33
Nghut kôlhang, Yobaq ê, ahkuî ngá é dang pé lé gyo aq;ngò taî é dang bànshoq lé rago tâm gyo aq.
2 Ngò gi, ngá é nhuthkum hpóng berâ nghut lhê;
ngá é dang pé gi, ngá é shô-nyuq má yhang jé to bê nghut lhê.
3 Ngá é dang pé gi, ngò i-myìt díng hkyô shit râ nghut lhê;
ngá é nhutwuî gi, ngò sê é hkyô lé rago taî htoq râ nghut lhê.
4 Garai Gasâng é Sô gi, ngo lé hpan é nghut mù,
Wum-o a-tsam dìk shoq bò Su é soq gi, ngo lé chyungxe duì nhang é nghut lhê.
5 Nàng wó dùt é nghut jáng, ngo lé tû taí aq;
toq mù, náng é hkyô lé ngá é hí má taî hung wú aq.
6 Ngò le, Garai Gasâng é myòq hí má nàng eq rajung za nghut mù,
tso-hkyí zô èq za saî to huî é nghut lhê.
7 Ngá é gyùq hpo gi, nang lé wó kyuq ngha é a nghut;
ngá é lòq gi, chyìk chyìk lai shoq nang lé wó nhê zìk é a nghut.
8 Nghut kôlhang, nàng gi, ngò gyô nyi é má dáng nyo é nghut mù,
ngò gi, nàng taî é dang lé yhang wó gyô é nghut lhê.
9 Nàng taî le, ‘Ngò gi, sân-yúng lhê; ngò mara a kut shut;
ngò gi, sanséng luî, mara a bo é nghut lhê.
10 Nghut kôle, Garai Gasang gi, ngo lé htim râ hkyô hô mù,
ngo lé, Yhâng é gyè dông sôn pyâm ri.
11 Yhang gi, ngá é hkyî má hkyî-kyum hut to mù,
ngá é hkyô pé bànshoq lé rago za wú tsuq nyi ri.’ gâ ri.
12 Nghut kôlhang, ngò, nang lé taî kyo bá;
Garai Gasang gi, byu htoq gyaú Sû nghut é yánmai, nàng taî é a jo nghut ri.
13 Yhang gi, ó yùq é dang lé le a tû taí nghû,
haî mù Yhang lé mara taî hun lhê lhú?
14 Hkâsu mù gâ le, Garai Gasang gi, ó yùq a sê gyo kôlhang,
shí dá radông taí, htang dá radông taí kut é nghut lhê.
15 Byu pé, yhángmòq é yhuphpyang má yhupmui lò mù,
yhup mó myí byùq é hkûn,
yhupmòq myàng mù, myín lhê é shing-rán má,
16 Garai Gasang gi, yhángmòq é nochyam wang má dang nyô mù,
taî kyuq taî pûn ri;
17 Yhang gi, haú dông, yhángmòq kut shut nyi é mai lhing lò nhâng luî,
nghutbûn é hkyô lé hkûm pyám byî ri;
18 hau htoq agó, Yhang gi, yhángmòq lé mosumhkung shut a wang byùq râ matú hkûm zing yù mù,
yhángmòq é chyungxe lé, shi htûm byùq râ nghut é shâm mai hkyi xe yu ri.
19 Byù rayùq yùq gi, hpyang htoq má no hpû lèq to mù,
yhâng é showui showang má ayang hkê-nho jamjau hui zô é dông mhoqshit é hui râ nghut lhê;
20 yhang gi, zoshuq lé lháng a ron lo dùt byùq mù,
yhâng é sô gi, màn bo é zoshuq lé lháng ôn byùq râ nghut lhê.
21 Yhang gi, sho a dàp byùq lo mù, gyí kyuq byùq râ nghut luî,
haq lúng tô é yhâng é showui pé htoq ze byùq râ nghut lhê.
22 Yhâng é sô gi, lùpdùng má chyâng ló nyî luî,
yhâng é chyungxe gi, shî nò hkyo é duìnhâng zoshâng wui chyáng jé ló nyî bê nghut ri.
23 Nghut kôlhang, maumang lagyo rahkyîng yùq mâ é,
sô xoq byi râ maumang lagyo rayùq, yhâng é nàm má nyi to mù,
hká dông díngmán râ hkyô yhang lé taî kyô é nghut jáng,
24 maumang haû gi, yhang lé shogyo nhikmyin mù, Garai Gasang lé,
‘Yhang lé, lùpdùng shut gyó ló nyi é mai hkyi xe yù laq;
yhâng é matú shî htaí hkô lhik hkungga ngò myàng bê;
25 yhâng é gùngsho gi, zôshang é gùngsho su dùt byùq sháng gàq;
yhang gi, zorâm pyàt su dum dùt byùq sháng gàq.’ ga taî ri.
26 Haú hkûn, yhang gi, Garai Gasang lé kyû wó dung mù, Yhâng chyáng mai jeju myang yù râ nghut lhê;
yhang gi, Garai Gasâng é myòqdong lé myàng mù, gabú garu râ nghut lhê;
Garai Gasang gi, yhang lé bànshoq dum yùqyò nhâng râ nghut lhê.
27 Haú hkûn, yhang gi, góbâng chyáng ê mù,
‘Ngò mara kut shut bê; díngmán é hkyô lé ngò lu laî pyám bê nghut lhê;
nghut kôlhang, ngò hui zo gíng é í lató hpuq é a hui zo nghut ri.
28 Garai Gasang gi, ngo lé lùpdùng má gyó ló é mai hkyi xe yù bê nghut mù,
ngò gi, chyungxe maubó má myang gabú nyî râ nghut lhê.’ ga taî ri.
29-30 Garai Gasang gi, yhang lé lùpdùng mai shuî taû yù mù,
chyungxe maubó lé yhâng chyáng dùq bó byi râ matú,
yhang lé haú pé bànshoq adàm dàm kut byi bê nghut ri.
31 Gyo aq, Yobaq ê, ngá é dang lé gyo aq;
zim za kut àq; ngò dang nyô râ nghut lhê.
32 Nàng taí râ hkyô bo é nghut jáng taí mù, ngo lé tû taí aq;
nang lé ngò mara lùt nhâng nau é yánmai, taí aq.
33 A taí râ nghut jáng, ngá é dang lé gyo aq;
zim za nyì àq; ngò, nang lé hpàqchyî byéng-yá mhoq byi râ nghut lhê.” gâ ri.