Lhúnglhâng É Matú Ahkyíng Tû To Byî É Hkyô
3
Lhúnglhâng é matú ahkyíng tû to byî é nghut mù,mauhkûng ô má múzó hkangmó é matú yàm-yòq jòq é nghut lhê.
2 Hku é ahkyíng jòq é su, shi é ahkyíng le jòq lhê;
hô hkyô é ahkyíng jòq é su, nùt pyâm é ahkyíng le jòq lhê;
3 sat pyâm é ahkyíng jòq é su, yâ ge é ahkyíng le jòq lhê;
hpyoq hpyi pyâm é ahkyíng jòq é su, yhûm saî é ahkyíng le jòq lhê;
4 ngau é ahkyíng jòq é su, wui é ahkyíng le jòq lhê;
iyon yôn é ahkyíng jòq é su, gó nhûn kûn é ahkyíng le jòq lhê;
5 lùqgòk lé dú pyâm é ahkyíng jòq é su, gùq tsîng yu é ahkyíng le jòq lhê;
po zing tô é ahkyíng jòq é su, a po zing é ahkyíng le jòq lhê;
6 ho gôn yu é ahkyíng jòq é su, sûm pyâm é ahkyíng le jòq lhê;
tô tô é ahkyíng jòq é su, dú pyâm é ahkyíng le jòq lhê;
7 lâng cheq pyâm é ahkyíng jòq é su, hkyup yu é ahkyíng le jòq lhê;
zim za nyi é ahkyíng jòq é su, dáng nyo é ahkyíng le jòq lhê;
8 chyitdàp é ahkyíng jòq é su, a ngui é ahkyíng le jòq lhê;
majan htoq é ahkyíng jòq é su, nguì ngón lhûm é ahkyíng le jòq lhê.
9 Mú zui sû gi, yhang zui saî shi-kùt é mai hai a-kyû myang hkam yu ri lhú? 10 Waxâng zo wuî lé, Garai Gasâng èq ngú é wòlai mó kê to byi bê nghut é lé, ngò myàng é nghut lhê. 11 Yhang gi, lhúnglháng lé, yhâng é ahkyíng má yhang, yúnglhó shoq saî to bê nghut ri. Hau htoq agó, Yhang gi, waxâng zô wui é i-myìt hkaû má ahtum abyùq é hkyô kat to byi bê nghut kôle, ó yùq lháng, Garai Gasang kut é múzó lé awang mai ahpyo hpyot a wó gôn htoq kó nghut ri. 12 Byu pê é matú gi, chyungxe dui nyi é u, gabú tung myang nyì luî, ge é hkyô kut râ mai lai luî, je ge é hkyô gótû haî a jòq lo nghut é lé, ngò sê lhê. 13 Hau htoq agó, yùq hkangmó gi, myàng zo myàng shuq luî, yhûmsîng zui saî shi-kùt é bànshoq má nhik dìk hkyô myang hô râ é chyat nghut lhê. Haû gi, Garai Gasâng é jeju chyûnghuq nghut ri. 14 Garai Gasang kut é hkyô lhúnglháng gi, ahtum abyùq gingtîng nyi é lé, ngò sê lhê; haú má haî le a wó kut jàt é htoq agó, haú mai haî le wó lhoqyôm râ a nghut. Garai Gasang gi, byu pé Yhang lé gyùq hkúngga râ matú, haú lé kut é nghut ri.
15 Ahkuî jòq é lhúnglháng gi, góhkûn jòq bê chyat nghut mù,
dùt htoq lô râ nghut é pé le, góhkûn dùt htoq wú bê é chyat nghut ri;
hkâsu mù gâ le, Garai Gasang gi, dùt laî ló bê hkyô lé dum dùt htoq nhâng râ nghut lhê.
16 Ngò gi, buì ô má dùt é gótû hkyô lé myang ashî nghut lhê; haû gi,
târâ jéyáng jang má agè ashop hkyô le jòq nyì mù,
târâ ràp-rá é hkyô má agè ashop hkyô jòq nyi é hkyô nghut ri.
17 Haú hkûn, ngò gi, ngá gûng ngò,
“Múzó hkyô hkat hkangmó é matú ahkyíng jòq râ nghut é eq,
kut htoq é hkyô hkangmó lé târâ jéyáng râ ahkyíng jòq râ nghut é yánmai,
Garai Gasang gi, díngmán sû eq agè ashop sû lé târâ jéyáng râ nghut lhê.” nghû taî é nghut lhê.
18 Hau htoq agó, ngò gi, ngá gûng ngò, “Waxâng zo wuî gi, gaunyhaû pé eq pung é hkyô lé, yhángmòq wó sé kó sháng gàq ga, Garai Gasang gi, yhángmòq lé chyam wú nyi ri. 19 Gè gè yhang, waxâng zô wui chyáng dùt é hkyô gi, gaunyhaû pé chyáng le dùt é nghut ri; yhángmòq gi, rajung za hui zo kô é nghut mù, shí yùq shí du shi byùq é su, hé yùq hé du le shi byùq ri. Lhúnglháng gi, soq rajung za bo é nghut mù, waxâng zo wuî gi, gaunyhaû htoq gyaú é a nghut. Lhúnglháng gi, akôm chyat nghut ri. 20 Lhúnglháng gi, rawò má za ló bum é nghut lhê; lhúnglháng gi, tseyûn mai lo é chyat nghut mù, tseyûn shut dum taû ló bum é chyat nghut lhê. 21 Waxâng zô wui é sô gi, ahtoq shut dòq ló lhê lùq, gaunyhaû pê é sô gi, myìdàm hkaû shut wang ló lhê lùq, ó yùq wá wó sé râ lhú?” nghû dum taî é nghut lhê.
22 Haû mù, byù gi, yhûmsing é múzó má gabú nyi é mai lai luî, je ge é hkyô haî le a jòq lô é lé, ngò wó myang sê yu ri; haû gi, yhâng é chyûnghuq nghut ri. Hkâsu mù gâ le, yhâng é htâng má dùt lò râ nghut é hkyô, yhang lé wó myâng nhâng râ matú, yhang lé ó yùq wó shuî taû lò râ lhú?