Chyit Sû Byìzo
2
Ngò gi, Sharon pá mâ é sui díng ban nghut luî,langhkaû mâ é htupbó ban nghut lhê.
Chyit Sû Yùqzo
2 Ngá é chyit sû gi, zu púng mâ é htupbó ban su,
byìzo wui chyáng ze htoq nyi ri.
Chyit Sû Byìzo
3 Ngò chyit kâng sû gi, yòso sik púng mâ é jawú-mân agàm su,
yùqzo wuì chyáng ze htoq nyi ri.
Ngò gi, yhâng é wùpzo ô má ngón za zùng nau ri;
yhâng é ashi gi, ngá é nhut má chuî nghâm ri.
4 Yhang gi, ngo lé poî kut é yhûm má shuî wàng mù,
yhâng é donghkón gi, ngá chyáng chyit kâng hkyô dùt ri.
5 Ngò gi, chyit lhum hkyô mai wum nyhôm byùq é yánmai,
tsibyiq shi kyuq èq wum-o lhoqkíng byi kômù,
jawú-mân èq lhoqngón byî akô nghut ri.
6 Yhâng é lòqpaî lòq gi, ngá é ulhum ô má to mù,
yhâng é lòqyo lòq gi, ngo lé po zing tô ri.
7 Yerusalem byìzô pé ê,
chyit myìt é ahkyíng a jé jé gi,
haú lé hkâ-nhau kó, hkâ lhoqpun kó nghû,
yòso mâ é xat pé eq chochî pê é myìng lang luî,
núngmòq, ngo lé dâkam to keq.
8 Ngá é chyit su é htê lé gyo keq!
Wú keq! Yhang, shí má lé bê nghut ri;
yhang gi, bùm pé mai byam gó lai luî,
bùm zo pé lé byam lhut lai bê nghut ri.
9 Ngá é chyit sû gi, xat su le, yo su le nghut nyi ri.
Wú keq! Yhang gi, wàhkûm shinggan má yàp tô ri;
yhang gi, hkohot pé mai tu wú luî,
gyamchyap pé mai juí wú ri.
10 Ngá é chyit sû gi, ngo lé ji yù mù,
“Ngò chyit kâng sû ê, toq aq;
ngá é yúng sû ê, ngá htâng cháng aq.
11 Wú aq! Gyòqmyò lai bê nghut ri;
mau le hpong luî, san za dùt byùq bê nghut ri.
12 Myìdàm htoq má banbó bó bê nghut ri;
mahkôn hkon kún yòq le jé bê nghut ri;
ngá-nhik é maumyî má hpûngkyui dut dut dû dû ga
myìng nám le jé bê nghut ri.
13 Hkohúm gâm mâ é ashi myhîng lo nyì bê nghut ri;
tsibyiq nuî pê é abó le gyai namngón bê nghut ri.
Ngò chyit kâng sû ê, toq mù, lé aq;
ngá é yúng sû ê, ngá htâng cháng aq.” ga taî ri.
Chyit Sû Yùqzo
14 Bùm yàm pé mâ é haq jowò pé eq
lùqpyoq pé má nyi é, ngá é hpûngkyui ê,
náng é myòqdong lé tûn shit wú aq;
ngo lé, náng é htê gyo nhâng àq;
hkâsu mù gâ le, náng é htê gi, gyai yhang ngón é nghut mù,
náng é myòqdong gi, chyitdàp nhô zâ é nghut ri.
15 Tsibyiq hkyâm pé lé lhoqhten byî é wàmhkui zô pé nghut é,
wàmhkuî pé lé, ngá-nhik é matú chyup byi keq.
ngá-nhik é tsibyiq hkyâm gi,
abó bó bê nghut lhê.
Chyit Sû Byìzo
16 Ngá é chyit sû gi, ngá é nghut mù, ngò le, yhâng é nghut lhê;
yhang gi, htupbó ban yô pé má sau pé lé kat é nghut ri.
17 Ngò chyit sû ê, nàpsûn myòqmyàng maubó é eq,
buìshûm a byùq ló shi-má, lhîng luî,
arùk aràk dùt é bùm pé má nyi é,
xat pé eq chochî pé su, nàng dùt ra râ nghut lhê.