Ngón Hkyô Pé Akôm Za Nghut É Hkyô
2
Ngò gi, ngá gûng ngò, “Ahkuî lé aq; ngò gi, ge é hkyô myang ho htoq râ matú, nang lé ngón kún hkyo èq chyam wú bá.” nghû taî é nghut lhê. Nghut kôlhang, haû le, akôm za nghut ri. 2 “Wui hâ é hkyô gi, me na nghut ri. Ngón kûn é hkyô gi, hai a-kyû bo ri lhú?” nghû ngò taî é nghut lhê. 3 Ngò gi, hpàqchyî byéng-yá má cháng luî, yhûmsîng gùng lé tsibyiq wîng èq lhoqngón shi-kùt wú mù, ngòk é hkyô lé po zing wú bê nghut lhê. Hau htoq agó, ngò gi, waxâng zo wuî mai, mauhkûng ô má yhángmòq é razùp zâ é i-pyàt hkaû má, byu pê é matú ge é hkyô haî kut kô é lé myàng nau é nghut lhê.4 Ngò gi, múzó mó pé kut mù, ngá é matú yhûm pé saí luî, tsibyiq hkyâm pé saî é nghut lhê. 5 Ngò gi, xun hkyâm pé eq yông kún ban hkyâm pé saí mù, shigâm ajung jung tsing hô to bê nghut lhê. 6 Hô tô é sikgâm pé kô yúng lô râ matú wuì hpyun byi râ wuì tíng lànghkang mó pé le ngò saî to bê nghut lhê. 7 Ngò gi, jùn myhí jùn hpô pé lé wui hpyit yû bê nghut é htoq agó, ngá yhûm má hku é gótû jùn pé le wó ashî nghut lhê; hau htoq agó, Yerusalem wà mó má ngá é hí mai nyi é bang bànshoq htoq má, ngò, no hpúng pé eq sau bainám hpúng pé je wó é nghut lhê. 8 Ngò gi, ngùn hîng lé le, hkóhkam pé eq mautúm pé mâ é sùtzè pé lé le, tsing hkong to luî, mahkôn dàt hkon é yùqgè myiwe wuì lé ji to mù, yùqgè lé i-myìt ge lhoqngón byî é myi-ngê wuì myo myo lé le yu tô é nghut lhê. 9 Haû mù, ngò gi, Yerusalem wà mó má ngá é hí mai nyi é bang bànshoq htoq je kô lam lo é nghut lhê; ngá é hpàqchyî byéng-yá le gingtîng nyi é nghut lhê.
10 Ngò gi, ngá é myòqjí èq wú ngui é haî lé le a he-ngìk pyâm é za,
ngá é i-myìt ngón gabú é hkyô haî lé le hàp yu é nghut lhê.
Ngá é i-myìt nhiklhum gi, ngò zui saî é hkyô bànshoq lé gabú é nghut mù,
haû gi, ngò zuî hkyik é múzó bànshoq é a-kyû nghut ri.
11 Nghut kôlhang, ngò gi, ngá lòq èq zui saî é bànshoq lé le,
wó shoq nghû ngò zuî hkyik é bànshoq lé le, tû wú kat é hkûn,
jung hkangmó gi, akôm za nghut byùq mù, laì lé châng hkat é za dùt byùq ri;
buì ô má haí jung le a-kyû a htoq nghut ri.
Hpàqchyî Byéng-yá Eq Ngòk É Hkyô Akôm Za Dùt Byùq É Hkyô
12 Hau htâng, ngò gi, hpàqchyî byéng-yá lé le,
nâ é hkyô eq ngòk é hkyô lé le, dum taû myìt tû wú é nghut lhê.
Hkóhkam é hkô má xoq zung é sû gi, kut lai bekô nghut é hkyô lé za kut é mai lai luî,
haî wó kut jàt ri lhú?
13 Maubó gi, mauchut htoq je ge é su,
hpàqchyî byéng-yá gi, ngòk é hkyô htoq je ge é lé, ngò myang ri.
