36
Elihu xoq taî é gi,2 “Ngo lé ahkyíng razùp zo byi shilaq;
nang lé Garai Gasâng é hkyô taî kyo râ jòq ashî.
3 Ngò gi, we we mai ngá é hpàqchyî byéng-yá lé lhoqhtoq shit mù,
ngo lé hpân Sû târâ ràp-rá é hkyô lé wàq htoq shit râ nghut lhê.
4 Ngá é dang gi, hkyak a shut é nghut mù,
gúmjùp é hpàqchyî wó sû ngò gi, nàng eq rahá nghut nyi lhê.
5 Garai Gasang gi, hpungwup a-tsam bò Sû nghut kôlhang, ó yùq lé le a wú tiq é nghut lhê;
Yhang gi, hpungwup a-tsam bò mù, sê gyô é u-nuq byíng jùp ri.
6 Yhang gi, agè ashop é bang lé chyungxe a lhut tô é za,
hpû nyì shô nyì bang lé târâ ràp-rá hkyô kut byî ri.
7 Yhang gi, díngmán bang lé a wú nyî a kut é za,
yhángmòq lé hkóhkam pé eq rahá tángmyhâng má zùng nhâng mù,
ahtum abyùq yhángmòq lé wàq toq tô ri.
8 Nghut kôlhang, byu pé, toqjâng tuî èq tuî é hui mù,
hpuzo hkyô nghu é tuî èq tuî shûng tô é hui kôjáng,
9 Yhang gi, yhángmòq shut é hkyô pé eq yhángmòq nghutbûn é mara pé lé tûn shit ri.
10 Hau htoq agó, Yhang gi, yhángmòq lé, mhoqshit lhoqjo byî é hkyô lé gyô yù nhâng mù,
yhángmòq é agè ashop é hkyô mai myìt lhîng râ matú hkunmó hkyô ri.
11 Yhángmòq jì-no gyo mù, Yhang lé dójaú kô é nghut jáng,
yhángmòq gi, nyì ngón yùqyo é buìnyì pé myang nyi lai mù,
nhik shî nhik dìk é zànwut pé myang nyi lai kôrâ nghut lhê.
12 Nghut kôlhang, yhángmòq jì-no a gyo kô é nghut jáng,
yhángmòq gi, shâm mai htûm ló byùq mù,
hpàqchyî a bo é za shi byùq kôrâ nghut lhê.
13 Garai a bò bang gi, myìt hkaû má nhikjum yô lúng tô ri;
Yhang, yhángmòq lé tuî zing to kôlhang, yhángmòq gi, garúm a wùt dung kó nghut ri.
14 Yhángmòq gi, chyungxe zànwut tiq ashî hkûn shi byùq luî,
hparà noq jowò pé mâ é shiwa hpô pé eq rahá htûm byùq akô nghut ri.
15 Nghut kôlhang, Yhang gi, wuîhke jamjau hui zô nyì bang lé, haú dông mai hkyi xe yù mù,
yhángmòq hpû nyì shô nyi é má myìt taî hpóng byî ri.
16 Yhang gi, nang lé le, myìt myo ûng wom hkyô mai mhuî htoq yû mù,
hkûm zing tô é jang mai lam é jowò má shuî jé luî,
náng é zangbó má je réng é zoshuq pê èq nhiktíng byi râ nghut lhê.
17 Nghut kôlhang, ahkuî, nàng gi, agè ashop é bang hui gíng é târâ jéyáng hkyô lé za myìt zing nyi é nghut mù,
târâ jéyáng hkyô eq târâ ràp-rá hkyô gi, nang lé châng zuî zìng râ nghut lhê.
18 Sùtzè wó hkyô mai núngmòq lé ó yùq èq a lâng nghoq yû râ matú sidìq keq;
lòqhkaû myo myo lâng é hkyô gi, náng shut a nghut byùq sháng gàq.
19 Náng é sùtzè nghut nghut, nàng kut é múzó mó pé bànshoq nghut nghut,
myìt myo ûng wôm é mai nang lé wó lhoqlhut yû râ lhú?
20 Myín lé hkâ-myìt tuî nyì;
haú u, byu pé lé yhángmòq é yhûm mai she htoq pyám râ nghut lhê.
21 Agè ashop hkyô shut a lhing ló râ matú sidìq nyì àq;
hau é yánmai, nàng gi, wuîhke jamjaû èq chyam é hpu zô nyi é nghut lhê.
22 Garai Gasang gi, Yhâng é hpungwup a-tsâm é yánmai wàq toq é huî ri;
Yhang su dùt é sará ó nyi lhê lhú?
23 Yhang e ló râ hkyô lé ó yùq wó taî kyo râ lhú?
‘Nàng kut shut bê nghut ri.’ nghû, Yhang lé ó yùq wó taí râ lhú?
24 Yhâng é múzó lé hkya-on wàq toq râ matú hkâ tô-myhí;
haú hkyô lé byu pé hkya-on mahkôn hkôn bekô nghut ri.
25 Byù bànshoq bang gi, haú hkyô lé myàng bekô nghut ri;
waxâng zo wuì gi, haú hkyô lé we we mai wú tsuq to bekô nghut ri.
26 Garai Gasang gi, hkâ-í yhang gyaú Sû nghut ri nhung!
Haú hkyô lé ngá-nhúng a ung htoq sê gyo nghut ri;
Yhâng é chyungxe zànwut lé ó a ung gôn htoq nghut ri.
27 Yhang gi, wuìboq lé lhoqtoq yû mù,
haú pé lé mhut-soq má maucham dùt nhâng luî,
28 mhut gi, haú pé lé mau wô nhang é nghut mù,
xângzo byu pê htoq má agùn agó maú wo hkyó bê nghut ri.
29 Yhang hkâsu kut mhut lé dáng nhang é hkyô eq,
Yháng nyi é zúm mai maugum hkâsu kut gúm nhang é hkyô lé, ó yùq ung sê gyo râ lhú?
30 Wú keq; Yhang gi, Yhâng é maulhap lé, Yhâng é lhînghkyùq má hpyat nhang to mù,
wuìshuq lung-aû mâ é nìk jang pé lé nghop pyám bê nghut ri.
31 Yhang gi, haú dong mai a-myû wuì lé jéyáng mù,
zoshuq agùn agó hên byî ri.
32 Yhang gi, maulhap lé Yhâng é lòq má chung to mù,
Yhâng hup râ jang má hup râ matú hkunmó hkyô ri.
33 Yhâng é mâgum gûm é gi, laìdun mó lò râ lé tûn shit é nghut mù,
no pé lháng haû jé lô râ hkyô lé wó sôn sê akô nghut ri.