35
Hau htâng, Elihu xoq taî é gi,2 “Nàng taî é gi, jo têng é su ngam lhê lhú?
‘Ngò gi, Garai Gasâng htoq díngmán lhê.’ ga nàng taí luî nhîng,
3 ‘Ngò gi, hai a-kyû wó râ lhú?
A shut é hkyô mai ngò haî wó râ lhú?’ ga, nàng, Yhang lé myî ri mhaî.
4 Ngò gi, nang lé le,
nàng eq rahá nyi é náng luzúm wuî lé le, tû taî pyám nau ri.
5 Mauhkûng lé tu wú mù,
náng htoq gyaí myhang é mhut lé wú tsuq to aq.
6 Nàng mara kut shut kôlhang, Yhang lé hkâsu wó záng râ lhú?
Nàng mara myo myo kut shut kôlhang, Yhang lé haî wó kut râ lhú?
7 Nàng díngmán é nghut jáng, Yhang lé nàng haî wó byî é nghut mù,
Yhang gi, náng é lòq mai haî wó hàp yu é nghut lhê lhú?
8 Náng é agè ashop hkyô gi, nàng su dùt é waxâng zo wuî lé za záng é nghut mù,
náng é díngmán hkyô gi, byù góbang lé za a-kyû byî é ru nghut lhê.
9 Byu pé gi, gyai yhang zìk zo zìk shuq hui kô é yánmai wùt dûng ngau bum akô;
yhángmòq gi, wum-o a-tsam mó bò bang zìk zô é lòq mai wó lùt râ matú wùt dûng bum akô nghut ri.
10 Nghut kôlhang, ó yùq le, ‘Ngo lé hpan é Garai Gasang gi, hká má lhú?
Yhang gi, ngá-mòq lé, myín má mahkôn hkôn nhâng luî,
11 myìdàm htoq mâ é gaunyhaû pé lé mhoq byî é htoq ngá-mòq lé mhoq byi mù,
maulat mâ é nghoqzô pê htoq ngá-mòq lé hpàqchyî bò nhang é Sû nghut lhê ô!’ ga a taí kó nghut ri.
12 Haû mù, Yhang gi, agè ashop bang nghutbûn bùm kô é yánmai,
yhángmòq wùt dûng ngaù kôle a tu byi nghut ri.
13 Gè gè yhang, Garai Gasang gi, akôm má wùt dûng é lé a gyo byi nghut ri;
Wum-o a-tsam dìk shoq bò Sû le, haú lé haî su a ngàm kut pyâm ri.
14 Haû mù, nàng, Yhang lé a myàng ga taî é yánmai,
Yhang gi, nang lé haî su a ngàm je kut râ a nghut lhí?
Náng é mú gi, Yhâng é hí má nghut to bê nghut mù,
nàng gi, Yhang lé láng nyî ra bê nghut ri;
15 Yhang gi, ahkuî jé shoq nhikjum yo mù, mara dam a byi kut é htoq agó,
agè ashop bang lé haî su a ngàm kut nyi ri.
16 Haû mù, Yobaq gi, yhâng é nhuthkum hpóng luî, dangsôm taî nyi ri;
yhang gi, hpàqchyî a bo é dang myo myo taî nyi ri.” gâ ri.