SÂNGHKYANG
Laiká
(Proverbs)
Sânghkyang Hpaudap É Hkyô
1
Isira-elaq hkóhkâm, Dawiq é yhang zo,Sholumon é sânghkyang pé gi,
2 hpàqchyî byéng-yá eq mhoqshit hkyô wó yû râ matú eq,
myòq bóng dang sê gyô é u-nuq
wó yû râ matú le nghut lhê;
3 jô é, târâ ràp-rá é eq,
i‑myìt dàt rhâ é dông,
wó kut nyî râ nghut é,
nhik gying û gyîng é chyungxe duì hkyô,
wó yû râ matú le nghut lhê;
4 ngòk sû lé gi,
nhik gyîng lò râ hkyô byi mù,
zorâm wuì lé gi,
hpàqchyî eq myìt hpyit sê é u-nuq,
byi râ matú le nghut lhê;
5 hpàqchyî bò bang gyô yù mù,
yhángmòq je wó sê jàt râ eq,
sê gyô é u-nuq bò bang,
hkyô-u she é hui kôrâ matú le nghut lhê;
6 sânghkyang pé eq dangtú pé lé le,
myhîhpô dang eq,
hpàqchyî bo bâng é danglhîng pé lé le,
sê gyo râ matú le nghut lhê.
7 Haû Yhûmsîng Garai lé,
gyùq hkúnggâ é gi,
hpàqchyi é a-pûn awang nghut lhê;
nghut kôlhang, nhik a gying bang gi,
hpàqchyî byéng-yá eq mhoqshit hkyô lé,
wú tiq pyâm akô nghut ri.
Zorâm Wuì Lé Sidìq Byî É Hkyô
8 Ngá zo ê, náng wa sang kyô é hkyô lé gyô yù mù,
náng nu mhoq kyô é hkyô lé le hkâkâng pyám.
9 Haú pé gi, náng é ulhum má tsûng tô é jeju banhkóng dùt mù,
náng é lìngzing má mhôn tô é
wuizo dùt râ nghut lhê.
10 Ngá zo ê,
yubàk dàp bâng èq,
nang lé mhoq hpyoq é nghut jáng,
yhángmòq htâng hkâcháng.
11 Yhángmòq mai,
“Ngá-mòq htâng cháng aq;
byu é chyungxe sat râ matú,
chôm gyám sháng;
mara a bò sû lé jumgú má htim râ matú, chôm haq to sháng;
12 mosumhkung su, yhángmòq lé,
duì gù myui pyám sháng;
donghkong má gyó wang é bang lé su, chyuí kut pyám sháng;
13 ngá-nhúng gi, gù bo é zè
bànshoq wó yû râ nghut lhê mù,
ngá-nhûng é yhûm má gi,
wó lú lo é zè byíng to râ nghut lhê.
14 Nàng gi, ngá-mòq eq rahá
byìnzùm kut mù,
ngá-nhúng gi, ngùnhtûng ralhum za,
chôm chûng sháng.” ga taí kôjáng,
15 ngá zo ê, yhángmòq htâng hkâcháng,
yhángmòq é hkyô má le hkâbo so;
16 hkâsu mù gâ le, yhángmòq gi,
agè ashop hkyô kut râ matú,
din jón wún bûm kômù,
byu pê é chyungxe sui lhoqhtoq râ matú,
han dik akô nghut ri.
17 Nghoq pé bànshoq myang é hí má,
gùn dú le gi, akôm za nghut lhê;
18 nghut kôlhang, byù haú bang gi, yhûmsing é chyungxe sui,
lhoqhtoq pyám râ matú gyám nyî kômù,
yhûmsing é chyungxe lhoqhtûm pyám râ matú, haq tô akô nghut ri.
19 A târa é dông sùtzè wó râ lé,
myìt tuî nyì bang bànshoq é jihtûm gi,
haû eq rajung za nghut mù,
haû gi, yhûmsing é chyungxe lé,
yu pyám byi râ nghut lhê.
Hpàqchyî Byéng-yá Ji Nyi É Dang
20 Hpàqchyî byéng-yá gi,
byù zîng é jowò pé má htê mó èq wùt taî ri;
yhang gi, de de myang é jowò má,
yhâng é htê mó lhoqmyhang ri;
21 yhang gi, garu garín gâ é gaì um má,
wùt garu mù, wà wàng hkúmdong má, dáng nyo ri.
22 Haû gi, “Ngòk é bang gi,
yhángmòq ngòk é hkyô pé lé,
hkâ-myháng jé shoq chyitdàp nyì râ lhú?
Lhoqhpoi dang taí bang gi,
lhoqhpoi dang taî é lé myìt ngui é má, nghâ bang gi,
hpàqchyî lé a ngui é má,
hkâ-myháng jé shoq nghut nyî kôrâ lhú?
23 Ngò tân mhoq é lé,
núngmòq gyô é ru nghut le gi,
ngò, ngá é sô lé,
núngmòq chyáng hut gyun mù,
ngò myìt é hkyô,
núngmòq lé sé nhâng berâ nghut lhê.
24 Nghut kôlhang, núngmòq gi,
ngò wùt é hkûn he-ngìk pyám kômù,
ngò lòq lhâm kat é hkûn,
ó yùq le haî su a ngàm byi kó nghut ri.
25 Núngmòq gi,
ngò hpàqchyî byî é hkyô bànshoq lé,
tô pyám kômù, ngò tân mhoq é lé,
a hàp yù kó nghut ri.
26 Haû mù, ngò gi,
núngmòq byò dàn byò sho huî é hkûn,
taû wui pyám byi râ nghut lhê;
ngò gi, núngmòq,
wuîhke jamjau mó hpuzô é hkûn,
núngmòq lé taî hpoî pyám râ nghut lhê;
27 wuîhke jamjau mó gi, laìdun mó su,
núngmòq chyáng jé é hkûn le,
byò dàn byò sho gi, laì mó su,
núngmòq lé mùt tâng ló é hkûn le,
myìt myo myìt chiq hkyô eq wuîhke hkyô gi,
núngmòq chyáng byíng mui tô é hkûn le,
taî hpoî pyám byi râ nghut lhê.
28 Haú hkûn, núngmòq gi,
ngo lé wùt kôrâ, nghut kôlhang,
ngò gi, gyo byi râ a nghut;
núngmòq gi, ngo lé hô kôrâ,
nghut kôlhang,
myang hô kôrâ a nghut.
29 Núngmòq gi, hpàqchyî lé a nguì mù,
haû Yhûmsîng Garai lé,
gyùq hkúngga râ hkyô lé,
a hkyin yù lo kô é yánmai le,
30 ngò hpàqchyî byî é lé,
a hàp yù kô é htoq agó,
ngò tân mhoqshit é lé,
he-ngìk pyám bekô nghut é yánmai le,
31 núngmòq gi,
yhûmsîng kut é eq rajung za,
htûng hui zo kômù,
yhûmsîng haq htung é hkyô mâ é ashi lé,
hkâm zo kôrâ nghut lhê.
32 Hkâsu mù gâ le,
haû ngòk bang zùt taû é hkyô gi,
yhûmsing gùng lé sat pyám râ nghut mù,
nghâ bâng é nguì ngón hkyô gi,
htên byòq byùq râ nghut lhê.
33 Nghut kôlhang, ngá é jì-no gyo bang gi,
gau shoq myang nyì mù,
wuîhke hkyô lé a gyùq é za,
nguì ngón nyî kôrâ nghut lhê.” gâ é nghut ri.