SHOLUMON É JIHKYANG LAIKÁ
Laiká
(Song of Songs)
1
Sholumon é jihkyang pé mâ é je ngón é Jihkyang dang.Chyit Sû Byìzo
2 Yhang gi, nhut èq ngo lé bo-puq puq byi sháng gàq;
nàng chyit é hkyô gi, tsibyiq wing lé myìt ngui é htoq je myìt ngui ri.
3 Náng é namngón jung pé gi, namngón shôm yhang nghut ri;
náng é myìng gi, namngón jung lé hut htoq kat é su yhang nghut ri.
Haû mù, byìzô pé nang lé chyit é gi, maú chang a jòq nghut ri!
4 Nàng, ngo lé lâng nghoq yû àq; ngá-nhik hân gòq!
Hkóhkâm hpó gi, yhâng é yhup wàp má ngo lé shuî wàng sháng gàq.
Luzúm Wuî
Ngá-mòq gi, náng é yánmai gabú byam chyu luî, myìt nguì myìt ngón nyi bum lhê;
ngá-mòq gi, nàng chyit é hkyô lé, tsibyiq wing lé hkya-ôn é htoq je hkya-on râ nghut lhê.
Chyit Sû Byìzo
Nang lé yhángmòq chyitdàp hkúnggâ é gi, ra-tsuí lháng a shut nghut ri nhung!
5 Yerusalem byìzô pé ê,
ngò gi, Kedara mâ é zúm pé su gùngsho noq kôlhang,
Sholumon é pán-gyang pé su,
chyit râ su dùt nyi é nghut lhê.
6 Ngò gi, buì lhap luî, gùngsho nòq byùq é yánmai,
ngo lé hkâwú tsuq nyî.
Ngá nû é yhang zo yùqzô pé gi, ngo lé nhikjum yo kôluî,
tsibyiq hkyâm pé lé wú gon nhâng kô é nghut lhê;
ngá é tsibyiq hkyâm lé kúm gi, ngò a wó wú gon nghut ri.
7 Ngò chyit kang nyì sû ê, ngo lé taî kyô wú aq;
náng é sau bainám hpúng lé hká má zúng luî,
nyí-káng lé hká má ùp nhang lhê lhú?
Ngò gi, haî mù luî, náng é luzúm wui é sau bainám hpúng pê é nàm má nyi é,
myòqnghop pyâm é myiwe myhí su dùt ra râ lhú?
Luzúm Wuî
8 Myiwe wuì má je yúng sû ê, nàng a sé jáng,
sau pê é hkyîhkô cháng mù,
sau zúng bâng é zúm yâm má,
náng é bainám pé lé ê zúng nyî àq.
Chyit Sû Yùqzo
9 Ngá chyit ê, ngò gi, nang lé,
Hpara-uq é lhêng shê myang pé eq taî whuî wú bá;
10 náng é bowâm má gi, xâm zo hkyô yúng to mù,
náng é lìngzing má gi, lungsêng wuizo pé wùt yúng tô ri.
11 Ngá-mòq gi, nang lé, hîng nogóng pé eq
ngùn mhón zê pé saí byi râ nghut lhê.
Chyit Sû Byìzo
12 Hkóhkâm hpó gi, yhâng é zohpoq má nghut nyi ashî hkûn,
ngá é namngón jung gi, namngón shôm lé lhoqhôm kat ri.
13 Ngá é chyit sû gi, ngá é matú,
ngá é wànggàng agùng mâ é namngón jung mura ding su nghut nyi ri.
14 Ngá é chyit sû gi, ngá é matú,
En Gedi mâ é tsibyiq hkyâm mâ é pánlong bó ding su nghut nyi ri.
Chyit Sû Yùqzo
15 Ngá chyit ê, nàng gi, yúng dik ri ô!
Gè gè yhang, yúng dik ri ô!
Náng é myòqjí gi, hpûngkyui su yhang nghut ri.
Chyit Sû Byìzo
16 Ngá chyit ê, nàng gi, wú shingkâng dik ri ô!
Wú chyit nhô za yhang dùt ri ô!
Ngá-nhik é hpyang gi, nyui yúng mhan hpup yhang nghut ri.
Chyit Sû Yùqzo
17 Ngá-nhik é yhûm mâ é hkûng pé gi, kyám sik nghut mù,
hkyâng pé gi, htángmó sik nghut lhê.