Byu É I‑myìt Sâmlaî É Matú, Hpàqchyî Byéng-yá É A-kyû Jeju
2
Ngá zo ê, nàng gi,ngá é dang lé hàp yù mù,
ngá é hkunmó pé lé,
náng é myìt hkaû má tsîng kat to luî,
2 náng é nohkyap lé,
hpàqchyî byéng-yá shut hû mù,
náng é i‑myìt nhiklhum má,
sê gyô é u-nuq lé chung jai é nghut jáng,
3 nàng gi, myòq bóng râ matú,
wùt dung mù,
sê gyô é u-nuq wó râ matú,
htê mó èq wùt ngau é nghut jáng,
4 nàng gi, haú lé,
ngùnhtung lé su châng hô mù,
haq tô é sùtzè lé su,
châng ho gó é nghut jáng,
5 nàng gi, haû Yhûmsîng Garai lé,
gyùq hkúnggâ é hkyô lé sê gyo mù,
Garai Gasang lé sê gyô é u-nuq,
wó râ nghut lhê.
6 Hkâsu mù gâ lé, Yhûmsîng Garai gi,
hpàqchyî byéng-yá lé byî é nghut mù,
Yhâng é nhut mai, hpàqchyî eq
sê gyô é u-nuq htoq lo é yánmai nghut ri.
7 Yhang gi, díngmán bâng é matú,
ûngmyuq hkyô hkong to byi mù,
mara hûn râ hkyô a bò shoq
nyì yàp bâng é matú,
gòlong nghut nyi ri.
8 Yhang gi, târâ ràp-rá bâng é hkyô lé,
ùpzúng byi mù,
i‑myìt jujúm bâng é hkyô lé,
magûm byî nyi ri.
9 Haû mù, nàng gi,
ge é hkyô hkangmó lé le,
jô é hkyô lé le, târâ ràp-rá é hkyô lé le,
ràp-rá shoq rhâ é hkyô lé le,
sê gyo râ nghut lhê.
10 Hkâsu mù gâ le, hpàqchyî byéng-yá gi,
náng é i‑myìt hkaû má wang lò mù,
hpàqchyî gi, náng é i‑myìt sô lé,
myìt ngón gabú nhâng râ nghut lhê.
11 Ge myìt hpyit é a-tsam gi,
nang lé mâgum yù mù,
sê gyô é u-nuq gi,
nang lé wú zúng yû râ nghut lhê.
12 Hpàqchyî byéng-yá gi, nang lé,
agè ashop bâng é hkyô pé mai le,
ashop é dang taí bâng chyáng mai le,
hkyi yù râ nghut lhê.
13 Haú bang gi, díng é hkyô pé lé,
tô pyâm to kômù,
mauchut hkyô pé má sô akô;
14 yhángmòq gi, shut é hkyô kut râ lé,
myìt nguì ô nau kômù,
agè ashop bang mhaû lhik é hkyô má,
gabú byam chyû bum akô;
15 yhángmòq é hkyô zo pé gi,
goígùq é chyat nghut mù,
yhángmòq é hkyô pé gi,
hkyô nghoq ló byùq é chyat nghut ri.
16 Hpàqchyî byéng-yá gi, nang lé,
shiwa myhî chyáng mai le,
nhut gyai chyut é su-myî chyáng mai le,
hkyi yù râ nghut lhê;
17 myiwe haú yùq gi,
yhâng é sak rám pyàt lé hâng yu é,
yhâng é yùqgè hpó lé tô pyâm to mù,
Garai Gasâng hí má,
yhang tô tô é dangshikaq lé,
tô myhî pyám é sû nghut ri.
18 Hkâsu mù gâ le, yhâng é yhûm gi,
shî‑nò hkyô shut shuî e ló é nghut mù,
yhâng é hkyô zo pé gi,
shî‑nò hkyo é sô pé nyi é shut,
shuî e ló é nghut ri.
19 Yhâng chyáng ê bang ó yùq le,
haú mai wó dum taû htoq lô râ le a nghut,
chyungxe duì hkyô le dum myang yù râ le a nghut.
20 Haû su mù, nàng gi,
byù ge pê é hkyô má so mù,
díngmán bâng é hkyô má,
cháng ra râ nghut lhê.
21 Hkâsu mù gâ le,
i‑myìt díng bang gi,
haú maumyî má myang nyì kôrâ nghut mù,
mara hûn râ jang a bo é bang gi,
haú má xoq nyi nyì kôrâ nghut lhê;
22 nghut kôlhang, agè ashop é bang gi,
maumyî haú mai,
hpyit pyâm é hui kôrâ nghut mù,
a jujúm é bang gi, haú mai,
nùt htoq pyâm é hui kôrâ nghut lhê.