ESAI-A LAIKÁ
Laiká
(Isaiah)
1
A-ô mâ é gi, Yudaq hkóhkâm Uzi-a, Yohtam, Ahaza eq Hezeki-a pé ùp é i-pyàt má, Amozi é yhang zo yùqzo Esai-a mai, Yudaq mau eq Yerusalem wà mó eq séng luî myang é shing-rán nghut ri.Gumlau Toq É A-myû
2 Mauhkûng ê, gyô yù àq! Myigùng ê, tâm gyo aq!
Hkâsu mù gâ le, haû Yhûmsîng Garai dáng nyo é gi,
“Ngò gi, zoshâng wuì lé hku baú hku ko bê nghut kôlhang,
yhángmòq gi, Ngo lé gumlau toq akô nghut ri.
3 No gi, yhâng é yhûmsîng hpó lé sê ri;
loze gi, yhâng yhûmsîng hpô é lànghkang lé sê ri;
nghut kôlhang, Isira-elaq byu pé gi, Ngo lé a sé kó;
Ngá é byu pé gi, a sê gyo kó nghut ri.” gâ ri.
4 Haû mara shut é a-myû,
mara mó bo é byù myû,
agè ashop kut é byù wut,
ihkyùp she hâng é zoshâng wuì gi, dingnyé wó ri!
Yhángmòq gi, haû Yhûmsîng Garai lé tô pyâm to bekô;
yhángmòq gi, haû Isira-elaq byu pê é Chyoiyúng Sû lé wú tiq pyám kôluî,
Yhâng chyáng mai nùnghtáng lhik ló byùq bekô nghut ri.
5 Núngmòq gi, haî mù luî, nhuq bàt é ru huî nyì shi kôrâ lhú?
Núngmòq gi, haî mù luî, gumlau ru jâng toq nyi akô lhú?
Núngmòq é ra-ulhum gón gi, dàm dap byùq bê nghut mù,
núngmòq é i-myìt nhiklhum gón gi, no hpû nyì bê nghut ri.
6 Núngmòq é hkyîwa mai ují lagùng jé shoq,
wángzán é hkyô haî a bò nghut ri;
dàmhkô pé, bàt pup hkô pé eq
nhuq pú sui htoq hkô pé baú nghut mù,
chî pyâm é le a bò, htup tô é le a bò,
tsanlun xû bùt chyut tô é le a bò nghut ri.
7 Núngmòq é ming gi, chamchyuîyuì dùt to bê;
núngmòq é wà mó pé gi, myî èq nyé gyó byùq bê nghut ri;
núngmòq é yò pé lé gi, núngmòq é myòq hí mai,
gó-mîng byu pê èq lú sing yu pyám byi kômù,
byù bíng pê èq lhoqhtên pyâm é su, chamchyuîyuì hâm pyâm to bê nghut ri.
8 Zi-un Byìzoa gi,
tsibyiq yô mâ é zúm dan su le,
dùnghko yò mâ é zàng su le,
gyè wáng tô é wà mó su le dùt byùq bê nghut ri.
9 Haû Wum-o a-tsam dìk shoq bò sû Yhûmsîng Garai za,
ngá-nhúng ra-am lé byùn nhang tô é a nghut jáng,
ngá-nhúng gi, Sodom wà su le,
Gomora wà su le htên byòq byùq berâ nghut lhê.
10 Sodom wà mâ é zau wuî ê,
haû Yhûmsîng Garaî é dang lé gyô yù keq;
Gomora wà mâ é byu pé núngmòq ê,
ngá-nhûng é Garai Gasang mhoq kyô é hkyô lé tâm gyo keq!
11 Haû Yhûmsîng Garai taî le,
“Núngmòq é hkungga pé abùm azàng gi, Ngò eq haî sêng lhê lhú?
Ngò gi, saulo zo pê é myi nyhé hkungga pé eq,
tsô myum tô é shigu gaunyhaú pê é xû hkungga pé lé, chyân shoq wó bê nghut lhê;
Ngò gi, nohtó pé, sau zo pé eq,
bainám pê é sui lé, myìt nguì ô nau é a nghut.
12 Núngmòq, Ngá é hí má lé jé kô é hkûn,
núngmòq lé haú hkyô ó kut nhang é lhú?
Ngá é wânghkaû pé lé îsu kut nâng pyeq pyám râ matú ó yùq nhang é lhú?
13 Hai a-kyû le a bo é hkungga pé lé hkâpuq yu lé lo kó!
Núngmòq é namngón jung pé lé, Ngò chaq ri.
Lhôxan Lhôsik poî pé, Bánno Buìnyì pé eq byù zîng é hpong nghut é,
núngmòq é ashop é zùp zing hpong lé, Ngò a wó jan lo nghut ri.
14 Núngmòq é Lhôxan Lhôsik poî pé eq núngmòq é masàt tô é poî pé lé,
Ngò, Ngá é ragùng gón èq a ngui é nghut lhê.
Haú pé gi, Ngá é matú wòlai dùt tô ri;
Ngò gi, hau pé lé jân nyì luî, ngú myûng ri.
15 Núngmòq, lòq lham luî kyûdung kô é hkûn,
Ngò, Ngá é myòqdong lé, núngmòq chyáng mai haq pyâm é nghut lhê;
Núngmòq kyû myo myo dung kôlhang,
Ngò gi, a gyo byi râ nghut lhê.
