37
Haú hkyo é yánmai, ngá é singguq htung mù,yhâng é jowò mai byam chyû nyi ri.
2 Gyo keq! Garai Gasâng é htê mó nghut é,
Yhâng é nhut mai htê mó o mó htoq é lé gyo keq.
3 Yhang gi, mauhkûng ô má htê mó haú lé lhoqpyo kat mù,
myìdàm htoq htáng shoq maulhap hpyat nhang ri.
4 Hau htâng má, Yhâng é htê mó haû jé mù,
Yhâng é hpung bo é mying hum htê mai maugum gûm ri.
Yhâng é htê mó mying é hkûn,
Yhang haî lé le a hkûm zing to nghut ri.
5 Garai Gasang gi, maúhpo hkyô pé dông Yhâng é htê lé maugum gum nhâng mù,
ngá-nhúng a ung sê gyô é múzó mó pé kut htoq nyi ri.
6 Yhang gi, gyo lé, ‘Myìdàm htoq má gyó aq.’ ga taí mù,
maucham lé, ‘Mau mó góng wo hkyó aq.’ ga taî ri.
7 Yhang gi, Yhang hpan tô é xângzo byù bànshoq bang, Yhâng é múzó lé wó sé râ matú,
bànshoq bang lé mú lhoqgyo to byî ri.
8 Tân jung yòsô zè pé gi, yhángmòq é hkyûng pé má wàng mù,
nghêhkaû jang má haq gòp tô bum akô nghut ri.
9 Maupyî hkyam mai laìdun mó lò mù,
mautsûng hkyam mai gú é laì mó lo ri.
10 Garai Gasâng é soq gi, nghânhkyí dùt byùq mù,
dam é lam é wuì gi, gyám byùq bê nghut ri.
11 Yhang gi, mhut má wuì soq byíng nhâng mù,
haú pé dông mai maulhap hpyat nhang ri.
12 Haú pé gi, Yhang shit kyô tô é eq rajung za,
myìdàm htoq má ê ê lò lò lhing jón wún mù,
Yhang hkunmó hkyô é eq rajung za kut bekô nghut ri.
13 Yhang gi, byu pé lé mara dam byi râ matú mhut lé nhâng luî,
Yhâng é myìdàm htoq má wuì bam nhâng mù, Yhâng é shogyo nhikmyin hkyô shit ri.
14 Yobaq ê, dang shî gyo aq;
nô pyám mù, Garai Gasâng é maúhpo hkyô pé lé myìt tû wú aq.
15 Garai Gasang gi, mhut pé lé hkâsu kut hkang zìng mù,
Yhâng é maulhap hpyat nhang é hkyô lé, nàng sê lhê lhú?
16 Hpàqchyî gúmjùp Su é maúhpo múzó pé nghut é,
maulat má mhut pé hkâsu kut dâng é hkyô lé, nàng sê lhê lhú?
17 Maupyî laì lò mù, myì soq hup lô luî,
náng é mèbu pé nyê lo é hkyô lé nàng sê lhê.
18 Gyi shup tô é myòqjàm su htan é maulat kyodum lé,
nàng, Yhang eq rahá wó hpyi hkang râ lhú?
19 Ngá-mòq, Yhang lé hkâsu nghû taí râ hkyô mhoq byi aq;
ngá-mòq gi, mauchut hkaû má myùp lúng tô é yánmai,
ngá-mòq haî a dàt taî htoq nghut ri.
20 Ngò dang nyô nau é hkyô, Yhang lé bo taî kyo râ byù nyì râ dùt lhê lhú?
Yhûmsîng shi htûm byùq nau é byù nyì râ lhú?
21 Mhut pé lé lai èq mùt tâng pyâm é htâng,
maulat má dùq bang tô é buì lé,
ó yùq le a ge tu wú é nghut lhê.
22 Yhang gi, mautsûng mai hîng su dùq bang htoq lé mù,
Garai Gasang gi, gyùq chiq hpo mó nghut é kô làm hkyô mai lé lo é nghut ri.
23 Wum-o a-tsam dìk shoq bò Sû lé gi, ngá-nhúng a ung gôn htoq é nghut lhê;
Yhang gi, hpungwup a-tsam mó má wàq toq tô é hui mù,
târâ ràp-rá é hkyô eq gyai yhang díngmán é hkyô byíng tô é yánmai,
ó yùq lé le a zìk zo nghut ri.
24 Haû mù, byu pé gi, Yhang lé hkúngga hpautap akô nghut ri;
Yhang gi, hpàqchyî bò bûn é bang lé haî su a ngàm nghut ri.” gâ ri.