Elihu
32
Haû mù, yhángmòq sum yuq gi, Yobaq yhûmsing gùng yhûmsîng díngmán bûn é yánmai, yhang lé dang a tû taí lo kó nghut ri. 2 Nghut kôlhang, Ram yhûmhtu, Buza koq mâ é Barahkela é yhang zo Elihu gi, Garai Gasâng htoq Yobaq yhânggùng yhang díngmán bûn é yánmai, gyai yhang nhikjum yo bê nghut ri. 3 Hau htoq agó, yhang gi, Yobaq lé luzúm wuî sum yuq èq tû taí râ haî a myang hô kôlhang, mara hun nyì kô é yánmai, haû sum yuq lé le nhikjum yo bê nghut ri. 4 Elihu gi, yhángmòq htoq chyungxe zànwut tiq é yánmai, Yobaq lé dang nyô râ matú láng nyi ri. 5 Nghut kôlhang, yhang gi, haû sum yuq mai Yobaq lé haî a dàt tû taí lo kô é lé myàng jáng, nhikjum yo bê nghut ri.6 Haû mù, Buza koq mâ é Barahkela é yhang zo Elihu taî é gi,
“Ngò gi, chyungxe zànwut tiq sû nghut lhê;
núngmòq gi, chyungxe zànwut ko bê bang nghut akô;
haû mù, ngò gi, núngmòq lé gùng-yuì luî,
ngò sê é lé núngmòq hí má a wám taî htoq é nghut lhê.
7 Ngò gi, ‘Chyungxe dang taí râ nghut lhê;
uhpyû daúdam bang hpàqchyî byéng-yá mhoq byi râ nghut lhê.’ nghû wó myìt é nghut lhê.
8 Nghut kôlhang, byù chyáng mâ é sô nghut é,
haû Wum-o a-tsam dìk shoq bò Su é soq gi, yhángmòq lé sê gyô é u-nuq byî é nghut ri.
9 Mang bê sû za hpàqchyî bo é a nghut;
chyungxe zànwut ko bê sû za jo têng é hkyô lé sê gyô é a nghut.
10 Haû mù, ngò taí kôlé, ngá é dang lé gyo keq;
ngò sê é dông núngmòq lé taî kyo râ nghut lhê.
11 Núngmòq dáng nyo nyi é u, ngò láng tô é nghut lhê;
tû taí râ dang lé núngmòq ho nyì kô é u,
núngmòq dangnyhin nyhîn lhûm é lé ngò gyô tô é nghut lhê.
12 Ngò gi, núngmòq lé rago gyô to byî é nghut lhê.
Nghut kôlhang, núngmòq rayùq lháng, Yobaq shut é sàksé a wó shit kó nghut ri;
yhang taî hung é dang lé, núngmòq hká yùq le a wó tû taí kó nghut ri.
13 ‘Hpàqchyî byéng-yá lé ngá-mòq myang hô bê;
byù a nghut, Garai Gasang shèq yhang lé wó ung pyâm lhê.’ nghû hkâtaí kó.
14 Nghut kôlhang, Yobaq gi, ngo lé dang dông a htuqhtíng nghut ri;
haû mù, ngò gi, núngmòq tû taî é dông, yhang lé tû taí râ a nghut.
15 Yhángmòq sum yuq gi, gyùq ngha byùq kômù, haî le a dàt tû taí lo kó nghut ri;
taí râ dang rahkun lháng a bò lo kó nghut ri.
16 Yhángmòq gi, zîm byùq bekô nghut mù,
haî le a dàt tû taí lo kô é nghut luî, maú yàp bùm bekô le wá, ngò láng to ra shirâ lhú?
17 Ngò le, ngò dông taí râ nghut lhê;
ngò le, ngò sê é taí râ nghut lhê.
18 Hkâsu mù gâ le, ngá chyáng ngò taí râ dang byíng tô ri;
ngá chyáng lúng é sô gi, taí râ matú ngo lé chyûn nyi ri;
19 Ngá é ahkaû má gi, bòng má xaû lhûng tô é tsibyiq wing su le,
bùq gòq râ za nghut é tsibyiq wing bo é sho-kuq htûng asik su le, dùt lúng tô ri.
20 Ngò gi, san za nyì ngón byùq râ matú dang nyô râ za nghut lhê;
ngò gi, ngá é nhuthkum hpóng mù tû taí râ za nghut lhê.
21 Ngò gi, ó yùq é myòqdong le a hkyîn râ nghut é htoq agó,
ó yùq hí má le, myòqdong wó râ matú dang ngón nyò râ a nghut.
22 Hkâsu mù gâ le, ngò, byù lé wàq toq dang dông lhoqngón byi sê é ru nghut le gi,
ngo lé hpân Su èq hân za ngo lé wùp yu pyám râ nghut lhê.