HPÀQCHYÎ SHIT KYO LAIKÁ
Laiká
(Ecclesiastes)
Jung Hkangmó Akôm Chyat Nghut É Hkyô
1
Dawiq é yhang zo, Yerusalem wà mó mâ é hkóhkâm nghut é, Târâ Hkô Su é hpàqchyî shit kyo dang pé gi, a-ô mâ é eq rajung za nghut ri.2 Târâ Hkô Sû gi, “Akôm za nghut ri! Akôm za nghut ri!
Lhúnglháng akôm za yhang nghut ri!
Jung hkangmó akôm za nghut ri.” ga taî ri.
3 Xângzo byù gi, buì ô má yhángmòq zuî hkyik é múzó bànshoq mai,
hai a-kyû myang hkam yu akô lhú?
4 Byùxik gi, i-pyàt ra-pyàt laî ló mù, ra-pyàt dum htoq lo ri;
nghut kôlhang, myìdàm htoq gi, ahtum abyùq rajung za nghut nyi ri.
5 Buì gi, htoq lô mù, dum wang ló luî,
yhang htoq lo é jang má hân taû wang ló ri.
6 Laì gi, maupyî hkyam shut mùt ló mù,
mautsûng hkyam shut lhing mùt ló ri;
haû gi, mùt lhing nyì mù,
sânghi mùt htoq lo é jang shut taû mùt lhing ló ri.
7 Wuìlàng pé bànshoq gi, wuìshuq lung-aû má chyat yui wang ri;
nghut kôlhang, wuìshuq lung-aû gi, hkâ-nhám le byíng nghu é a jòq nghut ri.
Wuìlàng pé gi, hká mai yui htoq lo le,
hká shut dum yui taû ló akô nghut ri.
8 Lhúnglháng gi, byù a ung taí loshoq,
ngú nhang é múzó chyat nghut ri.
Myòq wú hkâ-nhám a lùq,
no gyo hkâ-nhám a byíng nghut ri.
9 Dùt wú bê hkyô gi, dum dùt htoq râ nghut lhê;
kut wú bê hkyô gi, dum kut htoq râ nghut lhê;
buì ô má haî le asik nghu é a jòq nghut ri.
10 “Wú keq; shî gi, asik nghut ri.” ga wó taî é jòq râ lhú?
Haû gi, góhkûn mai jòq to gù nghut mù,
ngá-nhûng é hí hí mai jòq to gù chyat nghut ri.
11 Laî ló bê i-pyàt pé lé ó yùq le a myìtbun kó nghut ri;
nyi lé lô râ bang lé le, yhángmòq é htâng mâ é i-pyàt pê èq myìtbun kôrâ a nghut.
Hpàqchyî Byéng-yá Akôm Za Nghut É Hkyô
12 Ngò, Târâ Hkô Sû gi, Yerusalem wà mó má Isira-elaq byu pê é hkóhkâm kut sû nghut lhê. 13 Ngò gi, mauhkûng ô má dùt htoq é hkyô bànshoq lé, hpàqchyî byéng-yá èq myìt lòm tung ho gôn choq htoq râ nghû myìt hpyit to bê nghut lhê. Garai Gasang gi, xângzo byu pé lé wòlai mó chyat byî to bê nghut ri myhî-nhung! 14 Buì ô má kut é múzó lhúnglháng lé ngò myàng bê nghut lhê; haú pé bànshoq gi, akôm za nghut mù, laì lé châng hkat é chyat nghut ri.
15 Goí tô é lé, wó lhoqnyhang é a nghut;
langhpyùt tô é lé, wó nghap lhôm yu é a nghut.
16 Ngò gi, ngá gûng ngò, “Wú keq, ngò gi, Yerusalem wà mó má ngá é hí má ùp laî lo é bang bànshoq htoq má hpàqchyî byéng-yá je wó yu é sû nghut lhê; ngò gi, hpàqchyî byéng-yá eq sê gyô é u-nuq gyaí bo wú bê nghut lhê.” nghû taî é nghut lhê. 17 Haû mù, ngò gi, sê gyô é hpàqchyî byéng-yá lé le, nâ é hkyô eq ngòk é hkyô pé lé le, wó sê gam hkoq râ myìt bo to bê nghut lhê; nghut kôlhang, haû le, laì lé châng hkat é hkyô za nghut é lé, ngò wó mhoq yu ri.
18 Hkâsu mù gâ le, hpàqchyî byéng-yá je myo jáng, myìt myo ûng wom hkyô je myo;
sê gyô é hpàqchyî je myo jáng, iyon yon hkyô je myô é nghut ri.