14 Hpàqchyî bò su é myòqjí gi, san za byu myang ri;
nghut kôle, ngòk é sû gi, mauchut hkaû má sô nyi ri;
nghut kôlhang, yhángnhik í yùq é rajung za hui zo kôrâ nghut é lé, ngò wó sê ri.
15 Haú hkûn, ngò gi, ngá gûng ngò,
“Ngòk é sû htûng hui zo râ su, ngò le htûng hui zo râ nghut jáng,
ngò hpàqchyî bo é gi, hai a-kyû htoq râ lhú?” nghû taî é nghut lhê.
Hau htoq agó, “Haû le akôm chyat nghut ri.” nghû dum taî é nghut lhê.
16 Hkâsu mù gâ le, hpàqchyî bò sû lé nghut kôle, ngòk é sû lé nghut kôle, myáng myáng bûn nyì kôrâ a nghut;
haû í yùq é lé tô-myhî pyâm é buìnyì gi, jé bê nghut ri.
Ngòk é sû shi byùq é su, hpàqchyî bò sû le shi byùq râ é nghut ri myhî-nhung!
Zuî Hkyik Zuî Pa É Hkyô Akôm Za Dùt Byùq É Hkyô
17 Haû mù, buì ô má zui saî shi-kùt é hkyô gi, ngá é matú myìt wuîhke hkyô za nghut byùq é yánmai, ngò gi, ngá é chyungxe lé a ngui é nghut lhê. Haú pé bànshoq gi, akôm za nghut byùq mù, laì lé châng hkat é za dùt byùq ri. 18 Ngò gi, buì ô má ngò zui saî shi-kùt é lhúnglháng lé a ngui é nghut lhê; hkâsu mù gâ le, haû lhúnglháng lé, ngá é htâng má nyi lé lô râ su é matú tô pyâm to byi râ dùt é nghut ri. 19 Haú yùq gi, hpàqchyî bò râ lùq, ngòk byùq râ lùq, ó yùq wó sé râ lhú? Nghut kôlhang, buì ô má ngá é hpàqchyî chûng mù, ngò zui saî shi-kùt é múzó é ashi bànshoq lé, yhang ùp râ nghut lhê. Haû le, akôm chyat nghut ri. 20 Haû mù, ngá é i-myìt nhiklhum gi, buì ô má ngò zui saî shi-kùt é múzó bànshoq lé myìt htûm ló bê nghut ri. 21 Hkâsu mù gâ le, rayùq yùq gi, hpàqchyî byéng-yá, sê gyô é eq lòqmú bo é dông zui saî shi-kùt kôlhang, múzó haú pé lé a bo zui saî é sû lé to byî pyâm to ra râ za nghut lhê. Haû le, akôm chyat nghut mù, ihkyùp mó gyó é za nghut byùq ri. 22 Byù gi, buì ô má zui saî shi-kùt mù, yhang myìt myo myìt chiq é hkyô bànshoq é yánmai, hai a-kyû wó yu ri lhú? 23 Yhâng é i-pyàt buìnyì pé bànshoq má, yhang zui saî é gi, yón kuq hkyô eq myìt nò hkyô chyat nghut mù, myín lé lháng yhâng é i-myìt a myang bánno nghut ri. Haû le, akôm chyat nghut ri.
24 Byù gi, zo zo shuq shuq kut mù, yhûmsîng zui saî shi-kùt é má nhik wó lhoqdìk yu é mai lai luî, je ge é hkyô haî a wó kut nghut ri. Haû le, Garai Gasâng é lòq mai nghut é hkyô lé, ngò myang ri. 25 Yhang za a lòm jáng, myàng zo myàng shuq mù, ngón hkyô myang ho é byù gi, ó wá nyì râ lhú? 26 Hkâsu mù gâ le, Garai Gasang gi, Yhang lé myìt nguì ô naù sû lé, hpàqchyî byéng-yá, sê gyô é hkyô eq gabú hkyô byî ri; nghut kôlhang, yubàk dàp sû lé gi, Garai Gasang lé myìt nguì ô naù sû lé byi nhâng râ matú, sùtzè tsîng yù râ wò eq hkong to râ wò byî é nghut ri. Haû le, akôm za nghut mù, laì lé châng hkat é za dùt byùq ri.