Yhûmsîng Garai Dáng Nyo É Hkyô
38
Haú hkûn, haû Yhûmsîng Garai gi, Yobaq lé laìdun mó mai dáng nyo ri. Yhang nyo é gi,2 “Ngò htung tô é hkyô lé, hpàqchyî a bo é dang pé dông lhoq nhúngnhâng pyâm é sû gi,
ó yùq nghut lhê lhú?
3 Wàqngân hpó su hpyihit hit mù, rì rì kut àq;
Ngò dangmyi myi bá, nàng tû taí aq.
4 Ngò, myìdàm htoq é a-pûn awang lé hi é hkûn, nàng gi, hká má nyi tô é lhú?
Nàng sê gyô é nghut jáng, Ngo lé taî kyo aq.
5 Hau é hîng hpyang làm hpyang lé tú sû ó yùq nghut é lé, hkyak nàng sé râ nghut lhê!
Haú lé kê é tui lé, ó yùq lâng gyân é nghut lhê lhú?
6-7 Bó-kyî pé mahkôn hkon nyì mù,
maumang lagyô péa bànshoq bang gabú garû nyi bùm kô é u lé,
hau é a-pûn awang lé haî má hkyô to mù,
hau é htúngchyûn lùqgòk lé, ó yùq lheq tô é nghut lhê lhú?
8 Wuìshuq lung-aû gi, înû ûnghkaû mai bùt shun htoq lo é su htoq lo é hkûn,
ó yùq wó xaû chî lhûng pyâm é nghut lhê lhú?
9 Ngò gi, mhut pé lé, hau é mèbu kut mù,
htu é mauchut lé, haú lé htup é pánchoq kut é nghut lhê;
10 Ngò gi, hau é maukyo to mù,
haú má hkum pé eq hkumkyáng pé lé tô é hkûn,
11 ‘Nàng gi, shi má za ge jé mù, shî mai a ge lai râ nghut lhê;
náng é nghutbûn é wuìlhêng pé gi, shî má zîm byùq râ dùt lhê.’ nghû taî é sû, ó yùq nghut lhê lhú?
12 Nàng gi, náng é i-pyàt má, nàpsûn lé hkunmó hkyô mù,
yhâng é jowò má maubó nhâng luî,
13 maumyî myi chyûn má zui luî,
agè ashop é bang lé ko hkyô pyám nhang wú bê nghut lhê lhú?
14 Myìdàm htoq gi, dizìk saî yù bê nghut é tso-myî su dùt mù,
haú pé bànshoq gi, mèbu su de de dùt htoq é nghut ri.
15 Agè ashop bâng é maubó gi, byùq ló byùq mù,
yhángmòq é nghutbûn é lòqbú gi, lhoqhkyuî pyâm é hui zo bê nghut ri.
16 Nàng gi, wuìshuq lung-aû hkaû mâ é wuìbúm pé má wang jé wú bê lhú?
Nàng gi, nìk dik é achuq má ê ê lò lò kut wú bê lhú?
17 Nang lé, shî nò hkyo é hkum pé shit wú bê lhú?
Tîng tîng nòq é shîwup hkum lé, nàng myang wú bê lhú?
18 Myìdàm htoq hkâlhám lam é hkyô lé, nàng sê hkyâng bê lhú?
Shí pé lhúnglháng lé nàng sê é nghut jáng, Ngo lé taî kyo aq.
19 Maubó bó htoq lo é hkyô gi, hká má lhú?
Mauchut jòq é jang le, hká má lhú?
20 Nàng gi, maubó eq mauchut lé, ó le ô é jowò má wó yu ê râ lhú?
Haú í lhûm é nyì jang jé hkyô pé lé, nàng sê lhê lhú?
21 Haú hkûn, nàng gi, hku lé bê nghut é yánmai, hkyak sé râ nghut lhê!
Nàng nyì bê chyungxe buìnyì pé le myo bê nghut ri!
22 Nàng gi, gyo tsîng kat tô é dò má wang wú bê lhú?
Nàng gi, lìkwò bo é dò lé myang wú bê lhú?
23 Haú pé lé gi, wuîhke jamjau huî é u mâ é matú le,
majan zân é buìnyì pê é matú le, hkong tô é nghut lhê.
24 Maubó lé gam é jang shut jé é hkyô gi, hká má nghut luî,
myìdàm htoq lé wó mùt nghop é buìhtoq laì jòq jang gi, hká má nghut lhê lhú?
25 Mau mó wò râ wuìhkyo htông é eq,
maugum dìng gâ é laìdun mó é matú hkyô htông é sû gi, ó yùq nghut lhê lhú?
26 Mau haû gi, ó le a nyi é maumyî má wuì lhoqteq râ eq,
byù le a nyi é chamchyuîyuì dùt é jang má wò râ matú nghut luî,
27 hâm pyâm tô é maumyî nhik wó dìk mù,
wàhu yùq htoq lô nhâng râ nghut lhê, a nghut lhú?
28 Maucham gi, îwa wó lhê lhú?
Nghânzoq pé lé gi, ó hku é lhú?
29 Nghânhkyí pé gi, ô pê é ûnghkaû mai htoq lo é nghut lhê lhú?
Mauhkûng mâ é nghânhpyû lé gi, ó hku kat é nghut lhê lhú?
30 Wuì pé gi, lùqgòk su htan byùq mù,
nìk jang mâ é wuìlhêng pé gi, gyám byùq bê nghut ri.
31 Kyî wòqhkyún pé lé, nàng wó tuî tsing râ lhú?
Maubó kyi é hpyihit lé, nàng wó hpyî râ lhú?
32 Kyî hpúng azòng pé lé, yhángmòq é ahkyíng má nàng ge lhoqhtoq lhê lhú?
Wàqdàng kyî eq yhâng é kyî zo pé lé, nàng wó shuî u râ lhú?
33 Maúhkung é târâ pé lé, nàng sê lhê lhú?
Garai Gasâng é ùphkâng hkyô lé, myìdàm htoq má nàng wó tô lhê lhú?
34 Nang lé wuìwúm èq ûm pyám râ matú,
nàng, mhut pé lé wó wùt taí râ lhú?
35 Nàng gi, maulhap pé lé hpyat nhâng mù,
yhángmòq gi, nang lé, ‘Ngá-mòq shî má nghut lhê.’ ga wó tû taí kôrâ lhú?
36 Wuìnghoq hpyû lé, hpàqchyî byéng-yá ó byî é nghut lhê lhú?
Wòqhpó lé, sê gyô é u-nuq ó byî é nghut lhê lhú?
37-38 Mhut lé nghap râ hpàqchyî byéng-yá, ó yùq wó lhê lhú?
Hpuílhup pé ahkyí dùt byùq mù,
myigùng pé hkok hkok htan byùq é hkûn,
mauhkûng mâ é wuì yam pé lé, ó yùq wó tu mhuq hkyó râ lhú?
39-40 Nàng gi, hkanghkyi zìng lé zoshuq wó hô byi râ lhú?
Hkanghkyi zô pé, yhángmòq é dong má haq gòp lúng mù,
mhanpúng mai haq gyám wú tô é hkûn,
yhángmòq lé gyi shoq wó byi tso râ lhú?
41 Nghoqnòq zô pé zoshuq a wó mù, dâng yông wún luî,
Garai Gasang lé zoshuq wùt dûng ngaù kô é hkûn,
nghoqnòq pé lé zoshuq byî é gi, ó nghut lhê lhú?