34
Hau htâng, Elihu xoq taî é gi,2 “Hpàqchyî byéng-yá bò bang ê, ngá é dang lé gyo keq;
sê gyô é u-nuq bo é bang ê, ngò taî é dang lé tâm gyo keq.
3 Hkâsu mù gâ le, shô gi, zoshuq lé chyam wú é su,
nohkyap gi, dang lé shang pyâm é nghut lhê.
4 Ngá-nhúng gi, jô é hkyô lé hkyin yù sháng;
ge é hkyô lé yhûmsîng yhang hkyin yù sháng.
5 Yobaq taî le, ‘Ngò gi, mara a bò;
nghut kôlhang, Garai Gasang gi, ngá é matú târâ ràp-rá hkyô lé he-ngìk pyám byî ri.
6 Ngò jô to kôlhang,
ngo lé byù mhaú dông sôn yù byî ri;
ngò mara a bò kôlhang,
Yhâng é myoshî èq a wó yâ ge yu é dàm tap byî ri.’ gâ ri.
7 Ûchyam shuq lui é su,
rhoî dang taí lui é Yobaq su dùt é byù nyi lhê lhú?
8 Yhang gi, a ge é hkyô kut bang eq zùm yàp mù,
agè ashop é bang eq rahá sô nyi ri.
9 Hkâsu mù gâ le, yhang gi, ‘Garai Gasang lé gabú nhang é gi,
hai a-kyû a bò nghut ri.’ ga taî ri.
10 Haû mù, sê gyô é u-nuq bò bang ê, ngá é dang lé gyo keq.
Târâ lu laî é hkyô gi, Garai Gasâng chyáng mai wê gâng byùq mù,
mara kut shut é hkyô gi, Wum-o a-tsam dìk shoq bò Sû eq wê gâng nyì sháng gàq.
11 Yhang gi, yùq hkangmó lé, kut é eq rajung za lató hpuq sû nghut mù,
yhûmsîng kut é eq gíng shoq htûng hui zó nhang ri.
12 Gè gè yhang, Garai Gasang gi, agè ashop hkyô kut râ a nghut;
Wum-o a-tsam dìk shoq bò Sû gi, târâ ràp-rá hkyô lhoqhpyoq pyám râ a nghut.
13 Myìdàm htoq lé ùp râ matú Yhang lé wò ó hun tô é lhú?
Mingkan gón lé wú zúng râ matú Yhang lé ó nyhi tô é lhú?
14 Yhang gi, Yhâng é myìt mai,
Yhâng é sô eq soq lé wùp taû yu é nghut jáng,
15 waxâng zo wuî bànshoq gi, rahá htûm ló byùq râ nghut mù,
byu pé gi, hpuílhup shut taû ló byùq râ nghut lhê.
16 Nàng sê gyô é u-nuq bo é nghut jáng, shí lé gyo aq;
ngò taî é dang lé gyô yù àq.
17 Târâ ràp-rá hkyô lé a nguì sû gi, wó ùp râ lhú?
Díngmán Sû eq hpungwup a-tsam bò Sû lé, mara wó byi râ lhú?
18 Yhang gi, hkóhkam pé lé, ‘Núngmòq gi, a-kyû a bò kó.’ ga taí mù,
hkúngga hpautap gíng bang lé, ‘Núngmòq gi, agè ashop é bang nghut akô.’ ga taî é Sû nghut lhê, a nghut lhú?
19 Yhang gi, zaú wui é myòqdong a hkyin é htoq agó,
asho awui dùt bang lé hkúnggâ é htoq wó bang lé le je hkúnggâ é a nghut.
Yhángmòq bànshoq gi, Yhang hpan tô é bang chyat nghut lhê, a nghut lhú?
20 Yhángmòq gi, razùp má za, myín gùnggàm má shi byùq akô;
byu pé gi, kòk kòk nán luî shi ló byùq akô;
wum-o a-tsam bò bang lé lháng, ó yùq é lòq èq le a záng é huî sêng pyám bê nghut ri.
21 Yhâng é myòqjí gi, byu é hkyô pé má wú tsuq to mù,
yhángmòq é hkyîbyè hkangmó lé châng myang ri.
22 Agè ashop hkyô kut bang wó haq to râ nghut é,
wùpzo mó eq tîng tîng nòq é jang jòq é a nghut.
23 Garai Gasang gi, târâ jéyáng râ matú byu pé mai Yhâng é hí má lé râ dông,
yhángmòq lé châng myî gôn wú nó a ra nghut ri.
24 Yhang gi, haî le a myî gôn wú é za a-tsam bò bang lé lhoqhkyop pyám mù,
yhángmòq é jowò má góbang lé nyhi tô ri.
25 Yhang gi, yhángmòq kut é múzó lé wú bê nghut mù,
myín má yhángmòq lé tu mhuq luî, lhoqhkyop pyám bê nghut ri.
26 Yhang gi, ó le byu myang é jang má,
yhángmòq é agè ashop hkyo é matú, yhángmòq lé dam byî ri.
27 Haû gi, Yhâng chyáng mai yhángmòq lhing ló byùq luî,
Yhâng é hkyô haî lé le, haî su a ngàm kut kô é yánmai nghut ri.
28 Yhángmòq gi, myùng bang wùt dûng ngau é htê lé, Yhâng é hí má jé hkyâng nhâng bê nghut mù,
Yhang gi, asho awuî é bang wùt dûng ngau é htê lé wó gyo byi bê nghut ri.
29 Nghut kôlhang, Yhang zim za kut tô é nghut jáng,
Yhang lé mara ó yùq wó byi râ lhú?
Yhang gi, Yhâng é myòqdong haq tô é nghut jáng,
Yhang lé ó yùq wó myâng râ lhú?
Yhang gi, rayùq za lé le, a-myû gón lé le, rajung za kut é nghut mù,
30 Garai a bò sû lé a ùp nhâng kut mù,
a-myû wuì myí râ lhaí a htûng nhâng kut é nghut ri.
31 Rayùq yùq mai Garai Gasang lé,
‘Ngò gi, mara byî é hui zo bê; htâng má mara a kut shut lo râ nghut lhê.
32 Ngò a hkyit myang é hkyô lé mhoq byi aq;
ngò mara kut shut bê nghut jáng, haú lé ngò dum kut jàt râ a nghut lo.’ ga taî é nghut jáng,
33 nàng myìt lhîng a wó naù kut é yánmai,
nàng ô nau é dông Yhang kut byi râ lhú?
Ngò a nghut, nàng shèq hkyin yù ra râ nghut lhê;
haû mù, nàng sê é hkyô ngo lé taî kyo aq.
34 Sê gyô é u-nuq bo é bang taî pyo é htoq agó,
ngá é dang lé gyô é hpàqchyî byéng-yá bò bang mai ngo lé,
35 ‘Yobaq gi, hpàqchyî a bo é dông dáng nyo ri;
yhâng é dang pé gi, dangkâng a bò nghut ri.’ ga taî akô nghut ri.
36 Yobaq gi, agè ashop sû su tû taî é yánmai,
htáng shoq chyam lìk wú é hui zo sháng gàq!
37 Yhang gi, yhâng é yubàk mara má gumlau toq é hkyô jàt kat yû mù,
rhoî jihkyoî dông ngá-mòq chyáng lòqpyuq bàt luî,
Garai Gasang lé jèq ho é dang lhoqmyô yù bê nghut ri.” gâ ri.