga mù,
majan zân myhîng é htê lé le,
gyèzaû pé garû myhîng é eq majan má garû myhîng é htê lé le, we we mai wó gyô ri.
26 Zùnkyang gi, náng é hpàqchyî yù luî,
yhâng é dùng pyô mù, maupyî shut dâng é nghut lhê lhú?
27 Zùnbung gi, nàng hkunmó hkyó luî, dâng dòq ló mù,
myhang é jowò má sut saî é nghut lhê lhú?
28 Yhang gi, lùqpyoq pé má nyì mù, myín lé nyi lai luî,
myhang é lùqbùm pé gi, yhâng é gingtíng jowò nghut ri.
29 Yhang gi, haû mai zoshuq lé ho wú mù,
we we mai zoshuq lé yhâng é myòqjí èq byu myang ri.
30 Yhâng é zùn zô pé gi, sui myàng shuq kômù,
màng jòq é jang má, yhang nyi nyi ri.” gâ ri.