Núngmòq é lòq pé má gi, byù sat é sui byíng zan tô ri!
16 Yhûmsing gùng yhûmsîng chî yúng yû keq.
Núngmòq kut é agè ashop é hkyô lé, Ngá é hí mai huî sêng pyám keq;
agè ashop hkyô kut nyi é lé nô pyám keq.
17 Ge é hkyô lé kut mhoq yû keq; târâ ràp-rá hkyô lé hô keq.
Zìk zo hui bang lé htuqbáng yû keq.
Chuízô pé lé mâgum yù keq;
chuimó myhí lé bo taî hung yù keq.” gâ ri.
18 Haû Yhûmsîng Garai taî le,
“Lé keq, ngá-nhúng gi, múzó lé lhoqnyhâng sháng.
Núngmòq é yubàk mara gi, zam zam nè kôlhang,
gyo su hpyu byùq râ nghut lhê;
haú pé gi, nòq nè ne é su dùt byùq kôlhang,
sau hpyû maú su dùt byùq râ nghut lhê.
19 Núngmòq gi, kâm é myìt mai jì-no gyo kô é nghut jáng,
maumyî haû mai htoq é gè réng é gùqzò muilhum myàng zo kôrâ nghut lhê.
20 Nghut kôlhang, núngmòq gi, lhom he-ngìk pyám luî, gumlau toq kô é nghut jáng,
sham èq myhui pyâm é hui kôrâ nghut lhê.” gâ ri.
Shí pé gi, haû Yhûmsîng Garaî é nhut mai taî é nghut ri.
Yubàk Mara Byíng Mui É Wà Mó
21 Haû jujúm é wà mó gi,
shiwa myhí dùt byùq bu-nhung lhî!
Laî ló bê hkûn gi, yhâng chyáng târâ ràp-rá hkyô byíng zan tô é nghut lhê;
díngmán hkyô gi, yhâng chyáng lhaq bo é nghut lhê;
nghut kôlhang, ahkuî gi, byù sat bang baú dùt to bê nghut ri!
22 Núngmòq é ngùnhtung pé gi, ngùnhkyi dùt byùq bê;
núngmòq é je réng é tsibyiq wing gi, wuì nyó byùq bê nghut ri.
23 Núngmòq é zaugun wuì gi, gumlau toq kômù,
hkau dûng pé eq byìnzùm kut akô nghut ri;
yhángmòq bànshoq bang gi, lòqhkaû lang zè lé chyit é bang nghut kômù,
chyûnghuq lé châng hkat bum akô nghut ri.
Yhángmòq gi, chuízô pé lé a magûm byî é eq,
chuimó pê é múzó pé lé haî su a ngàm kut pyám byî akô nghut ri.
24 Haû mù, Yhûmsîng, haû Wum-o a-tsam dìk shoq bò Sû Yhûmsîng Garai,
Isira-elaq byu pê é Wum-o a-tsam mó bò Sû taî pyo é gi,
“Gè gè yhang, Ngò gi, Ngo lé gyè kut é bang lé nhikmó-yo luî,
Ngò yhang, Ngá é gye pé lé Ngá é matú lató hpuq râ nghut lhê.
25 Ngò gi, Ngá é lòq èq núngmòq lé taû htim luî,
núngmòq é ngùnhkyi pé lé le sháng shoq jên pyám mù,
núngmòq chyáng dàp é a san a séng hkyô bànshoq lé le huî sêng pyám râ nghut lhê.
26 Ngò gi, góhkun lhê é buìnyì pé má su, núngmòq é târâ agyì pé lé le,
sânghi mâ é su, núngmòq é hpàqchyî byi bang lé le, dum nyì nhâng râ nghut lhê.
Hau htâng má, nang lé gi,
Jujúm é Wà mó,
haû Díngmán é Wà mó ga kôrâ nghut lhê.” gâ ri.
27 Zi-un gi, târâ ràp-rá hkyô mai hkyi yu é hui mù,
yhâng chyáng mâ é myìt lhîng bang gi, díngmán é hkyô mai hkyi yu é hui kôrâ nghut lhê.
28 Nghut kôlhang, gumlau toq bang eq yubàk byu pé gi, bànshoq rahá htên byòq byùq râ nghut mù,
haû Yhûmsîng Garai lé tô pyâm tô é bang gi, htûm byùq râ nghut lhê.
29 Gè gè yhang, núngmòq gi, núngmòq myìt nguì ô nau é,
sân-yúng wàqmyòq gam é yánmai hoq hpu luî,
núngmòq hkyin yu é hkyâm pê é yánmai,
gùng-yui dik é hpuzo kôrâ nghut lhê.
30 Núngmòq gi, ahaq nyhuî byùq é wàqmyòq gàm su dùt byùq mù,
wuì a jòq é hkyâm su dùt byùq râ nghut lhê.
31 Wàqngân hpó gi, htang kyâng su dùt byùq mù,
yhâng é múzó gi, myizik su dùt byùq râ nghut lhê;
haû í ja é rahá myi nyhé mù,
ó yùq le, myi haú lé wó sat pyám râ a nghut.